Skip to main content

Nalunaarusiaq: Kukkunersiuinermut Ataatsimiititaliaq pakatsisinneqartartoq

Akilersilluni peqquserluuteqartarneq pillugu misissuisimanerup erseqqissumik takutippaa, Kukkunersiuinermut Ataatsimiititaliamit Naalakkersuisut ataatsimiititaliamut atatillugu iliuuseqaartarnerat pakatsissutigineqartartoq.

Inuiaqatigiit nakkutilliisuat - Kukkunersiuinermut Ataatsimiititaliaq - pisortat aningaasaataannik nakkutilliinissamut aamma nammineerluni, kinaassusersiunngitsumik tutsuiginartumillu paasissutissiinissap qulakkeerneqarneratigut ingerlatsinermik kikkut tamat takunnissinnaanissaannik pingaarutilipilussuarmik suliassaqarpoq.

Kukkunersiuinermulli Ataatsimiititaliami suliaqartarneq oqitsorsiorfiusanngittutut isikkoqartoq, tamanna misissuisimanermit nalunaarusiami 60-ingajannik quppernilimmi, 2020-mi novembarip qaammataani naammassineqartumi politkkerinullu tunniunneqaqqamersumi atuarneqarsinnaavoq.

Nalunaarusiami akilersilluni peqquserluuteqarsinnaanerup annikillisarneqarnissaanut arlalinnik inassuteqaateqarpoq, taakkununngalu Kukkunersiuinermut Ataatsimiititaliap sulinerani atugassarititaasunut tunngassuteqartut ilaapput.

Ujartuineq

Nalunaarusiami allassimavoq, ataatsimiititaliamit uparuarneqarlunilu ujartorneqartoq ”ataatsimiititaliap apeqqutaanut assigisaanullu Naalakkersuisut sukkanerusumik akissuteqartarnissaat aamma akissuteqaataat tunngavilersorluagaanerullutillu pitsaanerusarnissaat”.

-Aamma Kukkunersiuinermut Ataatsimiititaliaq ukiut tamaasa aaalajangersimasunik inassuteqaateqartarpoq malitseqartinneqarneq ajortunik, nalunaarusiami erseqqissaatigineqarpoq.

Uparuarneqarportaaq Naalakkersuisut ataatsimiititaliap inassuteqaataanut tigussaasumik akissuteqartittarniarlugit nalunaajaasarnissaq atuutsinneqalersimagaluartoq, suli tamakkiisumik akissuteqartoqarneq ajortoq.

Nordic Consulting Group A/S-ip arlaannaannulluunniit attuumassuteqanngitsutut nalunaarusiorsimasut inassuteqaatigaat, immikkut illuinnartup ataatsip allanngortinneqartariaqarnera.

Ataatsimiititaliap atuuffia sivitsorneqassasoq

- Ukiut tamaasa Kukkunersiuinermut Ataatsimiititaliami ilaasortanngortitsisarneq siunertamut naapertuutinngilaq, tassungalu atatillugu innersuussutigineqarpoq, nunani avannarlerni allani kukkunersiuinermut ataatsimiititaliami ilaasortassat qinigaaffik naallugu atuuttussatut toqqarneqartarnerat, taamaalilluni nammineq aqutsillutillu aalajangiisinnaanerat nukittorsarneqassammat.

- Kukkunersiuinermut Ataatsimiititaliaq ingerlalluassappat misilittakkat ataavartumillu ingerlatsisinnaaneq assut pingaaruteqartut nunani avannarlerni kukkunersiuinermut ataatsimiititalianit ataatsimullu isigalugu tamanit isumaqatigineqarpoq, ataatsimiititaliap 2019-imi isumaliutissiissutaani allassimavoq.

Nalunaarusiap suliarineqarnerani apersorneqartut ilaanit erseqqissaatigineqarpoq, Kukkunersiuinermut Ataatsimiititaliaq ”naatorsuinermi kukkunersiuinermilu pingaarutilimmik misilittagaqarpoq kiisalu suliassaq annertullunilu suliassamik paasinninnissamut piffissamik atuisoqartarmat atavarnerusumik sulisoqarnissaa qulakkeerneqartariaqarluni”.

- Periusissatut inassuteqarput, tassani ataatsimiititaliaq kukkunersiuinermik misilittagalinnik inatsisartunilu ilaasortanik inuttalerneqarnissaa inassutigineqarluni, misissuisimanermi Inatsisartuni ilaasortanngortussat isummerfigisassaanni allassimavoq.

Piviusut:

Kukkunersiuinermut Ataatsimiititaliap pissutsit isornartoqartitai Naalakkersuisutut akisussaasumut kinguneqartinneqasanersut Inatsisartunit aalajangiifigineqartussaapput.

Kukkunersiuinermut Ataatsimiititaliaq Nunatta Karsiata naatsorsuutaanik misissuinermut atatillugu isornartorsiuippat, Naalakkersuisut politikkikkut akisussaasutut pissutsit pineqartut misissorlugillu aaqqiiffigissavaat.

Kukkunersiuinermut Ataatsimiititaliaq Naalakkersuisunut kinguneqartitsisinnaanngilaq.

Ataatsimiititaliaq Inatsisartut aalajangiiffigisassaattut inassuteqarsinnaavoq, Inatsisartulli kisimik naalakkersuisup politikkikkut kinguneqartinneqarsinnaanera aalajangiiffigisinnaavaat.

Nalunaarusiaq pillugu ilanngutassiat allat atuakkit:

Akiliiluni peqquserlutsitsisimanerit pillugit suliat arlaqartut

Akilersilluni peqquserluttarneq imatut pinngitsoortissinnaavarput

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER