Nalunaarusiaq: Inuusuttut kingusissukkut ilinnialertarput

Nunatsinni ilinniagaqartut amerliartorput. Sulili ilinniagaqarneq appasissutut nalilerneqarsinnaasoq, Naalakkersuisut suliffeqarnermut nalunaarusiaani, saqqummeqqammersumi atuarneqarsinnaavoq.

Nunatta naatsorsueqqissaartarfianit kisitsisit takuippaat inersimasut 55-64-inik ukiullit amerlanerpaartaat meeqqat atuarfiannik taamaallaat naammassinnissimasut. Aammali kisitsisit taakku takutippaat inuusuttut 20-29-nik ukiullit 59,9 procentii meeqqat atuarfiata saniatigut allamik ilinniakkamik naammassinnissimanngitsut.

- Taamaattorli inuusuttut ilinniakkamik kingusissukkut aallartitaqartarnerannut takussutissaqarpoq, 20-29-iliisimasuni amerlasuut meeqqat atuarfiat qaffasinnerpaatut naammassisimammassuk, allassimavoq.

Kajumissuseq nassaarineqartariaqarpoq

Nalunaarusiami erseqqissarneqaqqippoq nunatsinni pilersugassat amerligaluttuinnartut, innuttaasullu ikiliartuinnartut pilersuisussaalissasut.

Ineriartorneq maannakkutut iinnassappat innuttaasut 67-ileereersimasut ullumikkumit amerlanerussapput. Tamanna inuiaqatigiinni sulisinnaasunut akisussaafferujussuussaaq, innuttaasummi 2050-imi 50.000 ataallugit amerlatiginissaat naatsorsuunneqarsimavoq, nalunaarusiami allaatigineqarpoq.

- FInuiaqatigiit ikiliortortut akullugu innuttaasut utoqqaanerulertarnerannik kinguneqassaaq inuit sulisinnaasut ikinnerulernerannik, tamannalu sulisinnaasutut sulisussanut annertoorujussuarnik piumasaqarfiussaaq.

- Ingammik nunatsinni inuusuttut akornanni ilinniagaqarsimassutsip qaffatsinnissaa sammineqartariaqarpoq, inuusuttut 30-liisimanngitsut ilinniagaqarnissamut ilitsersorneqarlutillu kaammattorneqassallutik. Peqatigalugu ukiut tulliuttut ingerlanerini sulisartuni ilinniagaqarsimanngitsut sinnerisa piginnaanngorsarnissaat pingaaruteqartuuvoq.

Suliffissaaleqisut amerlanerpaartaat inuusuttuupput

Nalunaarusiami ersersinneqarpoq inuusuttut ilinniakkamik aallartitsinngikkunik inuunerminni suliffissaaleqineq annertuumik misigisarumaarnissaannut aarlerinartorsiulersartut.

- Tamanna inunnut ataasiakkaanut taakkulu ilaqutaannut avatangiisiinullu alianartuuvoq; aammali akileraarutini isertitat amigaatiginerisigut, pisortallu ikiorsiissutaanni aningaasartuutit amerlinerisigut inuiaqatigiinnut akisuujulluni, Naalakkersuisut nalunaarusiaminni allapput.

Inuusuttut 30-t ataallugit ukiullit ilinnialernissaannut iliuuserineqartut iluaqutaasaraluartut, suliffissaaleqisuni inuusuttut 30-t ataallugit suli amerlanerpaajupput.

Inuusuttut siusinnerusukkut ilinniagaqalernissaat anguniarlugu meeqqat atuarfiannut tunngasumik eqimattamik suleqatigiimmik Naalakkersuisut suliniuteqassapput, inuusuttut kajumilersinniarlugit sulisussamik.

- Suleqatigiit ilaatigut inuusuttut siunnerfiusut oqaluuserisassaniitinnissaat ilalersuutigissavaat, inuusuttunut tunngatitatut siunissami iliuuserisat atuuttooreersunut ataqatigiissaassallugit, inuusuttut siunnerfigisat pillugit suliassaqarfiit assigiinngitsut imminnik oqaloqateqartittassallugit, aamma inuusuttut siunnerfigisat toqqaannartumik toqqaannartuunngitsumillu sunniutilinni periusissiani, iliuuserisani iluarsaaqqinnernilu nutaani inuusuttut siunnerfigisat eqqarsaatigineqartassapput. Anguniagaq tassaavoq suliap tamakkerluni nunatsinni inuusuttunut tamanut atugarisanik siunissamilu periarfissanik kivitsinissaq.

Naalakkersuisut ilanngullugu erseqqissaatigaat inuusuttut ilinniagaqalernissamut kajumissusaat angajoqqaat aamma akisussaaffigigaat.