Skip to main content

Nalunaarusiaq: Inuusuttut amerlavallaat suliffeqanngillat

Inuusuttut amerlavallaat ilinniakkamik aallartitaqarneq ajorput, tamatumalu kingunerisaanik suliffeqarnermi suliaqartutut ilaalinngisaannartarput. Tamanna ajornartorsiut annertuvoq, Nunatsinni suliffeqarnermut nalunaarusiami 51-inik quppernilimmi naqissuserneqarpoq.

Nunatsinni suliffeqarneq amerlasuutigut ajornartorsiortoq, "2022-mut suliffeqarnermut nalunaarusiap", Isumaginninnermut, Ilaqutareeqarnermut, Suliffeqarnermut Nunamullu Namminermut Naalakkersuisup Jess Svanep saqqummiussaata naqissuserpaa.

"Sulisunik sulisinnaasunillu nukittorsaaneq inuiaqatigiilerinermi suliaq pingaartuusoq" nalunaarusiami aallaqqaasiinermi Jess Svane naqissusiivoq. Inuusuttut sukkanerusumik ilinniakkamik naammassisaqartarnissaat pingaaruteqartoq, immikkut ittumik tikkuarpaa.

- Ilinniarnertuut suliffeqartut amerlapput ilinniaqqinnissamut ingerlaqqissimanatik. Aammalu inuusuttoqarpoq ilinniagaqanngitsunik suliffeqanngitsunillu, ernumarpalaartumik Jess Svane oqarpoq.

Nalunaarusiap paasinarsisippaa "ilinniagaqarnerup qaffasissusia qaffakkiartortoq, sulili appasippallaartoq".

- Immikkut tamanna ajornartorsiutaavoq, ilisimatusarnerup takutimmagu ilinniagaqarsimasut sulisullu ilinniakkaminnik nangitsisimasut ataatsimut isigalugit ilinniagaqarsimanngitsuniit aalaakkaanerummata eqaannerusumillu inissisimallutik. Peqatigalugu suliffeqarnermi nutaaliaasumi amerlasoorpassuarni sulisut ilinniagaqarsimanissaat pisariaqartinneqarpoq.

Inuiaqatigiinnut akisusoq

Inuusuttuni suliffissaaleqineq akileraarutini isertitat amigaatiginerisigut, pisortallu ikiorsiissutaanni aningaasartuutit amerlinerisigut, inuiaqatigiinnut akisusoq oqaatigineqarpoq.

Inuusuttut ilinniakkamik aallartitaqaratilluunniit sulilertannginnerat nalunaarusiami "inunnut ataasiakkaanut taakkulu ilaqutaannut ilagisartagaanullu tamanna alianartuusutut" isigineqarpoq.

Unammillernartut Nunatta suliffeqarneranut sunniuttut salliullugit iliuuseqarfiginissaat pingaaruteqarluinnartoq, Jess Svanep naqissuserpaa.

- Iliuuseqanngikkaannimi nanertuut siunissamut kingulissanut ingerlateqqinneqassammat, aarlerisaarerpalaartumik Jess Svane oqarpoq, oqarlunilu "inuk inuiaqatigiit isumalluutaasa pingaarnersarigaat".

Suliffeqarfiit kisimik sulisussarsiorneq ajornartorsiutiginngilaat. Pisortat suliffeqarfiutaanni aamma tamanna atuuppoq. Tassunga peqatigitillugu aamma sulisitsisut sulisunik "aalaakkaatitsiniarneq" ajornartorsiutigaat.

Nalunaarusiami immikkoortut toqqarneqartut

Nalunaarusiami immikkoortut toqqarneqartut inuiaqatigiit unammillernartitarpassuisa ilaannik assiliartalersuipput:

  • Inuiaqatigiit kingusissumik ilinniarnertik naammassisarpaat
  • Nunasisut allamut nunasiartortunit ikinnerupput
  • Ukiut arlallit suliffissarsiortutut nalunaarsukkat amerlassusaasa ikileriarfii qaangiuttut, ineriartorfik maannakkut uninngaannalerpoq
  • Suli illoqarfinni anginerusuni suliffissaaleqineq appasissumiippoq, illoqarfeeqqalli arlallit annertungaatsiartumik suliffissaaleqinermik atugaqarfiupput, illoqarfiillu ataasiakkaat annertuupilussuarmik suliffissaaleqiffiullutik
  • Piukkunnaatilinnik sulisussaaleqinerup naammassisaqarluarsinnaaneq kalluarsinnaavaa, Kalaallit Nunaatalu aningaasaqarniarnera siunissami unammillersinnaallugu
OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER