Nalunaarusiaq: Illersuisoqarniarneq erloqinartoq
Nunatsinni pineqaatissinneqarsimasut illersuisoqarnerat pitsanngorsangassaavoq - pingaartumik isertitsivittaassaq ammarpat. Nalunaarusiaq nutaaq taama inerniliussaqarpoq.
Kalaallit Nunaanni illersuisoqarniarneq amigartumik ingerlanneqarpoq. Nalunaarusiaq nutaaq “Livline til verden”, Ilisimatusarfimmi lektorimit Annemette Nyborg Lauritsenimit suliarineqartumit, tamanna inerniliussat ilagaat.
- Kalaallit Nunaanni illersuisut namminneertussatut imminiiginnagaapput, illersorneqartussallu aamma taamatut. Ataqatigiissaarisoqannginnerata ilinniartitsisoqannginneratalu kingunerisaanik illersuisuusut naammaginanngitsumik inissisimalerput, taamatullu namminneerlutik qanoq “suleriuseqarnissaminnik” ilinniartariaqarlutik. Illersuisullu nakkutigineqannginnerat, illersorneqartussat pappialaannakkut illersuisoqarnerannik, illersuisuminnillu takunngivissornerannik kinguneqaratarsinnaavoq, Annemette Nyborg Lauritsen oqarpoq.
Kalaallit pineqaatissinneqarsimasut tarnikkullu nappaatillit pineqaatissinneqarsimasut Danmarkimiittut Kalaallit Nunaanniittullu illersuisoqarnissaminnik pisinnaatitaaffeqarput. Illersuisup pineqaatissinneqarsimasoq ikinnerpaamik qaammammut ataasiarluni pulaartartussaavaa, aninerni peqatigisassallugu, eqqartuussivimmi peqatigisassallugu nalliuttunilu najortassallugu.
Pineqaatissinneqarsimasut isertitsiviup nutaap pisariaqartitsineq annertunerulersissavaa
Københavnimi Kalaallit Illutaata Danmarkimi Herstedvesterimi killiligaanngitsumik pineqaatissinneqarsimasut illersuisoqarnissaat, 1970-kkunnili ataqatigiissartarpaat. Pinerluuteqarsimasunulli isertitsivissap matoqqasup nutaap Nuummi ammarneqarnerani, aaqqissuussaq qanoq pineqarumaarnersoq suli ilisimaneqanngilaq.
Taamaammat Københavnimi Kalaallit Illuutaata illersuisoqarniarnerup qanoq pinissaa pillugu iliuusissamik ujartuilluni, upernaakkut 2017-imi qulaajaatitsilerpoq. Nalunaarusiarlu 62-inik quppernilik, Annemette Nyborg Lauritsenimit suliarineqartoq maanna saqqummersimalerpoq.
Kalaallit Nunaanni pineqaatissinneqarsimasuni 94-iusuni, 39-it illersuisussaqanngitsut nalunaarusiami atuarneqarsinnaavoq. Taamatuttaaq Danmarkimi kalaallit pineqaatissinneqarsuni 39-usuni marluk illersuisussaqaratik.
Qitiusumik ataqatigiissaarisoqalerli
Illersuisoqarnerup ingerlanneqarneranut nalunaarusiaq arlalinnik innersuussuteqarpoq. Ilaatigut ataqatigiissaarisussamik Nuummi pilersitsoqassasoq, soorlu maanna Københavnimi ingerlanneqartutuulli.
Københavnimi Kalaallit Illuutaata pisortaata, Leise Johnsenip, illersuisoqarniarneq pillugu Kalaallit Illuutaata 1970-kkunnili misilittagai iluaqutaasinnaammata nuannaarutigaa.
- Pineqaatissinneqarsimasumut illersuisoqarneq isumalerujussuuvoq, taamatullu avammut attaveqaataalluni. Taamaammat neriuutigaarput Kalaallit Nunaanni illersuisoqarniarnerup siunissami ingerlanneqarnissaanut nalunaarusiaq tunuliaqutaasinnaassasoq.
Illersuisut, pineqaatissinneqarsimasut, pineqaatissinneqarsimasullu pillugit suliaqartut akornanni malinnaanikkut apersuinikkullu nalunaarusiaq suliarineqarpoq. Taakku saniatigut Herstedvesterimi killiligaanngitsumik pineqaatissinneqarsimasut apeqqutinik nassiussuuffigineqarsimapput taamatuttaarlu oqaluttuarisaanermi illersuinermik aaqqissuussinerit pillugit allattorsimaffiit misissuiffigineqarsimallutik.