Nalunaarusiaq nutaaq: Sioqqanik assartuineq akisuvoq

Kalaallit Nunaat sioqqanik avammut tunisaqarnissamut periarfissaqarpoq, assartuinermili aningaasartuutaasussat unammillersinnaanermut annertuumik sunniuteqartussaasut, nalunaarusiami nutaami atuarneqarsinnaavoq. Geografimili professorip nalunaarusiaq amigaateqartutut isigaa.

Kalaallit Nunaat sioqqanik avammut tunisaqarnissamut periarfissaqarpoq. Sioqqanilli avammut tunisaqartarnissaq akilersinnaanavianngilaq, sioqqat assartorneqartarnreat akisuallaarmat.

Videncenter for Mineralske Råstoffer og Materialer, nalunaarusiamik saqqummiussisimasoq taamatut isumaqarpoq. Naalakkersuisut nalunaarusiortoqarnissaa piumasarisimavaat.

Sioqqat sanaartornermi atorneqartartut akisuallaanngikkaluarlutik iluanaarutaavallaartanngillat, assartuinermi aningaasartuutigineqartartut unammillersinnaanermut sunniuteqarluartarmata.

Aningaasartuutaangaatsiassasut

Videncenter for Mineralske Råstoffer og Materialernimi pisortaq Jakob Kløve Keiding naapertorlugu, Kalaallit Nunaanni tunisassiornissamut assartuisarnermi aningaasartuutaasartut unammillernartussaapput, nalunaarusiamilu nutaami paasisat takutippaat, Kalaallit Nunaanni sioqqanit tunisassiorneq imminut akilersinnaassappat, tunisassiat pitsaalluinnartuusariaqartut taamalu qaffasissumik akeqartinneqarsinnaallutik.

- Nalilerparput, Kalaallit Nunaanni pitsaalluinnartunik tunisassiornissamut ujaraqartoq teknikkikkullu atortoqartoq pisariaqartinneqartunik, aamma pineqartut taakku sioqqanik, ujaraaqqanik ujaqqanillu siunissami tunisassiorsinnaalernissamut ilippanaateqartitsilluartut. Taamaammat inassutigaarput, isumalluutit taakku siunnerfeqartumik misissuiffigineqassasut, taanna GEUS naapertorlugu taamatut oqarsimavoq.

Professorip amigaateqartoq takusinnaagaa

Sermitsiaq.AG-p Mette Bendixen Canadami McGill Universitytimi professoriusoq oqaloqatigisimavaa, taanna pineqartunik siusinnerusukkut ilisimatusarsimasoq isumaqarpoq, nalunaarusiaq amigaateqartoq.

- Nalunaarusiami atortussiassat qanoq pitsaassuseqartiginerat aamma ukiut qulit, 20-t 50-illu qaangiuppata niuernermi pissutsit qanoq ikkumaarnerat misissorneqarsimanngitsut isumaqarpunga. Kisitsisimmi takutippaat atortussiassanut taakkununnga akigititat qaffattussaasut. Taamaammat naatsorsuisimaneq allatut isikkoqalersinnaavoq. Sioqqanit tunisassiat naleqarnerulersinnaapput, taanna erseqqissaavoq.

Innuttaasut tusarniarneqarsimanngitsut

Naatsorsuisimaneq allanngortinneqartuuppat, Kalaallit Nunaata sioqqanik avammut tunisaqartarneq iluaqutigisinnaavaa, taanna oqarpoq.

- Suliffissanik pilersitsisoqarsinnaavoq, akileraarutit akitsuutillu isumaginninnermi iluaqutigineqarsinnaapput. Nalunaarusiamili kingullermi innuttaasut isumaat tusarniarneqarsimanersoq oqaatigineqanngilaq. Kuannersuarnermi suliniut allanillu piiaaniarluni suliniuteqartarnermi innuttaasut peqataatinneqartartut nalunngilarput. Tamatuma nalunaarusiami ilanngunneqarsimannginnera tupigusuutigaara, Mette Bendixen oqarpoq.


Nalunaarusiamili ujaqqat sequtseriarlugit tuniniarneqarsinnaanerannik ilippanaateqartoq pillugu allassimasoqarnera soqutiginartippaa.

- Ilisimatusarninni sioqqat sineriammiittut sammisimavakka, nalunaarusiamili ujaqqanik qaartitanik avammut niueruteqartoqarsinnaaneranik allassimasoqarpoq. Taannartaa soqutiginarluartuuvoq. Taamaammat nalunaarusiaq kinguller apeqqutinik akineqarsinnaanngitsunik arlalinnik pilersitsivoq, aammali Kalaallit Nunaanni aatsitassat pitsaanerpaamik qanoq atorneqarsinnaanerannik akissutissarsiniarnissaq ammaanneqarluni, Mette Bendixen oqarpoq.

Powered by Labrador CMS