Nalunaarusiaq nutaaq: Katsorsaaneq iluaqutaavoq – aanngajaarniutinut ajornartorsiutaannarnuunngitsoq
Pinngitsuuisinnaajunnaarnermik Paasisimasaqarfimmit ukiumoortumik nalunaarusiami inerniliunneqarsimavoq, aanngajaarniutinik ajornartorsiuteqarnermut suliniut arlalitsigut iluaqutaasartoq.
Nalerisimaarnermut kingunerluuteqartarpoq. Ilaquttanut kingunerluuteqartarpoq. Peqqissutsimut kingunerluuteqartarpoq.
Inuk kinaluunniit imigaasamik, ikiaroornartumik aningaasanoornermilluunniit atornerluisunngoraangat kingunerluuteqartuaannarpoq.
Tamanna paasinartutut nipeqarsinnaavoq.
Allorfimmit (Pinngitsuuisinnaajunnaarnermik Paasisimasaqarfik) 2021-mut ukiumoortumik nalunaarusiami kisitsisit nutaat takutippaat, aanngajaarniutinik ajortornartorsiuteqartunut - soorlu imigassamut, hashimut aamma aningaasanoornermut katsorsaaneq katsorsarneqartut ataasiakkaat inuunerminnik iluarisimaarinninnerannut pitsaasumik sunniuteqarluartartoq. Tamatuma saniatigut ilaqutariinnermi imminullu toqunnissamut ajornartorsiuteqarnernut annikillisitsisarpoq.
Ullut imigassartorfiusut affaannanngortut
Tamanna Meeqqanut, Inuusuttunut, Ilaqutariinnermut Peqqissutsimullu Naalakkersuisup Mimi Karlsenip Inuit Ataqatigiinneersup nuannaarutigaa.
- Nuannaarutigaara tulluusimaarutigalugulu aanngajaarniutinik ajornartorsiuteqarnermut suliniutit iluatsittumik ingerlasut maanna takutissinnaaleratsigu, taanna oqarpoq, nangillunilu:
- Katsorsaasut suliassinnut pitsaasumut sunniuteqartumullu qujanaq.
Mimi Karlsenip oqaasii maluginiagassaapput.
Inuimmi katsorsartissimasut ataatsimut isigissagaanni maluginiagassaavoq, katsorsartinnerup aallartinneraniit katsorsartereernermi qaammatit arfinillit qaangiunneranni agguaqatigiissillugit ullut imigassartorfiusut affaannanngorsimasut.
- Paasivarput imigassamik aamma hashimik atuisunut katsorsaasarneq sunniuteqartartoq, kisianni aamma katsorsarneqarnerminnik naammassinnittunut suli pitsaanerusumik sunniuteqartartartoq, nakorsaq Allorfimmilu pisortaq Birgit Niclasen oqarpoq.
Katsorsarneqarnerup sunniutaa
Innuttaasut atuinerminnut ernumanerat aamma taamatut pissutsinut allanut ernumassuteqarnerat aamma annikinnerulersarpoq, matumanili utersaartoqarsimannginnera aamma sunniuteqarnerpaajusartoq, ukiumoortumik nalunaarusiami atuarneqarsinnaavoq.
Katsorsarneqarlutik aallartittut pingajorarterutaat atornerluinerminnut atatillugu suliffeqarnerminni ajornartorsiuteqartarnerat aamma annikillisimapput.
- Katsorsartittut uagutsinnut katsorsaasunut oqaluttuartarput sulisitsisumik katsorsartinnermik sunniutaat malugilluartaraat. Katsorsartittummi suliffimminnut tunniussimanerat nukissaqarfiginninnerulernerallu tusartarparput, Poul Møller-Heinrich, Allorfik Semersuumi aqutsisoq katsorsaasorlu oqarpoq, imalu nangilluni:
- Tupaallaatigilaakkatsinnillu innuttaasut pinerlunniartarnermik ajornartorsiuteqarnerat aamma appariaateqarpoq.
Ernummatissakinnerulersartut
Aanngajaarniutinik atuisarnermi ajornartorsiutaasartut ilaqutariinni pissutsinut ajortumik sunniuteqartarput. Ilaquttanut pitsaanerusumik attaveqartalernissaq pillugu innuttaasut amerlanerit Allorfimmit ikiorserneqarusuttarput.
Katsorsartillutik aallartittut affaasa missaanniittut ilaqutariinnermi ajornartorsiuteqartarneq aaqqiagiinngissuteqartarnerluunniit ernummatigisarpaat.
Katsorsartereernermi qaammatit arfinillit qaangiunneranni katsorsartissimasut affaasa missaannaanniitut katsorsarneqarsimanertik iluatsittarpaat.
Inuit imminut toqunnissamik eqqarsaateqartartut aamma imminnut toqoriartartut katsorsartereernermi ikinnerulersarput.
Innuttaasut 948-t Allorfimmi katsorsarneqartussatut 2021-imi innersuunneqarsimapput.