Nalunaarusiaq nutaaq: Eqqartuussivinni pitsaanerusumik nutserisoqartarnissaa pisariaqartinneqartoq

Kinaluunniit pinerluuteqarsimasutut unnerluunneqartoq pineqartup oqaatsit paasisinnaanngippagit atorsinnaanngippagilluunniit inuit pisinnaatitaaffii malillugit akeqanngitsumik nutserunneqarsinnaatitaavoq. Taamaakkaluartoq Ilisimatusarfiup aamma Inuit Pisinnnaatsitaaffiinut Institutimiit misissuinerit nutaat takutippaa Kalaallit Nunaanni eqqartuussivinni pinerluuteqartut pillugit suliani unammillernartoqartoq.

Inuit Pisinnaatitaaffiinut Instituti tusagassiutinut taama nalunaaruteqarpoq.

- Kalaallit Nunaanni inuit assigiinngitsunik oqaaseqarput sumiorpaluuteqarlutillu. Taamaattumik pingaarluinnarpoq eqqortumik nutserisoqarnissaq unnerluutigineqartut inatsisitigut innarlitsaaliugaanissaat qulakkeerniarlugu, Ilisimatusarfimmi Nutserinermut Oqaluttaanermullu Immikkoortortaqarfimmi aqutsisoq nalunaarusiamilu allaaseerinneqataasoq, Laila Hedegaard Pedersen oqarpoq.

Unammillernartut

Oqaatsit nutserinerlu pillugit unammillernartut paatsoornermik kinguneqartartut arlallit nalunaarusiami taaneqarput. Unammillernartut taaneqartut ilaat ukuupput:

• Eqqartuussivinni assigiiaartumik taaguuteqanngilaq.
• Taagutit pillugit allattorsimaffik nutaanngilisimavoq.
• Sumiorpaluutit oqaatsillu assigiinngitsut atorneqarnerini paatsoortoqartarpoq.
• Iminneqarlutik nutserisut naammaginanngitsunik piginnaasaqarput.

- Kalaallit sumiorpaluutaannut paasisimasalinnik peqalernissaa annertusarneqartariaqarpoq, unnerluussat tamarmik unnerluunneqarnerminni paasineqartarniassammata namminnerlu paasinnittarlutik pineqartup sumiorpaluutaa apeqqutaatinnagu. Taamaammat kaammattuutigaarput, Kalaallit Nunaanni eqqartuussiviit siumoortumik anguniassagaat nutserisut aalajangersimasumik atorfillit imaluunniit nutserisut iminneqartartut tunumiusut avannaarmiusullu paasisinnaasut atorneqarsinnaasunik peqarnissaa, Laila Hedegaard Pedersen tusagassiutinut nalunaarummi oqarpoq.

Innersuussutit

Atugassarititaasut pitsanngorsaavigineqarnissaannut nalunaarusiami arlalinnik innersuussuteqartoqarpoq.

• Eqqartuussiviit suliami allagaatit nassiutereertassagaat nutserisumut nutserisoq piarseersarnissaanut periarfissaqarluarniassammat. Immikkut pisoqarnerani -assersuutigalugu inatsit tunngaviusoq naapertorlugu killisiuinermi – piareersarnissamut periarfissiinissaq ajornakusoorsinnaasarpoq. Taamaattoqartillugu suliami allagaatit sapinngisamik piaarnerpaamik nassiunneqartariaqarput.
• Oqaasiliortut taaguutit pillugit allattuivik atuuttoq nutartissagaat inatsisilerinermilu taaguutit nutaat siunissami ataavartumik akuerisassagaat.
• Eqqartiissivinni atorneqarsinnaasunik tunumiut oqaasiinik avannaamiullu oqaasiinik atuisinnaasunik paasinnissinnaasunillu aalajangersimasunik atorfilinnik oqalutseqarnissaa imaluunniit aalajangersimasunik imittakkanik nutserisoqarnissaa Kalaallit Nunaanni Eqqartuussiviup qulakkiissavaa, ajornanngippat nutserisut aalajangersimasumik atorfillit tunumiut avannaamiullu oqaasiinik ilinniarteqqinnerisigut.
• Eqqartuussivinni nutserisunik, minnerunngitsumik nutserisunik imittakkanik, akuersisarnermi aalajangersimasunik tunngaveqarluni akuersisarnermi periutsimik atuutilersitsoqartariaqarnersoq Kalaallit Nunaanni Eqqartuussiveqarnermut Isumalioqatigiissitat isumaliutigissagaat.
• Nutserisunik eqqartuussivimmi nutserinermik siumut ilisimasaqanngitsunik ilinniartitseqqinnermik Kalaallit Nunaanni Eqqartuussivik pilersitsissasoq.