Nunap inoqqaavisa pisinnaatitaaffii pillugit Naalagaaffiit Peqatigiit immikkut nalunaaruteqartartua Danmarkimut aamma Kalaallit Nunaannut tikeraarnermi kingorna ukioq manna februaarimi sakkortuumik isornartorsiuimmat, annertuumik uippalliutigineqarpoq.

Immikkut nalunaaruteqartartup Cali Tzayip nalunaarusiani naammassisoq Naalagaaffiit Peqatigiit Inuit Pisinnaatitaaffii pillugit Siunnersuisoqatigiivinut sisamanngornermi Genevemi saqqummiuppaa, tassani Danmarkip aamma Kalaallit Nunaata, nalunaaruteqartartup isornartorsiuineranut Danmarkip oqaaseqarnissamut piffissarititaa avippaat.

Isornartorsiuineq annertuvoq, ilaatigullu aamma inuiaqatigiinnut inunnut aaqqissuussaanikkut ammip qalipaataanik tunngaveqartumik immikkoortitsinermut kiisalu Danmarkimi Kalaallit Nunaannilu inuit inuiaqatigiit pisinnaatitaaffiinik amigaateqartoqarneranut tunngapput.

Danskit aallartitaata illersuinermini, Danmarkip nunap inoqqaavisa pisinnaatitaaffiinut nunani tamalaani ilungersuuteqartuunera erseqqissarpaa, kiisalu pisinnaatitaaffiit pillugit suliniuteqarfinnut assersuutigalugu ICC-mut qanimut attaveqarneq oqaatigaa. Danmarkip nunap inoqqaavisa pisinnaatitaaffiinik atuutsilersitsinissamut suleqqinnissamut piareersimasoq, aallartitap aamma oqaatigaa.

Eqqaasitsissut pingaarutilik

Tove Søvndahl Gant ataatsimiinnermi Naalakkersuisut sinnerlugit peqataavoq, taassumalu nalunaaruteqartartup tikeraarnermut aamma nalunaarusiaqarnermut atatillugu ammasumik isumatusaartumillu oqaloqatigiinnermut, Danmark aamma Kalaallit Nunaat sinnerlugit qujassuteqarpoq.

- Inuit pillugit naleqquttumik aamma inuiaqatigiit naligiinnerannut qulakkeerinninnissamut tunngatillugu nalunaarusiat ilungersunartunik tikkuartuivoq, tassani Danmarkimi imaluunniit Kalaallit Nunaanni najugaqarnerat apeqqutaanani, Tove Søvndahl Gant ilaatigut taama oqarpoq.

Nunap inoqqaavisa pisinnaatitaaffii nunani Kalaallit Nunaattut ittuni, namminersorfiusuni oqallittoqarnissaanik misissueqqissaartoqarnissaanillu pisariaqartitsisoqarneranut nalunaarusiaq pingaarutilimmik eqqaasitsissutaasoq, taanna nangilluni oqarpoq.

ICC, Inuit Circumpolar Council, Genevemi ataatsimiinnermut peqataavoq, nalunaarusiallu saqqummiunneqarneranut atatillugu oqaaseqartinneqarpoq.

Tunngaviusumik allaanerusumik periuseqarnissamut kaammattuisut

ICC-mi siulittaasoq Sara Olsvig, nalunaaruteqartartumit nalunaarusiami Kalaallit Nunaanni aamma Danmarkimi pitsanngoriaatissatut innersuussutit ersarissut nuannaarutigalugit, Sermitsiaq.AG-mut oqarpoq.

- Immikkut nalunaaruteqartartup nalunaarusiaata Kalaallit Nunaanni, aamma kalaallinut Danmarkimi najugaqartunut inuit pisinnaatitaaffiinut tunngatillugu ilungersunartut amerlasuut pisariaqartinneqartut qulaarpai.

- Kalaallit Nunaata aamma Danmarkip nunap inoqqaavisa pisinnaatitaaffii pillugit nalunaarutip, aamma ILO-p aalajangersagaani 169-p naammassinissaannut ersarissumik ukkatarinninnera pingaartumik nuannaarutigaarput. Oqalugiarnitsinni kalaallit danskillu naalakkersuisuisa nunap inoqqaavisa pisinnaatitaaffiisa atuutsinneqarnerinut tunngaviusumik periutsiminnik allanngortitsinissaat kaammattuutigaarput, Sara Olsvig oqarpoq.

Maanna sulianut ingerlasunut tunngatillugu, soorlu spiralilersuisoqarsimanerani, taanna pillugu qulaajaanermi Kalaallit Nunaata peqqinnissaqarfimmik akisussaaffiginnilersimaneranut ukiut qulaajarneqartut annertusineqassasut, nalunaaruteqartartup inassuteqaatigaa.

Qulaajaaneq annertusineqartariaqarpoq

Kiisalu qulaajaaneq inuit pisinnaatitaaffiinik ersarissumik tunngaveqarnissaa inassutigineqarpoq. Inassuteqaat ICC-p, Inuit Pisinnaatitaaffii pillugit Siunnersuisoqatigiit aamma MIO-p inassuteqaatigaat.

- Qulaajaanerni taakkunani maanna ingerlanneqartuni inuit pisinnaatitaaffiisa atuutsinneqarnissaannik qulakkeerinninnissaq pingaaruteqarluinnarpoq. Qulaajaanerit ilusilersorneqarnerini inuit pineqartut tunngaviunissaat, aamma peqataatinneqarnissaat ilaatigut isumaqarpoq.

- Spiralilersuisimaneq pillugu qulaajaanermut tunngatillugu assersuutigalugu ilaqutaasut ilanngunneqartariaqarput, soorlu arnat arlallit tamanna innersuussutigaat, aamma qulaajaanermi piffissaq pineqartoq annertusineqariaqarpoq, inuit sunnerneqartut tamarmik ilanngunneqarniassammata, Sara Olsvig oqarpoq.