piitsuuneq
Nalunaarusiaq: Imminut pilersornerup pisuut iluaqusertarpai
Piniarnerup nunatsinni naligiinnginneq minnerulersittuaannanngilaa, kisianni piitsuunerpaat ilaannut naammattusaarutaasarpoq
Aningaasaqarnikkut naligiinngissuseq nalilerniaraanni, taava ilaqutariit pisaat ilanngullugit naatsorsorneqartariaqarput. Imminut pilersornikkut aningaasaqarneq nunatsinni ilaqutariinnut amerlanerussuteqartunut ilaavoq.
Kisianni pisat ilanngukkaanni naligiinngissutsip millisarnera qularnaatsuunngilaq, piitsuussuseq pillugu nalunaarusiaq naqissusiivoq.
- Siusinnerusukkut nalilerneqartarpoq imminut pilersornikkut inuuniuteqarneq naligiinngissutsip annikillisarnissaanut sunniuteqarluartartoq, pingaartumik illoqarfiit nunaqarfiillu akornanni. Taamaattoq pingaaruteqarpoq eqqaassallugu, Akileraartarnermut Atugarissaarnermullu Ataatsimiititaliap nalunaarusiamini allammagu, isertitakinnerusut tamatigut tassaasanngitsut imminut pilersornikkut inuuniuteqarnermik iluaquteqarnerpaasartut, nalunaarusiami oqaatigineqarpoq, taanna Isumaginninnermut Naalakkersuisoqarfimmit suliarineqarpoq.
Aamma atuaruk: Nalunaarusiami piitsuussuseq sammineqartoq
- Imminut pilersornermik inuuniuteqarnerup iluaqutissartaata pingaarnersaanik pisartutut nalilerneqarput tassaasut innuttaasut illoqarfimmiut annertungaatsiartunik isertitallit, taamaalillunilu innuttaasut isertitaqqortunerpaat akornanni pisortatigoortuunngitsumik aningaasarsiorneq isertitanik annertusaasuulluni.
Piniarnermik inuussuteqartut
Nunaqarfinni piitsuunerpaanut amerlasuunut piniarneq annertuumik pingaaruteqarpoq. Tamannami annertuumik inuussutigaat.
- Kisianni piitsuulluinnarnerup paasinissaanut, imminut pilersornikkut inuuniuteqarneq aningaasaqarniarnermut ilaqutariinnut isertitakinnerusunut pingaaruteqarnerusumik inissisimavoq, ilimanarpormi tamanna ilaqutariippassuit – annermik Avannaani nunaqarfinni – aningaasanik isertitakittaraluaqalutik ingerlalluarsinnaasarnerannut pissutaasoq, nalunaarusiami oqaatigineqarpoq.
Atortussanut akissaqartut
Kisianni naleqarnermut tunngatillugu, isertitakkaanerusut annertuumik pisaqarnissaminnut periarfissagissaarnerusarput.
- Taamaalilluni innuttaasut qaffasissunik atorsinnaasaminnik isertitallit piniutinut aningaasalersuinissaminnut periarfissarissaarnerupput, soorlu umiatsianut, snescooterinut, aallaasinut nutaalianut il.il., taamaalillutillu imminut pilersornikkut inuuniuteqarneq iluaqutiginerusinnaasarlugu.
Kisianni manna tikillugu imminut pilersornermik inuuniuteqarnerup nunatsinni naligiinnginneq qanoq sunnertarneraa naatsorsorneqarsinnaasimanngilaq. Kisianni siornatigut misissuinermi oqaatigineqarpoq, innuttaasut inersimasut 36 procentiisa inuussutigisartagaasa affaasa sinneri tassaasut nammineq pisat, taamaallaallu innuttaasut sisamararterutaat namminneq pisaminnik inuussuteqartanngitsut.