Nalunaarusiap nutaap kisitsisit nalunaarsorneqanngitsut qulaajarniarpai
Kinguaassiutitigut kanngunarsaanerit nalunaarutigineqanngikkaangata, Nunatsinni Politiit nalunaarusiami nutaami inuit susassaqartullu suut aporfigisarneraat qulaajarniarpaat. Nalunaarusiami innersuussutit qulingiluat ilanngunneqarput, kanngunarsaanerit amerlanerusut nalunaarutigisalerniassammatigit.
Kinguaassiutitigut kanngunarsarneqartut pisup politiinut nalunaarutigineqartannginneranut suut pissutaappat? Sooruna kanngunarsaaneq ilaqutaasunit nalunaarutigineqarneq ajortoq?
Apeqqutit tamakku allallu Nunatsinni Politiit qulaajarniarsaraa, nalunaarusiamilu qulingiluanik innersuussuusiorlutik, “Nalunaarutiginninnernut aporfiit pillugit nalunaarusiaq” ullumi ataasinngornermi 18. Januar saqqummiunneqassaaq.
Kinguaassiutitigut kanngunarsaanerit nalunaarutigineqanngikkaangata suut aporfiusarnersut pillugit, susassaqartut 100-t Kujataaneersut Qaanaameersullu apersorneqarput.
Kujataani Qaanaamilu politiit piffissami 2017-2019-imi meeqqat inuusuttullu pillugit kinguaassiutitigut kanngunarsaanernut nalunaarutinik 115-inik pissarsipput. Nalunaarusiaq sulianik taakkunannga aallaaveqarpoq.
Ilisimasat amigaataanerat aporfiuvoq
Qaqugukkut kinguaassiutitigut kanngunarsaasoqartarnera, innuttaasut susassaqartullu akornanni ilaatigut nalornissutigineqartarpoq.
- Imatut oqaatigissavara. Kinguaassiutitigut kanngunarsaasoqarnersoq nalornissutigigukku, taava politiit attaveqarfigikkit, vicepolitiinspektør Viggo Johansen oqarpoq.
Ilisimasanik amigaateqarneq, pisuusutut misigineq, kanngusunneq kiisalu inummik tatigisamik oqaloqatissaaleqineq, meeqqamut kinguaassiutitigut kanngunarsaanermik nalunaarutiginninnginnermut aporfiit ilagaat.
Ilaqutaasunut susassaqartunullu kinguaassiutitigut kanngunarsaanermut takussutissanik ilisimasakinnermut tunnganeruvoq.
Innuttaasut ilaat kanngunarsaanermik nalunaaruteqaraangamik politiinit pimoorunneqanngitsutut misigisartut, nunaqarfimmilu innuttaasut politiit takussaanngingajattutut misigisut, Nunatsinni Politiit paasivaat.
Innersuussutit
Nalunaarusiaq qulingiluanik innersuussuteqarpoq. Innersuussutit ilarpassui Nunatsinni Politiit erngertumik aallartissinnaavaat. Innersuussutit ilaat aallartinneqannginnerminni suliniuteqalaarnissamik pisariaqartitsipput, sinnerilu politiinit suliarilerneqannginnerminni annerusumik suliniuteqarnissamik immaqalu inatsimmik allannguinermik pisariaqartitsipput.
Nunatsinni Politiit aporfiit sorliit iliuuseqarfigissaneraat, Sermitsiaq.AG-p vicepolitiinspektørimut apeqqutigai, taamaalillunilu amerlanerusut kinguaassiutitigut kanngunarsaanerit nalunaarutigisalerniassammatigit.
Viggo Johansenip iliuusissat pingasut taakkartorpai:
Meeqqat inuusuttunullu atuartitseriaaseq ilaatigut kinguaassiutitigut kanngunarsaanernut paasititsiniaanermik ukkataqartoq ineriartortinneqassaaq.
Nalunaaruteqarnermi misigisaq pitsanngorsarneqassaaq. Politiit periutsinik nutaanik ineriartortitsipput, taamaalilluni nalunaarutiginnittoq ikiorneqarnissaminut saaffissanik periarfissinneqassalluni.
- Siunissami nunaqarfinnut angalasarnerit amerlanerusut pilersaarusiorneqassapput, taamaalilluni politiit aamma nunaqarfinni takussaanerulissammata.