Nalunaarasuartaatitigut kiffartuussinermi atuineq ammanerulersinneqaqqissanngilaq.

Inatsisartunimi amerlanerussuteqarluartut inatsimmik Tele-Postip oqarasuaatit attaveqaataannik kisermaassiinnarnissaanik kinguneqartussamik akuersiniarput.

- Naalakkersuisut isumaat malillugu nalunaarasuartaateqarnermi attaveqaatit kisermaassiviussapput, inatsimmut nassuiaatini tamanna allaqqavoq.

Ammanerulersitsineq unitsinneqartoq
2006-imi Naalakkersuisut ammanerulersitsinissamik aallartitsigaluarput. 2009-mi internet kabelinik aqquteqanngitsoq ammanerulersinneqarpoq, 2015-imilu kabelikkut interneti malinnaatinneqarpoq. Oqarasuaatinut angallattakkanut attaveqaatit pilersaarutit malillugit tullinnguunneqaraluarput. Kisianni 2016-mi upernaakkut ataatsimiinnermi Inatsisartut tamanna unitsippaat.

Inatsisitigut sinaakkutissat
Aalajangiineq tamanna Naalakkersuisut maanna nalunaarasuartaatinut inatsimmik malitseqartippaat.

- Sinaakkutissatut inatsit akuersissummik pigisaqartup oqarasuaatinut mobiltelefoninullu nalunaarasuartaateqarnermi sullissinerni kisermaassinerata ingerlaannarnissaanik politikkikkut kissaateqarnerup attanneqaannarnissaanik ajornarunnaarsitsissaaq, nassuiaatini tamanna allaqqavoq.

Tassani inatsisit sinaakkutaat pineqartillugu kisermaassineq piffissamut qaqugorsuarmut taamaattussaatitaanngilaq.

- Tamatuma peqatigisaanik sinaakkutissatut inatsit eqaassutsimik, niuerfimmik, teknologiit ineriartornerat peqqutigalugu allanngorartuartoq naammassiniarlugu pisariaqartinneqartumik pilersitsissaaq, ilanngullugu allaqqavoq.

Naalakkersuisoqatigiit partiit pingasuusut siunnersuut taperserpaat. Demokraatit aamma attaviitsoq Michael Rosing kisimik akerliupput.

Aamma atuakkit:

Telep kisermaassinera inatsisitigut atuutsinneqalissaaq