Nalunaaquttap-akunnermusiallit mattusimanermi ajornartorsiulersartut

SIK-mi ilaasortat nalunaaquttap-akunnermusiallit tuniluuttoqarnera siammatsaaliorniarlugu angerlarsimaannartariaqartut amerlasuutigut ullut mattusimaffitik namminneq akilertariaqartarpaat. Ilaasortat kommuninit ikiorserneqarnissamut qinnuteqarsinnaasut, SIK-mit ilisimatitsissutigineqarpoq.

Tuniluuttoqarnera siammatsaaliorniarlugu nalunaaquttap-akunnermusiallit angerlarsimaannartinneqartut aningaasaqarnikkut ajornartorsiulersarput. Innuttaasullu amerlaqisut piffissami kingullermi coronamut misissortinnissamik tungaanut aamma tunillatsissimannginnermut uppernarsaammik takutitsisinnaalernissaminnut angerlarsimaannaqquneqarsimapput. SIK-mit tamanna napparsimanermut sanillersuunneqarsinnaasoq isumaqartoqarpoq.

Aalajangersimasumik suliffilippassuarnut ulluni tallimani/arfineq-marlunni angerlarsimaannartitaaneq aningaasarsiatigut kinguneqarneq ajorpoq, tassa covid-19-imik tunillatsissimasumut qanillisimanertik pissutigalugu angerlarsimaannartinneqartunut. Nalunaaquttap-akunnermusiallilli ilaannut angerlarsimaannarnermi nalunaaquttap-akunneri atorneqartut akisusarput.

- SIK ilaasortat angerlarsimaqquneqarsimasut ilaannit saaffigineqartarsimavoq, SIK-millu siunnersuutigineqartarsimavoq, angerlarsimaannarnerup nalaani nalinginnaasumik aningaasarsiaqartinneqarnissaq piumasarineqartassasoq, SIK-p allattoqarfiani pisortaq Bjarne Petersen Sermitsiaq.AG-mut oqarpoq.

Napparsimanermut assingusoq

SIK-mit oqaatigineqarpoq, assersuutigalugu tunillatsissimasumut qanillisimaneq pissutigalugu oqartussat angerlarsimaannaqqusitillugit – qaammammusiallit nalunaaquttap-akunnermusiallillu pineqartillugit, angerlarsimaannartitaaneq napparsimanermi aningaasarsiaqartinneqartarnermut attuumatinneqartassasoq.

- Sulisut angerlarsimaannarnerminni aningaasarsiaqartussaapput. SIK-mit isumaqarpugut, angerlarsimaannarneq napparsimanermut assingusoq, napparsimallunimi angerlarsimaneq malittarisassanik unioqqutitsinerunngimmat, SIK-p allattoqarfiani pisortaq Bjarne Petersen Sermitsiaq.AG-mut oqarpoq.

Taassuma ilisimatitsissutigaa, nalunaaquttap-akunnermusiallit napparsimatillugit qanoq aningaasarsiaqartinneqarnissaannut isumaqatigiissummiit isumaqatigiissummut assigiinngissuteqartoqartoq. Assersuutigalugu Namminersorlutik Oqartussani/kommunini nalunaaquttap-akunnermusiaqarluni sulisoq napparsimanermini 102 koruuninik ullormusiaqartinneqartarpoq.

Piumasaqaateqarsinnaanngitsut

SIK-mit nassuerutigineqarpoq, sulisitsisut taarsiissuteqarnissaannik piumasaqaateqarsinnaanatik, ilaannikkooriarlutillu ilaasortat aningaasatigut ikiorserneqassappata sinnersortarsimavaat kommunimut attaveqaqqullugit.

Sulisup ataatsip Danmarkimi sulinngiffeqarnissani nammineq aalajangersimallugu ajornartorsiulernera allaavoq. Sulisartut kattuffianit tunngaviatigut isumaqarput, akiuussutissalertissimanngitsut ulluni tallimani angerlarsimaannarneranni aningaasarsiaqartinneqassanersut sulisitsisut namminneq aalajangertussaagaat.

Powered by Labrador CMS