Skip to main content

Nalunaaquttap akunnerisa marluk ingerlanerinnaanni Avgo biilersinnaanermut allagartartaarpoq

Kalaallit Danmarkimi najugaqartut nalunaaquttap akunnerini marlunni biilernermut ilinniartitsisumit ilinniartinneqareerlutik allagartartaartik atorsinnaanngorpaat

Kalaallit Nunaanni biilersinnaanermut allagartat ajornannginnerusumik Danmarkimi atorneqarsinnaalerput. Septembarip aallaqqaataa aallarnerfigalugu kalaallit Danmarkimi najugaqavissut, nunami angalasarniarunik biilersinnaanermut misilitsittariaarupput.

Siusinnerusukkut Danmarkimi qaammatit pingasut najugaqareersimagaanni danskit biilersinnaanermut allagartaannik pissarsiniarluni misilitsittoqartarpoq, maannali nalunaaquttap akunneri marluinnaat tamatumunnga atorneqarsinnaalerput. Kalaallit taamaalillutik kalaallisut biilersinnaanermut allagartatik biilersinnaanermullu ilinniartitsisup uppernarsaataa aaqqataasivimmiitillugit nunaannarmi biilersinnaanngorput.

Avgo Otto Sørensen, apriilip aallaqqaataani Horsensimut nuussimasoq, malittarisassanik nutaanik taakkunannga siullernut ilaalluni atuisinnaanngorpoq.

- Malittarisassat takku nutaat atuutsinneqangajalernerat pissutigalugu, allagartartaarniarnera kommunimit kinguartinneqarsimavoq. Septembarip sisamaani biilersinnaanermut ilinniarfimmut sianerpunga, aqanguanilu piffissamik tunisillunga. Taamaalillunga 70-inik ukioqalernissama tungaanut kalaallisut biilersinnaanermut allagartara Danmarkimi atorsinnaanngorpara.

Biilertartutut misilittalik

Avgo Otto Sørensenip malittarisassat nutaat nuannaarutigai, biilertartutummi misilittagaqartuugami:

- Ukiorpassuarni Aasianni taxartartuusimavunga, sulinngiffeqarlutalu Danmarkimiikkaangatta biilinik tamatigut attartortarsimavugut, tassa illoqarfissuarni aamma danskit tyskillu motorvejiini biilertarsimavunga.

- Nalunaarummi nutaami allassimavoq, nalunaaquttap akunnerini marlunni biilernik ilinniartitsisumik peqateqarnikkut qulakkeerneqassasoq, kalaallit biilertartut illoqarfinni angallaffioqisuni, nunaannarni motorvejinilu biilersinnaalernissaat, Horsensimi 1.Drivemi biilernermik ilinniarfimmi ilinniartitsisoq John Møller oqaluttuarpoq, taassuma malittarisassat nutaat atuutsinneqalernerannit sapaatip akunneri marluk ingerlariiginnartut, kalaallit pingasut kalaallisut biilersinnaanermut allagartaminnik Danmarkimi atuisinnaanngortissimavai.

Biilersinnaanermik ilinniartitsisup nalunaaquttap akunnerini marlunni ilinniartitsereernermini allagartaq, kalaallit biilertartut biilersinnaanermut allagartaminnut ilanngullugu nassaartagassaat atsiussavaa.

Malittarisassat nutaat taakku aatsaat atuuttassapput kalaallisut biilersinnaanermut allagartamik atuiniaraanni. Biilersinnaanermut allagartaq danskit biilersinnaanermut allagartaannik taarserusukkaanni biilersinnaanermut suli misilitsittoqartassaaq.

Folketingimi ilaasortaq isumaluttoq

Tamatuma folketingimi ilaasortaq, Aaja Chemnitz Larsen (IA) isumalutsilerpaa.

- Kalaallit Danmarkimi biilersinnaanerat ajornannginnerulerpoq, kalaallilli savalimmiormiutulli pisinnaatitaaffeqarnissaat naligiimmillu pineqartarnissaat qulakkeerneqanngilaq. Savalimmiormiut Danmarkimiittut biilersinnaanermut ilinniartinneqanngikkaluarlutik misilitseqqaanngikkaluarlutilluunniit biilersinnaanermut allagartatik danskit biilersinnaanermut allagartaannik taarsertissinnaavaat. Sooq taamatut assigiinngissitsisoqassava? Aaja Chemnitz Larsen aperivoq. Apeqqut tamanna danskit angallannermut ministerertaavannut Benny Engelbrechtimut (S) qaqinniarpaa.

               

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER