Nalornineq pissutigalugu inuusuttut uterneq ajorput
Kalaallit ilinniarsimasut ilinniakkaminnik naammassinnikkaangamik Danmarkimiiginnartarput. Apeqqutaaginnarpoq qanoq angerlartinneqarsinnaanersut.
Kalaallit Nunaanni innuttaasut ikiliartorput. Inuusuttut nuuttartut uteqqinngitsoortartullu ilaatigut tamassumunnga pissutaapput.
Suliffissaqarluarpoq, ilinniagaqarluarsimagaannilu nunatsinni atorfigissaarluartoqalersinnaavoq. Taamaakkaluartoq inuusuttut ilinniakkaminnik naammassinnikkaangamik ilarpassui Danmarkimiiginnassallutik aalajangertarput.
- Illuatungaani oqimaaloquteqartutut isigineqartariaqarpoq. Assigiinngitsut pillugit nalornineq pissutaasoraara, Birger Poppel, Ilisimatusarfimmi inuiaqatigiilerisoq oqarpoq.
Birger Poppel malillugu nunatsinni ilaqutariit periarfissaat pillugit ilaatigut nalorninartoqartarpoq.
Ilaqutaasut malinnaasarput
Aappartaarsimagaanni immaqalu meerartaarsimagaanni, Kalaallit Nunaannut nooqqinnissamut tunngatillugu pilersaarusiungassarpassuusarput.
- Ilaqutariit eqqumaffiginerusariaqarpagut. Kisermaajuinnanngillat suliassaqartariaqartut ineqartariaqartullu. Ilaqutariiupput. Ilaqutariinnut pilerinarsaasariaqarpugut kalaallit inuusuttut angerlaqqitsinniassagutsigit, Birger Poppel oqarpoq.
Meeqqat atuarfiat pitsanngorsagassatut ilaatigut tikkuarpaa, aammali atuarfiit iluatsilluartut ersarissarneqarnissaat pisariaqarsoralugu.
Ilaqutariit nunanut allanut nuunnginnerminni arlalinnik qularnaangassaqartarput. Birger Poppel malillugu, tamanna pissutigalugu sulisitsisut ilaat tunniutiinnareertarput.
- Ilaatigut eqqarsartarpunga sulisitsisut isumaqarsimassasut qallunaamik kisermaamik, piffissap ilaani sulisussaminnik, nassaarnissaq ajornannginnerusoq, Birger Poppel oqarpoq.
Attaveqarneq attatiinnarsiuk
Inuusuttut Danmarkimi ilinniagaqartut ilinniareernermik kingorna nunatsinnut angerlaqqinnissaat anguniarlugu, ilinniarnerisa nalaanni attaveqarnerup pitsaanerulersinneqarnissaa, taassuma aamma pisariaqarsoraa.
- Isumaqarpunga kalaallit Danmarkimi ilinniagaqartut qanimut attavigineqarnerisigut, amerlanerusut angerlarnissaannik kinguneqassasoq. Suliffiit pillugit nittarsaassisoqartareerpoq, isumaqarpungali suli pitsaanerusumik iliorsinnaasugut, Birger Poppel oqarpoq.
Taassuma erseqqissarpaa peqqinnissaqarfiup iluani inuusuttunik Danmarkimi ilinniartunik attaveqartarneq pitsaanerulereersimasoq, tamassumalu kinguneringaa amerlanerusut ilinniakkaminnik naammassinnikkaangamik angerlartartut.