Nuna sajuttoq
Nalorninartup annernartua oqaluffimmi nipaallisarpaa
Siumumi politikeri Ineqi Kielsen ikinngutiginerpaasami annaasimagunakkani pillugu aliasunnini nipaallisarniarlugu naalagiartariaqarsimavoq, qatanngut, ilitsersuisoq, aappanilu aamma meeraat ataatsimik ukiulik Nuugaatsiami ajunaarsimanissaat aarlerigineqarpoq.
Nuugaatsiami inuit sisamat toqusimanissaat aarlerigineqarpoq
- Maanna tupinnartuliaqarnissaa uppernarpallaarunnaarpoq, Ineqi Kielsen Hans Egedep oqaluffiani naalagiareernerup kingorna, malunnartumik sunnertisimasoq Sermitsiaq.AG-mut oqaluttuarpoq.
Unnuaq sianerfigineqartoq
Taanna unnuaq Uummannami ikinngutiminit qaqqap qaavani ulorianartorsiorfiunngitsumiittumit sianerfigineqarpoq.
- Qatanngutitut isigisara mallit nunaqarfimmut apuummata illuminit anilluni qaqqamukarnissani angumerisimanngikkaa taassuminnga paasivara, Ineqi Kielsen oqaluttuarpoq, taanna sianerfigineqarnermi kingorna sinippiarsimanngilaq.
Annaasaqarnermut aarlerinerup 23-nik ukiulik politikeri Inatsisartunut ilaasortaq qanoq sunnersimaneraa, isaasa aappaluttuinnaasut ersarissumik takutippaat.
Aamma atuaruk: Nuugaatsiami inuit sisamat toqusimanissaat aarlerigineqarpoq
- Kujataaninngaanneerpunga, kisianni kisima Nuummi najugaqarpunga. Unnuap ingerlanerani ikinngutinnik annaasaqarsimanerlunga paasiniarlugu amerlasuut oqaloqatigisaqattaarpakka, Ineqi Kielsen nassuiaavoq, taanna arfininngornermi unnuakkut nunap sajunnerata kingunerisaanik tassanngaannaq kalaalerpassuit eqqugaasut ilagaat.
Eqqarsaatigiinnavikkaa
- Ullut pingasut matuma siorna oqaloqatigaara. Ernerat eqqarsaatigiinnavippara, Siumumi politikeri, taakku Nuugaatsiami ilaqutariinnguit qinnukkiartorniarlugit naalagiarsimasoq oqarpoq.
Video takuuk: Video: Tassaarsuup eqqugaa
Nuummi qulisimalluni siallilernerani oqaluffimmi palasi tussiutillu tusaanerini misigisaq Ineqi Kielsenimut qullilinarsimavoq. Politikeri atisarissaartuaannartoq qernertumik qarlitalimmik kavaajaqarpoq, qernertunik skooqarluni, qernertunillu ilulleqarluni aamma alerseqarluni. Aliasunnera ersarippoq.
Palasi maqaasineqartunut qinnussivoq
Nuugaatsiami maqaasineqartunut aamma ilaqutariinnut Ilulissaniittunut umiatsiaaqqap ajutoornerani nukappiaqqap annattutuaaffigisaanut, palasip naalagiartoqarnerani naalagianut qinnussisoqarnissaannik qinnuiginnippoq.
Kalaallit Nunaanni pisut marluk alianarluinnartut pereersut aqaguani inuit 60 naalagiariarput, tamannalu qimagussorneqartunut maqaasineqartunullu ilaqutaasunut, ikinngutaasunut aamma ilisarisimasaannut aliasutsitsivoq.