Naliliisoq: Qulleq ataannassappat politikkikkut sullarissoqartariaqarpoq
Partiit nutaat qinersisartunit qinerneqarluartuassagunik sullarinneq uteriinnerlu pisariaqartinneqarput. Politikkikkut anguniagaq namminiilivinnissaq naalagaaffinngornissarlu nutaajunngilaq, politikkikkut naliliisoq oqarpoq.
Siumumi Naleqqamilu ilaasortaasimasoq Henrik Fleischer partiimik nutaamik, Qulleq-mik, pilersitseqataavoq, nunattalu naalagaaffinngornissaa, aalisarnerup aaqqissuuteqqinnissaa tunngaviusumillu inatsiseqalernissarput pingaarnertut suliarissallugit oqariartuuteqarpoq.
Partii Qulleq nunatsinni arlalinnik immikkoortortaqalissalluni suliaqarpoq, ukiullu marluk qaangiuppata Inatsisartunut kommuninullu qinigassanngortitaqarnissaq siunertaralugu.
Politikkikkut anguniagaq kajungernartoq
Aalisarneq, nunanik allanik niueqateqarneq pingaartumillu naalagaaffinngornissaq, partiit allat aamma anguniagarivaat, anguniakkatullu kajungerineqarluartarpoq, AG-mi aaqqissuisuuneq politikkikkullu naliliisoq, Christian Schultz-Lorentzen oqarpoq.
Nunatsinni politikkip oqaluttuassartaa nutaajuneq qissimissagaanni, partiit nutaajunerusut ataannarnissaminnut ilungersorluinnartariaqartarput. Alutorineqareernerup kingorna unittoorsinnaaneq, Qulliup aamma sillimaffigisariaqaraa, naliliisoqarpoq:
- Partii Inuit aamma Nunatta Qitornai taamaalisut takuagut. Inatsisartunit qinigaaffinni ataasiakkaani qinigaatitaqarput, qinersisartuniilli qinerneqartarneri ikileriartarlutik. Partiit taakku aamma naalagaaffinngornissamik namminiilivinnissamillu ersarilluinnartumik oqariartuuteqartuupput, aaqqissuisuuneq politikkikkullu naliliisoq Christian Schultz-Lorentzen oqarpoq.
Naalagaaffinngornissamik anguniagaqarneq Qulliup kisimi isumarinngilaa, partiillu minnerit pilersartut qinerneqanngitsoortartulli kisimik aamma taama isumaqanngillat.
Qaangiutiaartut – imaluunniit?
Apeqqut Inuit Ataqatigiit, Siumut aamma Naleraq aamma soqutigisarilluinnarpaa, qanoq sukkatigisumik qanorlu sulinikkut, tamanna assigiinngissinnaasarluni.
- Danmarkimut atajunnaarnissaq politikkikkut isuma kajungerineqarluartuuvoq. Henrik Fleischer politikkikkut suliniumminik iluatsilluassaguni politikkimi sullarissuulluinnartariaqarpoq partiinilu nittarsaalluarsinnaasariaqarlugu, Christian Schultz-Lorentzen naliliivoq.
Oqaluttuarisaanerup takutippaa partiit pileqqaarnerini alutorineqariarlutik qinersisartuminnik annaasaqalersartut. Partiilli ilaat nutaajugaluarlutik ilaasortaatitamikkut amerliartuinnalersinnaasarput. Soorlu Demokraatit aamma Naleraq, 2002-mi aamma 2014-imi pilersinneqartut.
- Ukiuni 20-ni kingullerni partiit nutaat arlallit puiguunnarneqartarput, imaluunniit Suleqatigiissitsisutut tunuarsimaarnerusarlutik. Kisianni tassunga killittariaqanngilagut. Qullerli ataannassaguni politikkikkut sullarissutsimik takutitsisariaqarpoq. Oqaluttuarisaanerup tamanna takutippaa, Christian Schultz-Lorentzen oqarpoq.