Naliliisartut: Maajip 26-anni qinersisoqarniarpasippoq

Maajip 26-at folketingimut qinersisoqarnissaanut eqqoriagassani piukkunnarnerpaavoq.

Politikkikkut naliliisartoq Hans Engell taama naliliivoq.

Qinersisoqannginnerani politikkikkut isumaqatigiissut anneq isumaqatigiissutaasinnaasoq tassaavoq, utoqqarnut siusinaartumik soraarnerussutisiaqartarneq, tamatumalu kingorna ministeriuneq Lars Løkke Rasmussen (V) allamik peqassanngilaq, Engell taama isumaqarpoq.

- Qinersinissamut nalunaaruteqarneq 2. aamma 5. maj akornanni pisinnaavoq. Løkke allanik periarfissaqarpallaanngilaq, Engell oqarpoq.

Maajip 26-anni Europap inatsisartuinut qinersisoqartussaareerpoq. Taamaalilluni ulloq taanna marlunnik qinersisoqarsinnaassalluni. Folketingimut qinersineq maajip 26-anni pissappat, siullermeerluni sapaammi qinersisoqassaaq.

Avisen Danmarkip politikkikkut aaqqissuisua, Thomas Funding, folketingimut qinersisoqarnissaanut maajip 26-at piukkunnarnersaasoq isumaqarpoq. Kisianni partiit talerperliit isumasiunermi maannakkumit pitsaanerussappata aatsaat, tassami amerlanerussuteqarnissartik annaasinnaammassuk.

- Løkke kinguaattooqqasorujussuuvoq. Isumasiuneq sorleq isiginerlugu apeqqutaalluni, partiit saamerliit 54 procentinik pissarsissangatinneqarput, partiit talerperliillu 46 procentinik.

- Taamaattumik qinersinermi ajorsarnissaat ilimanaateqartorujussuuvoq. Uuttuinerit maajip aallaqqaataata missaani Løkkemut pitsanngorianngippata, kinguarteqqinnissaa isumaliutersuutigisariaqarpaa.

Helle Ibip, Børsenimi politikkikkut naliliisartup aamma maajip 26-at toqqarpaa. Kisianni kingusinnerpaamik piffissaliunneqartoq Løkkep utaqqeqqaarniarneraa taassuma nalornissutigaa. Folketingimut qinersinissaq kingusinnerpaamik juunip 17-anni pissaaq