Skip to main content

Naliliisartoq Peter Olsenip tunuarnera pillugu: Nersornaatinik agguaaneq naammanngilaq

Peter Olsen (IA) maanna naalakkersuisuusimasunngortoq, KNR-imi tusagassiortunik amigaateqartoqarneranik suliami kukkorujussuarpoq, politikkikkut naliliisartoq aamma aaqqissuisuuneq taama oqarpoq.

Peter Olsen marlunngornermi KNR-ip tusagassiortunik atorfinitsitsiniarnermi ajornartorsiornera pillugu oqallinnermut atatillugu Naalakkersuisunit tunuarpoq.

Politikkikkut naliliisartup aamma aviisimi AG-mi aaqqissuisuunerup, Christian Schultz-Lorentzenip, suliap taama kinguneqarnera tupaallaatiginngilaa:

LÆS OGSÅ: Peter Olsen tatiginnikkunnaartoqareersorlu tunuarpoq

- Peter Olsenip tunuarnera tupiginngilara, tassami KNR-ip tusagassiortunik sulisussarsiornermini ajornartorsiuteqarneranik pisoq ajorluinnartumik ingerlappaa. Suliami ingerlasoqarneranik malunnartoqarnikuunngilaq, naak KNR-ip tungaanit sivisuumik aarlerisaaruteqartoqaraluartoq.

- Nersornaatinik agguaaneq aamma piuminartunillu nalliuttorsiortitsinerit naammanngillat, aamma suliat ilungersunartut iliuuseqarfigineqarsinnaasariaqarput. Tusagassiorfiit tamat oqartussaaqataanerisa atuutsinneqarneranni pingaarutillit ilanngullugit. Aaqqissuussaaneq taanna ilaatigut atorunnaarsimavoq, tusagassiortunik amigaateqarneq pissutaalluni. Pingaartumik marlunnik oqaaseqartut, kisianni aamma ataatsimut isigalugit, Christian Schultz-Lorentzen oqarpoq.

Tamat oqartussaaqataanerannut ajornartorsiut

Ukioq ataaseq sinnerlugu matuma siornatigut radioavisit ilaat peerneqartoq aamma nittartakkami nutaarsiassat ikilisarneqarnerannik, KNR nalunaaruteqarpoq. Kingorna naalakkersuisup suleqatigiissitanik suliaqartitsisoqarnissaanik neriorsuivoq, taakku ajornartorsiut misissortussaavaat, suleqatigiissitalli aallartissimanngillat.

Aaqqissuisuunerup Christian Schultz-Lorentzenip oqarnera naapertorlugu tusagassiortunik amigaateqarneq pimoorullugu paasiniarneqartariaqaraluarpoq:

- Ajornerpaamik pisoqassappat tusagassiorfiit pissaanilinnut isornartorsiuinissaminnut sulisui naammakkunnaassapput, taamaalillutillu tamat oqartussaanerannik atuutsitsinissamut innuttaasunut isumalluutaasinnaajunnaarlutik.

Upernaakkut ataatsimiinnermi ullut ataatsimiiffiusut naggataata tulliani naammassineq ilungersunartoq, naalakkersuisoqatigiit IA-p aamma Siumut akornanni isumaqatigiinngittoqarnerani pivoq. Naalakkersuisoqatigiilli suli atanera, aaqqissuisuunerup maluginiarpaa:

Parisimi isumaqatigiissut pillugu isumaqatigiinnginneq

- Upernaakkut ataatsimiinneq inerniliutigissagaanni, naalakkersuisoqatigiit aporaaffeqaraluarlutik ataatsimoorsinnaanermik takutitsipput. Tamatumali saniatigut oqaatigineqassaaq, upernaakkut ataatsimiinneq aningaasanut inatsisissamik upernaakkut akuerineqartussamik imaqanngilaq.

- Aningaasanummi inatsisissaq annertuumik isumaqatigiinngissutaasinnaasarpoq.

- Parisimi isumaqatigiissut pillugu isumaqatigiissuteqartoqarsinnaasimannginnera pingaartumik tupigutsannarsinnaavoq. Pingaartumik ilannguffiginiarlugu siornatigut nalunaarutigineqarnikuunera eqqarsaatigalugu. Kiisalu aamma aatsitassanut inatsisip nutarterneqarnerata kinguartinneqarnera eqqaaneqarsinnaavoq, Christian Schultz-Lorentzen oqarpoq.

Inatsisinik allanngortitsinerit nalornilersitsisut

Aatsitassanut inatsimmut tunngatillugu Kalaallit Nunaata aatsitassarsiornermik ingerlatsiffiuneranut tatiginninneq qaffasinnerpaami inissisimannginnera, taassuma ilanngullugu oqaatigaa:

- Urani pillugu inatsit ilisimasallit naapertorlugit, politikkikkut piumasaqaatinik allanngortitsisoqarsinnaanerata nalunartoqarnera, aningaasaliisartut ernumassuteqarfigaat.

- Tamatuma saniatigut ukiut arlaqanngitsut matuma siornatigut Aleqa Hammondip akitsuutinut akiliutit allanngortippai. Allannguineq nunani tamalaani aatsitassarsiornermik suliaqartunut tupaallatsitsisoq, tassa aningaasaliinernut tatiginninnerit attanneqassappata piumasaqaatit nalinginnaasumik allanngortinneqarneq ajortut tassanngaannartumik allanngortinneqarnerat pissutigalugu, aaqqissuisuuneq oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER