Greenland Express Air

Naliliinerput taamaammat allanngortipparput

Greenland Express Airip allasserngaarnerani Sermitsiaq.AG-ip naliliinerata allanngortinnera marlunnik tunngaveqarpoq

Greenland Express Airip timmisartua Fokker 100

Greenland Express Airip timmisartua Fokker-100 Aalborgip mittarfianit juunip 17-ani aallarmat Sermitsiaq.AG marlunnik ilaatitaqarpoq.

- Tassani angallasserngaarnissap nalilerneqarnissaa anguniarneqarpoq. Naliliinermili naliligassaasut nalilerneqanngitsoorput, atuartorpassuillu ilisimanngilaat allaaserineqartoq naliliinerusoq, allaaserisarmi apersuinertaqanngilaq. Taamaattumik naliliineq allaqqinneqarpoq, allaaserisaq naalineqarluni, nutaamik qulequtaqalerluni, qulequtallu nassuiaataa aamma allanngortinneqarluni, tusagassiiviup nittartakkami pisortaa Søren Duran Duus oqarpoq.

Ullormi tassani sulinnginnami aatsaat unnukkuani naliliineq allanngortippaa.

Allaaserineqartoq 'Naliliineq: Angallasserngaarneq ammut qummullu'-mik qulequtaqalerpoq, nalunaaqutaq 23.07 saqqummiunneqarluni. Siullermik ima qulequtaqaraluarpoq: 'Greenland Express: Angallasserngaarneq iluatsippallaanngitsoq', ullormi tassani nalunaaqutaq 10.11 saqqummiunneqarluni.

Allaaserineqartumi nutaami atuartunut ilisimatitsissutigineqarpoq 'Allaaserisaq naalillugu saqqummerseqqinneqarpoq' nutaami saqqummiunneqarluni. Taamaattumik allaaserisami siullermi atuartartut allataat 198-it takuneqarsinnaajunnaarlutik. Atuartartullu Sermitsiaq.AG annertuumik isornartorsiorpaat.

Sullissineq isiginiarneqartoq
Siullermi allaaserineqartut isornartorsiuinerit peersinneqarput. Taamaattumik iluatsippallaanngitsumik ingerlasimanera peerneqarpoq. Naak ilaasoqarpallaanngikkaluartoq taamaattorli ilaasut sullinneqarnerat pitsaasuusoq allaaserisami nutaami qitiutinneqarnerulluni.

Allaaserineqartumi siullermi 'timmisartuutileqatigiiffiup matungajalernera' pillugu allaaserisaq peerneqarpoq.

- Greenland Express Airimut inniminniisimagaanni suut naatsorsuutigineqassasut atuartunut nassuiaakkusussimagaluarpara, soorlu timmisartumi ilaasunut sullissineq qanoq ingerlanersoq, suut timmisartumi sassaalliutigineqarnersut, issiavii qanoq innersut kiisalu suut timmisartumi aliikkutaasinnaanersut. Naliliinermi siullermi tamakku annertunerusumik sammineqanngitsoorput. Greenland Express Airip siunissaa pillugu naliliisoqannginnissaa kissaatigigaluarpara, Søren Duran Duus oqarpoq.

Allaaserisaq nutaaq
Fagbladet Journalistenimut ataasinngormat apersorneqarpoq, ilaatigut aperineqarluni:

- Nutaamik allakkassi sooq allanngilasi: Naliliineq siulleq isornartorsiuinerput ingasappallaarnera pissutaalluni nutaamik allaaserisaqarpugut'?

- Oqaaserineqartut sakkortupput. Naliliineq ajorinngilara. Allaaserisarli siulleq peerlugu nutaamik allaaserinnittoqartoq, taamaattumik aallaqqaataaniit aallartittoqarpoq. Aamma allaaserisap qulaani takuneqarsinnaavoq, Søren Duran Duus oqarpoq.

- Naliliinerilli assigiinngitsorujussuanngorput. Angallasserngaarneq iluatsinngitsoq siullermi nalilerneqarpoq, aappaani tamanna allaaserineqanngilaq. Atuartartunut nassuiarsimasinnaanngilisiuk tamanna?

- Qanoq iliorsimanerluta paasissutissiinerusimasinnaagaluarpugut. Isornartorsiuinertaa annikillineqarpoq, tusagassioriaatsimummi tassunga tunngavissaqanngilaq. Naliliinerup aappaani susoqarpiarnerusimanersoq allaaserineqarpoq, tassa Greenland Express Airimut inniminniisimagaanni suna naatsorsuutigineqarsinnaanersoq atuarneqarsinnaalluni. Aappaani timmisartuutileqatigiiffiup siunissaa peerneqarpoq, tamannami naliliinermi peqataasussaanngimmat, Sermitsiaq.AG-ip nittartagaani pisortaq Søren Duran Duus oqarpoq.

Greenland Express Airip angallasserngaarnerani Aalborgimit aallarmat inuit 15-t ilaasorineqarput, ikitsuinnaallu Islandimit Kalaallit Nunaannut ilaasorineqarlutik.

Powered by Labrador CMS