Skip to main content

Naliliineq: USA nunatsinni amerlanerusunik sakkutooqarusuttoq

Kalaallit Nunaata Amerikamiut soqutiginnikkiartuinnarnerat atorluartariaqarpaa, mianersuaalliortoqassanngilarli, ilaatigut poitikkerit arlallit Pentagonimut pulaareernermi taamatut isumaqarput

USA-mit Kalaallit Nunaannik suleqateqarnerunissaq soqutigineqartupilussuuvoq. Nunanut Allanut tunngasutigut Ataatsimiititaliap qaammat kingulleq USA-mi politikkerinut, isummersuisunut Pentagonimullu pulaareernerisa kingorna taamatut naliliisoqarpoq.

- Kalaallit Nunaannut attaveqarnerunissamik aatsaat taamak soqutiginnittoqartigitillugu takuara, Kalaallit Nunaannut tunngatillugu oqaaseqartartoq Karsten Hønge (SF) Sermitsiaq.AG-mut oqarpoq.

Aki-Matilda Høegh-Damip (S) Aaja Chemnitz Larsenillu (IA) taamatut naliliineq isumaqatigivaat.

- Uanga qularutiginngilara, Kalaallit Nunaata inissisimaffiata pingaaruteqarnera pillugu soqutiginnittoqarnerulersoq. Tassa Amerikamiut ernumassutigivaat, Ruslandip Kinallu Issittumi peqqarniilliartuinnartumik iliuuseqarnerat, Aaja Chemnitz Larsen (IA) oqarpoq.

Illugiilluni attaveqaqatigiittarneq

Amerikami oqartussat politikkerillu Danmark akuutinngikkaluarlugu Kalaallit Nunaannut toqqaannartumik attaveqartarnissaq soqutigilluarpaat.

- Amerikamiunit kissaatigineqarpoq Kalaallit Nunaata USA-llu sutigut tamatigut atassuteqaqatigiinnerunissaat, Karsten Hønge (SF) oqarpoq.

- Ilaatigut danskit sinniisuutitaannik peqataatitaqanngikkaluarluni tikeraartoqartarsinnaavoq, taamaalilluni amerlanerusunik toqqaannartumik attaveqaateqartoqalerluni. tamanna sutigut tamatigut pisinnaavoq; Kalaallit Nunaanni Amerikamilu politikkerit attaveqaqatigiinnerulernerannit niueqatigiinnerulernermut, tassa Kalaallit Nunaat USA-lu Danmarkimi umiarsualiviit arlaat aqqutigeeqqaanngikkaluarlugu toqqaannartumik niueqatigiissinnaalerlutik. Aamma piorsarsimassutsikkut avitseqatigiittarnissaq Amerikamiunit kissaatigineqarpoq.

Mianersuaalliortoqarsinnaanera mianersoqqussutigineqarpoq

Politikkerit pingasuullutik isumaqarput, USA-p nuummi tuluttut ilinniartitsisarnissaq, Amerikap universitetiini ilinniagaqarsinnaanneq, pisorsarsimassutsikkut avitseqatigiissinnaaneq niuernikkullu attaveqaqatigiinnerusinnaaneq neqeroorutigippagit, Kalaallit Nunaannut iluaqutitaqarsinnaasut. Isumaqartoqassanngilari Kalaallit Nunaannut innuttaanullu asannileqqaartoqartoq.

- Qularutiginngilluinnarpara, nunami sumiluunniit najugaqaraluaruit namminneq soqutigisatit isumaginiarlugit arlaannik iliuuseqassasutit. Tamatuma assigiinnarpaa, Kalaallit Nunaannit oqartoqarpat, USA-mik suleqateqarnerorusuppugut niuerfissatut periarfissat pissutigalugit, Aki-Mathilda Høegh-Dam (S) oqarpoq.

Maannakkorpiaq soqutiginninneq politikkikkut Kalaallit Nunaanni sunniuteqarnerorusunnermut tunngassuteqarneruvoq; piffissarli ungasinnerusoq eqqarsaatigalugu tamanna allanngupallassinnaavoq.

- USA-p Kalaallit Nunaannut tunngatillugu sunik soqutiginninnera eqqarsaatigalugu mianersuaalliornaveersaassaagut. Imaassinnaavoq amerlanerusunik sakkutuuliinissaq pineqartoq, Aaja Chemnitz Larsen (IA) taamak isumaqarpoq.

Karsten Hønge (SF) tassunga atatillugu suli erseqqinnerusumik isumaqarpoq.

- Isumannaallisaanissaq naalagaaffiillu pillugit politikki eqqarsaatigissagaanni pissaaneqarusunneq matumani pineqarpoq. Issittumi ataasiinnaq anguniagaavoq, tassalu pissaaneqarusunneq.

- USA-p Kalaallit Nunaanni Danmarkimilu oqartussat sunniifferusuppai, taamaalillutik kingusinnerusukkut sakkutuunik amerlanerusunik Kalaallit Nunaanniititaqalernissartik anguniarlugu, taanna oqarpoq.

Oqallittoqartariaqartoq

USA-mit Pituffik annertusaaffigineqarusuppoq, Pentagonili aamma sakkutuut imarsiortut Issittumi umiarsualivissaannik ujaasivoq. Kingullermut pinqartumut tunngatillugu Kalaallit Nunaat akuutinneqarniarnersoq suli paasissutissiissutigineqanngilaq.

- Kalaallit Nunaanni isumannaallisaaneq illersornissarlu qanoq ittoq ingerlakkusunnerlutigu oqaluuserisariaqarparput. Issittumi russit sakkutooqarnikkut annertusaanerat, kiniiserit sammisaqarnerulernerat aamma USA-p sakkutooqarnikkut annertusaarusunnera ajornartorsiutaapput isummerfigisariaqakkavut, Aaja Chemnitz Larsen (IA) oqarpoq.

- Qulakkiigassarput tassaavoq, Kalaallit Nunaannut ajoqutaasussaq pinnagu, iluaqutaasussarli pillugu iliuuseqarnissarput, Aki-Matilda Høegh-Dam (S) oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER