Skip to main content

Naliliineq: Nunatta Qitornai partiitut atorunnaariaannaasoq

Aaqqissuisuuneq isumaqarpoq, qinersisoqarnerani taaguunneqarluartartup Aleqa Hammondip Nunatta Qitornaani ilaasortaajunnaarneratigut partii siunissagippallaarunnaartoq. Vittus Qujaukitsulli partiimi susoqassanersoq suli isummerfigerusunngilaa.

Amerlavallaanngitsut immaqa eqqarsaatigisimasaattut pisoqarpoq. Aleqa Hamondimmi qanittukkut nalunaarutigaa, Nunatta Qitornaani ilaasortaajunnaarluni. Qinersisoqarneranimi siusinnerusukkut Siumut sinnerlugu taaguunneqarluartartup, Siumumi siulittaasup Erik Jensenip partiimut ilaasortanngoqqinnissaanik kaammattuutaa akuerisimavaa.

Vittus Qujakitsup parteeqatimi ilaasortaajunnaarnera oqaasissaqarfigivallaanngilaa.

- Siunissami iluatsitsilluarnissaanik kissaappara. Aleqa Hamondimi ukiut ingerlaneranni suleqatigilluartarsimavara, Vittus Qujaukitsoq Sermitsiaq.AG-mut oqarpoq.

Partiimilli Nunatta Qitornaanik pilersitsisoq, Aleqa Hammondip ilaasortaajunnaarnerani malunnaateqarluartumik sunniuteqartartoq annaavaa, partiilu maanna ukiuni sisamaannarni atuussimasoq ajornartorsiuteqalerpoq. Vittus Qujaukitsoq Aleqa Hammondiluunniit apriilip qaammataani Inatsisartunut qinersisoqarmat qinigaanngitsoorput. Partii qinersisoqarmat kinguariarpoq.

Tullissaanik qinersilerutta, Siumup qineqqusaanermi anguniagarisartagai eqqarsaatigalugit, Aleqa Hammond periarfissagissaartutut isikkoqarpoq.

Suli tunniutiinnarnianngitsoq

Taamaalilluni Vittus Qujaukitsup partiillu Nunatta Qitornaasa siunissaat pitsaavallaarpasinngilaq.

- Aleqa Hammondip ilaasortaajunnaarneratigut partii atorunnaariaannartut isikkoqalerpoq, politikkikkut oqaaseqartartut aviisimilu AG-mi aaqqissuisuuneq Christian Schultz-Lorentzen oqarpoq.

Vittus Qujaukitsorli suli tunniutiinnarnianngilaq.

- Arlaannik iliuuseqarnissamik pilersaaruteqanngilanga. Isumaqarpunga politikkimik suliaqanngikkallarnissaq arlaatigullu iliuuseqanngikkallarnissaq iluaqutaassasoq. Kingusinnerusukkut piumassuseq qanoq innersoq apeqqutaalluni aamma partii atorunnaarsinneqassanersoq pillugu avatangiisit qanoq oqassanersut takoqqaalaariartsigit, Vittus Qujaukitsoq oqarpoq.

Christian Schultz-Lorentzenip naalakkersuisuusimasoq allamik periarfissaqartoq oqaatigaa.

- Politikkikkut suliaqaannarusukkuni partii matoriarlugu Siumumut - imaluunniit immaqa Naleqqamut ilaasortanngorniarsinnaavoq. Siullertulli taasara ilimanarneruvoq, Siumumimi ikinnguterpassuaqarlunilu suliaqartarsimaqaaq. Nunatta Qitornai atorunnaariaannartut isikkorpoq. Aquttup umiarsuaq kisimiilluni ingerlassinnaanngilaa, taanna oqarpoq, nangillunilu:

- Siullertut soorunami Siumumit tikilluaqquneqarlunilu inissaqartinneqartariaqarpoq. Tamannalu ilimanaateqarpoq. Ataatsimut akerlerisaqarneq ikinngutigiilersitsisarpoq. Vittu Aleqalu marluullutik Kim Kielsenimut isumaqataasarsimanngillat. Soorlu aamma Erik Jensen isumaqataasarsimanngitsoq.

Siumumi siunnerfiit nutaat iluaqutaasinnaasut

2017-imi Siumut nuna tamakkerlugu ataatsimeersuarmat Qujaukitsup Kim Kielsen siulittaasutut unammillerpaa. Tassani partiimik pilersitseqataasimasoq politikkeritoqarluni Lars-Emil Johansen partiimi suli tusaaneqartartoq tapersersortigalugu.

- Kielsen maannakkut politikkikkut suliaqanngilaq, Erik Jensenilu Siumut kingullermik nuna tamakkerlugu ataatsimeersuarmat siulittaasunngorniunnermi Kielsenimut ajugaammat, partiip nutaanik siunnerfeqalernera - Aleqa assigalugu - Vittusimut iluaqutaasinnaavoq. Siumup siulersuisui malunnaatilimmik allanngortinneqarput, Christian Schultz-Lorentzen oqarpoq.

Taassuma oqaatigaa, Nunatta Qitornaasa siulittaasuat parteeqatikumisut Aleqa Hammondisut ukiualuit matuma siornatigut tuusintilikkaanit taaguunneqartarsimasutut taaguunneqarpallaarneq ajortoq.

- Vittus Aleqatuulli tusagassiorfinnit sammineqartigisanngilaq imaluunniit ilisimaneqartutut sakkortuumillu namminersulivinnissamut atatillugu saqqummilaartigisanngilaq, tamanna Siumumit qularnanngitsumik takuneqarsinnaasimassaaq. Akerlianik Vittus politikkeritut naalakkersuisutullu misilittagaqarluartuuvoq. Partiip tamanna aamma pisariaqartissinnaavaa. Vittus Qujaukitsoq partiimi matuneqarnissaanik oqaaseqanngikkaluartoq, taamatut isumaqaannarnissaa Christian Schultz-Lorentzenip ilimaginngilaa.

- Nutaamik isumataarnissap tungaanut isumaqartoqartarpoq. Tamanna pingaartumik politikkimi atuuttarpoq. Partiimi allami ilaasortatut polikkerinngoqqissappat tupigissanngilara. Nunatta Qitornaasa qanoq ingerlaqqissinnaanerat takujuminaatsippara.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER