Naliliineq: Nannut arlalitsigut ulorianartorsiortinneqartut
Nunat Oslomi isumaqatigiissummut peqataasimasut akuersaarpaat, nannut taakkulu inuuffigisaat illersorniarlugit ataqatigiissaakkamik iliuuseqartoqarnissaa.
Nannut illersorniarlugit ukiunut qulinut pilersaarusiap ingerlanneqarnerata qiteqqunnerani Longyearbyenimi, Svalbard, Norge, nalilersuisoqarsimavoq.
Pilersaarut – Cirkumpolar Handleplan for isbjørne - 2015-imi Ilulissani akuersissutigineqarpoq, pilersaarummut peqataatitaqarsimallutik Norge, Canada, Kalaallit Nunaat, Rusland USA-lu.
Nalilersuinermut atatillugu nunat isumaqatigiissuteqarsimasut nannunut ulorianartorsiortitsinerpaat qulit ukiuni aggersuni suliarineqartussatut toqqarsimavaat, tassanilu silap pissusaata allanngoriartornera sallerpaalluni, Namminersorlutik Oqartussat ilisimatitsipput:
- Silap pissusaata allanngornerata uumasoqatigiinnut issittumilu inuiaqatigiinnut sunniutaat annertuut millisinniarlugit oqartussanit tamanit piaartumik, aalajangiisuusumik ataqatigiissaakkamillu iliuuseqartoqarnissaa pisariaqarpoq, Namminersorlutik Oqartussat allapput.
Nannut taakkulu uumaffii illersorniarlugit gassit silaannarmik kissatsitsiartortitsisut aniatinneqarnerisa millisinnissaa nunarsuarmi tamarmi suliniutigineqartariaqartoq nunat nanoqarfiusut sineriallit pisariaqartutut isigaat.
Iliuusissatut pilersaarummi aarlerinaatit allat ilaatinneqartut ilaatigut makkuupput: nannut inuillu aporaattarnerat, piujuartitsineq tunngaviginagu piniarneq, uuliamik aniatitsinerit, aatsitassanik piiaanerit, unioqqutitsilluni piniarnerit, mingutsitsineq, umiarsuit angallannerat, takornariat aamma nappaatit parasitsillu.
Nunat nanoqarfiusut sineriallit Nannut pillugit Issittumi iliuusissatut pilersaarut pillugu 2007-imili ukioq allortarlugu nalilersuisarput, tamannalu pisarpoq nannut illersorneqarnissaat pillugu Oslomi 1973-imi isumaqatigiissut naapertorlugu.