Naliliineq: Naalakkersuisooqatigiit nutaat - susoqassava?

Demokraatit naalakkersuisooqatigiinnut ilanngunniarnerminni iluatsitsissanersut, Inatsisartuni partiit allaffeqarfiini assigiinngitsuni eqqarsaarsersuutigineqarluarpoq.

Qitiusutsut apeqqutigineqartorpassuit ilagaat, Kim Kielsenip naalakkesuisutut atorfiit qassit Demokraatinut neqeroorutigissanerai.

Demokraatinit tusarfiup Sermitsiaq.AG-mut oqaatigaa, Kim Kielsenip naalakkersuisutut atorfiit minnerpaamik marluk ajornanngippallu pingasut Demokraatinut neqeroorutigisariaqarai, tassa Naalakkersuisutut atorfiit agguataarneqarnerat, Inatsisartut ataatsimiittarfissuanni ilaasortat amerlassusaannut naapertuuttunngorlugu. Vittus Qujaukitsoq Aningaasaqarnermut Aatsitassanullu Naalakkersuisuuvoq, kisimi qinigaanikuulluni. Demokraatilli arfinilinnik qinigaatitaqarlutik.

Naalakkersuisuni ilaasortat amerlineqassasut

Naalakkersuisuni ilaasortat ullumikkut arfineq-marluupput. Naalakkersuisoqarfiilli arlallit avinneqarsinnaapput, ilaasortat amerlanerulersillugit, Demokraatillu tassunga atatillugu piumasartik pisinnaavaat, Siumumit naalakkersuisutut ilaasortat ikinnerulersippallaanngikkaluarlugit. Assersuutigalugu Aatsitassanut Naalakkersuisoqarfiup, ullumikkut Vittus Qujaukitsup oqartussaffiinut ilanngunneqarsimasup, namminerisaminik naalakkersuisoqaqqilerneq iluaqutigilluarsinnaavaa.

Demokraatini eqqarsaasersortoqarsimaqaaq. Naalakkersuisooqatigiinnut ilanngunneq iluaqutaassava ajoqutaassavaluunniit. Tusarfiit Sermitsiaq.AG-mit oqaloqatigineqarsimasut nalilerpaat, qanorluunniit aalajangiisoqaraluarpat, tullissaanik qinersinermi Demokraatit qinersisunit pillarneqassasut.

- Imaassinnaavoq partiitut askisussaaffimmik toqqaannartumik tigusineq iluaqutaasinnaasoq. Qularutigineqassanngilarli, piffissami aggersumi politikkikkut suliassat oqimaattupilussuunissaat. Aningaasanut inatsisitigut tunissutissaqartoqanngilaq, akerlianik coronap ajornartorsiortitsinera qaangiuppat, inuiaqatigiit akiligaassarilersimasaasa akilerneqarnissaannut, oqimaattunik nuannarineqanngittunillu aalajangiiffigisassaqarpoq, partiimit tusarfik naliliivoq.

Sulissutiginiakkat iluatsinngittoorsinnaasut

IA-p coronap kinguneranik akiligassat, ingerlatseqatigiiffiit akileraarutaasa appartinneqarnissaannik kinguartitsinikkut suliffeqarnermilu ilanngaatip atuutsinneqalernissaata kinguartinneqarneratigut akilerneqarsinnaasut oqaatigereernikuuaa. Demokraatit sulissutigisimasaat marluk, Kim Kielsenimit kinguartinneqassanngittut Demokraatit kissaatiginnguatsiarpaat.

Hvordan Demokraatit politikkertik killilersuinngitsoq qanoq naalakkersuisooqatigiinnissamik isumaqatigiissummut ilanngutsissinnaanerat pissanngatigineqarpoq - anguniagaallu iluatsissappat - qanimut nalilersuisoqartarnissaa naatsorsuutigineqarpoq.

Naalakkesuisooqatigiilersinnaanermut akornusiisinnaasut marluk tassaapput, Siumumi Demokraatinilu siulittaasussamik qinersinissat. Kim Kielsen siulittaasunngorniuteqataassaaq, Nivi Olsenilu Demokraatit juunip arfineq-pingajuanni nuna tamakkerlugu ataatsimeersualerpata siulittaasussatut sassaniarluni aalajangersimasinnaavoq. Siumukkormiut juulip qaammataata aallartinnerani ataatsimeersuassapput.

Siulittaasunngorniunneq

Imminnut qanillinerannut pissutaanerpa, partiini siuttut taakku marluk siulittaasunngorniunnermi angusarissaarnerussallutik isumaqarnerat?

Kim Kielsen nuna tamakkerlugu ataatsimeersuarnermi, partiimi siuttutut, suliassani tamani amerlannerussuteqartumik nalakkersuisooqatigiinnik qulakkeerinnissimasutut isigineqarsinnaavoq.

Naalakkersuisooqatigiinnissamulli isumaqatigiissutip imassaa, inuttut kiffaanngissuseqarnermilu naleqartitanut tunngaviusumik imalik, ataatsimoorluni naapeqatigiissutigineqarsinnaanera ataatsimeersuaqataasunit soqutineqarnerusussaavoq.

Aalisartummi, aamma illoqarfinni nunaqarfinnilu suliffissaqarnikkut tunngaviit, suliffeqarnermik aaqqissuusseqqinneq, kikkut tamarmik inissaqarnissaat aamma ilinniartitaanermi peqqinnissaqarfimmilu pitsaassutsit qaffasinnerutinniarnerat qanoq pineqassappat.

Sammisassarpassuit nalilersorneqarlutillu inissinneqartussat amerlapput, paasinarporlu Nivi Olsenip sapaatip akunneri marluk pingasulluunniit ingerlassangatimmagit, isumaqatigiissutip inissinneqarnissaanut. Tassa Siumut Demokraatillu - akunnerminni naapeqatigiinniarnerat - pimoorunneqassappat.