Naliliineq: Kikkut tamarmik Múte-mut isigipput

Qinersisartut qinersisarnerat allanngorpoq. Maannalu apeqqutaalerluni IA-p ajugaanini sumut atussaneraa - aamma kikkut suleqataanissamut piareersimanersut?

Múte B. Egede ulloq aallarnerlugu kaffisoqqaarniarpoq. Tamatuma kingorna ullormi oqaluuserisassaq sammissavaa: Naalakkersuisooqatigiittussanik nutaanik, ukiuni sisamani tulliuttuni nunamik aqutsisusssanik pilersitsinissaq.

– Innuttaasulli ingerlaannartumik allannguisoqarnissaa naatsorsuutigissanngilaat, KNR-ip partiit siulittaasuinik naggataajusumik oqallitsitsinerani taanna oqapoq.

Oqallitsitsinermi Siumut siulittaasuata Erik Jensenip Inuit Ataqatigiinni siulittaasoq sapaatip akunnerini arfinilinni qineqqusaartoqareersoq ajugaaneranik pilluaqquaa.

Valg.gl naapertorlugu blev Múte B. Egede qinersinermi qinerneqarnerpaalluni inuttut 3.380-inik taaguunneqarsimavoq.

Ullut aggersut takutikkumaarpaat IA-p isumaqatiginninniarsinnaatitaanini qanoq atussaneraa. Naleqqamit nalunaarutigineqarsimavoq, partimit IA-p suleqatigineqarnissaa periarfissagissaartutut isigineqartoq. Piumasaqaatigineqartorli pissusiviusut pillugit isumaqatiginninniarnermi ataavarnerusumik isumaqatigiittoqassasoq.

Valg.gl-ip ullaaq manna nutarterisimanera naapertorlugu, partiit taakku marluullutik ilaasortanit 31-usunit 16-inik ilaasortaatitaqalerput.

Iluaqutaasinnaasut ajoqutaasinnaasullu

Aalisarnermut politikki, naalagaaffinngornissamut suliap sukkassusaa ilaatigullu timmisartoqarfinnut isummat pineqartillugit IA Nalerarlu imminnut ungasilaartuupput.

Partiilli taakku marluullutik Kuannersuarni aatsitassarsiorniarnermut akerliupput aamma agguaqatigiissitsisarnermi imminnut qanippallaanngillat.

Atassutip siulittaasuata Aqqalu Jeremiasseni qineqqusaarnermi oqaatigaa, partiimi Siumumut tapersersortaanissaa takujuminaatsillugu. Aamma IA-mik Naleqqamillu suleqateqarnissaq pineqartillugu aporfissaqarsoraa. Pingaartumik naalagaaffinngornissaq eqqarsaatigalugu. Naleraq Atassullu tassuunartaatigut naaperiarfissaqarpasinngillat.

Ilisimaneqartutulli tamanna naleqartitsinermut tunngassuteqartoq ulluinnarpalaarnerusunik aalajangiisoqartoqartussaatillugu illuartinneqartartoq.

Múte B. Egedelli ukiuni sisamani atuuttussamik tunngavissiornermini ataasiinnarmik amerlanerussuteqarnissaq naammaginavianngilaa. Inatsisartuni partiimit partiimut allamut nuuttoqartarnera takornartaanngilaq, ataasiinnarlu partiimut allamut nuussangaluarpat IA-p Naleqqallu naalakkaersuisooqatigiinnerat ajoquserneqarsinnaavoq.

Siumut qanoq inissisimassava?

Qinersinerup inernerata takutippaa parteersuit partiitoqqallu innuttaasut katersuuffigisaraat. Tamatuma aamma Múte B. Egede pisussaaffilerpaa, Siumumik suleqateqarsinnaanermut periarfissarsiornissamut. Tamannali ajornarpasittutut isikkoqarpoq. Ilaatigut Kuannersuarni aatsitassarsiorniarneq aporfiusussaagami.

Aamma IA-p 2009-miit 2013-imut naalakkersuisuutitaqarnerani siullermi partiit taakku marluullutik suleqatigiissimagaluartut Demokraatinik suleqateqarniarneq aporfeqarsinnaavoq. Taamanikkut naalakkersuisooqatigiimmata uranimut tunngassuteqartoq sammineqartarsimanngilaq. Maannali periarfissaasinnaasoq tassaavoq, Nunatta uranisiorfittut atuussinnaanera pillugu innuttaasunik taasititsisinnaaneq. Taamalu partiit marluk akunnerminni aalajangiisinnagit innuttaasut aalajangiitinneqarnissaat. Suliarli tamanna sivisuumik ingerlanneqarsinnaavoq, tassa innuttaasut paasisimasaqarluarlutik isummissappata, tamannalu partiit taakku marluullutik soorunami isumaqatigiissutigaat.

IA avaqqunneqarsinnaasoq

Naalakkersuinikkut ulluni aggersuni aaqqissuinissami periarfissaq alla tassaavoq, Siumut partiinik allanik marlunnik pingasunilluunniit isumaqatigiissuteqarluni, IA- isumaqatiginninniarsinnaaneranik arsaarinnissinnaanera.

Siumulli sinnerlugu isumaqatiginninniartussap tamanna iluatsissaguniuk aporfiit arlallit qaangeqqaartariaqarpai.

Ullut aggersut takutikkumaarpaat, tamanna qanoq inerneqarumaarnersoq.

Powered by Labrador CMS