Naliliineq: Kielsen tunuassaaq qinersisitsissalluniluunniit
Partiimi Siumumi siulittaasoq Naalakkersuisut siulittaasorinngippassuk, pissutsit taamaatsillugit pisumi matumani atangaarnavianngilaq, adjunkti taama naliliivoq.
Siumumi siulittaasuujunnaarami Kim Kielsen maanna qanoq iliussava? Siumut ataatsimeersuarnerani siulittaasumik allamik toqqaasoqareersorlu, maanna taanna apeqqutaalerpoq.
Kim Kielsen tunngaviatigut Naalakkersuisunut siulittaasuuginnarsinnaavoq, Erik Jensenilu Siumumi siulittaasutut sulianik aallartitsilluni.
AAMMA ATUARUK: Kielsen ajorsarnermi kingorna: Siumut avissaartuutissanngilaq
Taamalli aaqqissuussaaneq atangaarnavianngitsutut, adjunktimit Rasmus Leander Nielsenimit nalilerneqarpoq:
- Piviusorsiorpallaanngilaq.
- Siumut iluani aaqqiagiinngittoqangaatsiarsimavoq, soorlu Erik Jensen Naalakkersuisunit tunuarniuteqarsimalluni, Naalakkersuisullu ingerlanerat tamatumani sakkortuumik isornartorsiorsimallugu. Maanna takujuminaappoq aaqqiissuusap taamaaginnarnissaa qanoq ikkumaarnersoq.
Atuuffiugallartut atorsinnaanngillat
- Erik Jensen siulittaasunngortussaassaaq (Naalakkersuisuni, aaqq.) imaluunniit qinersinissamut suaaruteqartoqartussanngorpoq, Rasmus Leander Nielsen oqarpoq. Taanna inuiaqatigiilerinermik ilisimatusarnernut immikkoortortami adjunktiuvoq.
Kim Kielsen aamma Erik Jensen tamarmik immikkut siulittaasuuffeqarlutik suleqatigiissinnaanerat pillugu isumaliortoqarsimavoq, soorlu Lars-Emil Johansen 80-ikkut naalerneranniit 90-ikkut aallartinnerannut Siumumi siulittaasuusimasoq, Jonathan Motzfeldtilu piffissami tassanerpiaq naalakkersuinikkut siulittaasuusimalluni.
- Oqaluttuarisaaneq qiviaraanni Siumumilu aaqqiagiinngittoqartaarnera eqqarsaatigissagaanni, taamatut maannakkut aaqqiinissaq takorlooruminaappoq. Siumut iluminni politikkimik ataasiusumik avammut nalunaarniarnerminnut ajornartorsiutigilersinnaavaat, taamatullu partiip iluani avissaartuunneq annertuneruliinnarsinnaalluni.
- Taama misiliisoqassappat piffissami sivisungaanngitsumi taamaattoqassagunarpoq, Rasmus Leander Nielsen oqarpoq.
Sapaatip akunnerani matumani tunuarsinnaavoq
Taassuma nalilerpaa Kim Kielsen sapaatip akunnerani matumani kingusinnerpaamilli ukiukkut immikkut ittumik ataatsimiinnerup februarimi aallartinnginnerani tunuassasoq:
- Kielsen suliaminik eqqaamaneqaatissaminik suliaqarnissamik soqutigisaqarluinnassaaq. Soorlu aalisarnerup iluani nunatsinnilu angallannikkut aalajangiiffigisassat annertuut siunissamut qulakkeerneqartussat suliarineqarput, politikkimili suliaqarfissaa killeqartoq oqartoqarsinnaavoq.
- Atuuffimmini inissisimanera maanna killiffeqalerpoq, partiinullu allanut isumaqatiginninniarsinnaanera taamatulli killeqalerluni. Suliamik ingerlatitseqqiisussanngortoq kisimi eqqumaffiginiarneqalersussaavoq, Rasmus Leander Nielsen oqarpoq.
Erik Jensen qinersisitsinissamik aamma soqutigisaqarsinnaavoq
Kim Kielsen partiimi pissaaneqarunnaarami qinersisitsinissamik suaaruteqarniarsinnaanersoq isumaqarpit?
- Isumaqarpunga Kim Kielsenip partiini ajunnginnerpaamik perusukkaa. Erik Jensenip aamma soqutigisinnaalluarpaa qinersisitsinissaq, pissutsit salikkumallugit. Tassani Erik Jensen qineqqusaarnissamik politikkiminillu saqqummiinissaminut periarfissaqalissaaq.
- Aarlerinartuusinnaasorli tassaavoq partii naalakkersuisuutitaqarnermik annaasaqarnissaa, Rasmus Leander Nielsen oqarpoq.
Sapaammi partiip siulittaasuanik qinersereernerup kingorna Kim Kielsen Naalakkersuisut siulittaasuattut inissisimaannassanersoq aperineqarami ersarissumik akissuteqarsimanngilaq:
- Qanoq pisoqassanersoq takoqqaalaariartigu. Tamanna Siumumi oqaluuserissavarput. Soorluttaaq Inatsisartut gruppianni oqaluuserissagipput. Suleqatigiippugut, Kim Kielsen Sermitsiaq.AG-mut oqarpoq.