Skip to main content

Naliliineq: Assammik arsarnerup ineriartornera ernumanarpoq

Assammik arsarluni Kalaallit Nunaanni pissartanngorniunnerit ullumi ataasinngornermi aallartinneqassapput. Timersuutip ineriartornera unammisartuusimasumit Ingo L. Bisgaardimit ernumagineqarpoq, allanngortoqarnissaa ilaatigut ujartorpaa

Assammik arsarluni pissartanngorniunneq Nuummi ingerlanneqassaaq, pissartanngorniutivittoqassalluni sapaatiuppat.

Assammik arsartartuusimasoq Ingo L. Bisgaardip pissartanngorniunnissamut naatsorsuutai uani atuarneqarsinnaavoq:

- Ukiut qulit matuma siorna, 2009-mi, GM-ertoqartussaasoq malinnaasut unammersuaartoqarnissaanut pissangarrapput. Kikkut pissartanngussanersut siumut oqaatigineqareersinnaanngilaq taamani, tassami kikkulluunniit unammisut imminnut ajugaaffigisinnaasarput. Kikkut ajugaassanersut siumut oqaatigineqareersinnaanngitsoq Sermitsiaq ilaatigut allappoq. Timersoqatigiiffippassuit unammersuaarnermi peqataapput, kujataanit K-33 avannaaniillu N-48 peqataallutik.

- Maanna ukiut qulit qaangiutereersut pissutsit allarluinnaapput. GSS-ip angutitai arnartaallu ajugaaffigineqarsinnaanngillat, timersoqatigiiffinniillu allanit pitsaanerunerat pissutaalluni unammersuaarnerit aallartinnginneranni nalunnginneqareertarpoq kikkut pissartanngussanersut.

Unamminerit pikkunaatsut naligiiffiunngitsullu
- Ukiut kingulliit allat assigalugit naatsorsuutigaara GSS arnani angutinilu pissartanngussasut. Pissartanngorniutivinneq pissanganarpallaarnavianngitsoq naatsorsuutigaara. 

- Arnani GSS klubbinit allanit siuarsimaneruvoq, NÛK sinneruttuni pitsaanersaalluni. Arlaleriarlutik pissartaasarsimasut Sisimiuneersut SAK maqaasinarput.

Timersoqatigiiffiit ikitsuinnaat nalunaartut
- Angutini timersoqatigiiffiit sisamaannaat peqataaniarlutik nalunaarsimanerat ernumanarpoq. GSS-ip ukiuni tulleriinni (!) pissartanngornissaa naatsorsuutaalluinnarpoq. NÛK aamma N-48 unammissutigissavaat finaalimut peqataanissaq. Taakku ukiorpassuarni naligiiffiusunik unammisarput, malinnaaffiginissaat pissanganassaaq.

- Norsaq HC naatsorsuuteqarfigivallaanngilakka, siornatigut arsarttorisimasaat arlallit maanna NÛK-mi aamma GSS-imi unammisartuupput. NÛK-p aamma N-48-rup GSS-imut qanoq unammillersinnaassanersut pissanganassaaq. NÛK maanna naqqanit aallartillutik GM-imut peqataalerput, maannalu nunanut allanut unammisartut soorlu Isak Olsen aamma Aqqa Lukas Lings NÛK-mi unammisartuulernikuupput. Norsaq HC-mi sungiusaasuusimasoq Tom Ostermann-Søholm maanna NÛK-mi sungiusaasuulernikuuvoq.

Timersuutip ineriartornera unittooqqavoq
- Futsali maanna ineriartupallattorujussuuvoq, meeqqanit utoqqasaanut pissartanngorniunnerni timersoqatigiiffippassuit peqataasarlutik. Assammik arsarneq killormut ingerlavoq, ukiut marluk iluanni ilaasortaasut ikileriarujussuarnikuupput - tassani meerarpassuit assammik arsartarunnaartut maluginiagassaavoq. Timersoqatigiiffiit Assammik Arsartartut Kattuffianit tamanna eqqumaffigineqarpoq, tamannalu allanngortinneqarnissaa pisariaqarpoq, allanngortoqanngippat assammik arsarneq siunissami Nunatsinni aallunneqarunnaarsinnaavoq.

- Unammersuaarnerit aamma allatut aaqqissuuttalernissaat misissuiffigineqarpoq, tassani unammisaqattaarnerit soqutiginarnerusut ingerlanneqartalernissaat anguniagaalluni. Maanna unammisaqattaarfiusartunit piffissamik sivisunerusumik unammisaqattaartoqartalernissaa misissorneqaleruttorpoq.

- Inussivimmi pissartanngorniuttoqalernera nuannerunarpoq, tassani nuannissaaq unammisaqattaartut isiginnaarlugit aamma nammineq kajumissutsiminnik sulisut piareersarluarsimanerat takussallugit qilanaarnarpoq takussallugit, Ingo L. Bisgaard oqarpoq.
 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER