Skip to main content

Naliliineq: Qinersineq ima naammassissaaq

Siumumit borgmesterit sisamat Inuit Ataqatigiinneersorlu ataaseq. Ullumikkut kommunimut qinersinerup taama inerneqarnissaa ilimanarnerpaavoq.

Qinersisarfiit ammaqqammerput, soorunami taasinerit qanoq agguataarumaarnersut qularnaatsumik oqaatigineqarsinnaanngillat. Kisianni taasinerit kingulliit kisinnewqareerpata inissitsiternissamut isumaqatigiinniarnerit naammassereerpata qanoq inerneqarumaarnissaa eqqoriarneqarsinnaavoq.

Ilaat qularnanngitsorujussuupput, ilaallu suli ammanerullutik.

Qaasuitsup Kommunia Avannarlermi Siumut qularnanngitsoq
Kisianni qularnannginnerusunit aallarteriarta: Siumut Qaasuitsuo Kommunia Avannarlermi borgmesterinngortitsissaaq.

Inuit Ataqatigiit piffissaq kingulleq atorlugu Bendt B. Kristiansen borgmesterissatut sassartippaat, kisianni tassunga ingitsinneqassaguni qinersinermi annertuumik mumisitsisoqartariaqassaaq.

Ilulissat avannaani ingammi Siumumik taasisarpugut, taamaammallu Siumup iluani inunnik ataasiakkaanik taasinerit qanoq agguataarumaarneri apeqqutaassapput.

Palle Jerimiassen Ilulissaneersoq, Ane Lone Bagger Ilulissaneersoq, Jørgen Kristensen Ilulissaneersoq, Sakio Fleischer Uummannameersoq aamma Jens Immanuelsen Upernavimmeersoq borgmesterissatut taaneqarsinnaapput. Kisianni Siumup iluani tamanna ammasorujussuussaq.

Wæver periarfissagissaartoq
Kommune Kujallermi Jørgen Wæver Johansen borgmesteriuinnarnissamut periarfissagissaarpoq.

Borgmesteriusimasoq Simon Simonsen unammillertissaqqinnerpaavoq, kisianni maanna borgmesteriusoq periarfissagissaarneruvoq.

Inuit Ataqatigiit aamma Stine Egede unammillertissatut sassartippaat.

Kisianni taassuma Siumut issiavimmik arsaassagunigit, Siumup amerlanerussuteqangaatsiarnerat allanngortissaguniuk IA-mik qinersisartut annertuumik qinersiartortitsittariaqarpai, saniatigullu Atassut suleqatigilertariaqarlugu.

Siulleq taaneqartoq iluatsissanngippat, kingulleq taaneqartoq ilimananngilaq.

Demokraatit Asii qinerpaat
Qineqqusaarneq sakkortunerpaaq Kommuneqarfik Sermersuumi takuarput. Tassani nuna tamakkerlugu politikerit nuimanerpaat sassartinneqarput.

Martha Lund Olsen Siumumit sassartinneqarneratigut Asii Chemnitz Narupimut unammillertissamik nassaarsimapput. Qinersinermi kingullermi Inuit Ataqatigiit Siumumit siulliulaaginnarput, taakku partiit marluk naligiittorujussuunissaat eqqoriarneqarsinnaavoq.

Taamaalilluni Demokraatit aalajangiisooqqissinnaapput.

Qineqqusaarnerup aallartinnerani saaqattaarnerup kingorna, IA-mik taasinissartik erseqqarissarpaat. Partiip nuna tamakkerlugu politikerit nuimasut Kommuneqarfik Sermersuumi sassartippaat, tamannalu iluatsitsiffiusinnaavoq.

Hermann kiap paarlassavaa?
Qeqqata Kommunia ulloq manna tikillugu Siumut amerlanerussuteqartuarsimavoq.

Borgmester Hermann Berthelsen tunuarnerata kingorna pissutsit ammanerulaarput. Pisarneq malillugu Atassut kommunimi nukittuumik inissisimasarpoq.

Tamatuma saniatigut Hans Enoksenip kommuneqarfigisimavaa, naak nammineerluni qinigassanngortinngikkaluarluni, Partii Naleraq Siumumit taasinernik pissarsinissaa naatsorsuutigineqarsinnaavoq, taamaalillunilu partiinit allanik pisariaqartitsisoqalersinnaalluni.

Taamaakkaluartoq borgmesteriutitaqaannarnissaat ilimanarnerpaavoq. Partiip iluani Malik Berthelsen borgmesterissaasinnaasutut taaneqarpoq, kisianni tassani aamma ammasorujussoorpasippoq.

IA-mut periarfissaarannguaq
Qaasuitsup Kommunia Kujallermi IA-qarfiusumi Aasiaat pingaarnertut illoqarfiussaaq. Tassanilu partii borgmesteriutitaqalernissamut annikitsunnguamik periarfissaqarpoq.

Taamaattumik partii kommunimi borgmesterissatut sassartitamik taasisimannginnera tupaallannartuusinnaavoq, ingammik partiip naalakkersuisuusimasoq Ane Hansen sassartimmagu.

Qinersinermi kingullermi kommuninngortussami illoqarfinni sisamani IA 1.069-iinnarnik taaneqarpoq, Siumut 1.407-nik taaneqarluni.

Taamaattumillu Siumup iluani aalajangiisoqarnissaa ilimanarsinnaavoq. Jess Svane, Kristian Jeremiassen aamma Kristian Broberg tassani qinigassanngortinneqarput. 

Naggataagut soorunami qinersisartut suliaq aalajangertussaavaat. Qulaanilu taakkartorneqartut kukkusumik missingersuutaatinnissaannut periarfissaqarlutik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER