Skip to main content

Naliliineq: Kalaallit isiginnaartitsisut ersaartaaterujussuarneqartut

Isiginnaagassiakkut Kalaallit Aalborgimiittut isummiutiinnakkat nikeriartinneqarput, isiginnaartitsisullu takutitsilluartorujussuupput

– Danmarkimi kalaaliuneq sooq taama sammineqartigaa? Ukiuni qulingiluani nunani allani najugaqarnikuusimavunga, tamakkunanilu inuit kalaaliunera soqutiginngivippaat.

Isiginnaagassiami Kalaallit Aalborgimiittut peqataasut ilaat taamatut oqarpoq - imminullu assortuulluinnartumik tamanna isiginnaagassiarineqarpoq.

Aliikkutaralugu isiginnaartitsisartut ilisimasallillu

Isiginnaagassiaq arfininngormat takuteqqaarneqarpoq naammallu ersaartaanneqartorujussuuvoq arlalinnillu takutitsiviulluni.

Ersaattaanneqarnera pissusissamisoorluinnarpoq, tassami kalaallit aliikkutaralugu isiginnaartitsisut arfineq-marluk takutitsilluaqimmata - isiginnaartitsinermillu ilisimasallit peqatigalugit isiginnaagassiamik eqqarsarnarluinnartumik pilersitsisimapput, Danmarkimi kalaallinut isummiutiinnakkanik nikisitsilluinnartumik.

Kalaallit Aalborgimiittut takutinneqarpoq Borgerscenemik taaneqartartumi. Inuit nalinginnaalluinnartut namminneq misigisaannik oqaluttuartinneqarput, isiginnaartitsivimmi atorsinnaasat suut tamaasa atorlugit pissanganartumik takutitsilluni, pissanganarsaatit ilusilersueriaatsillu, qulliit nipillu.

Apersuinermik aallartippoq

Isiginnaagassiap sananeqannginnerani isiginnaartitsisarfiup kalaallit 30-t missarpiaat Aalborgimut attuumassutillit apersorsimavai.

Tamatuma kingorna Kalaallit Aalborgimiittumi isiginnaartitsisussat arfineq-marluk toqqarneqarput - ilitsersuisorlu Nicolei Faber peqatigalugu isiginnaagassiaaqqamik torrallatamik pilersitsisimapput, isiginnaagassiarlu nuannersuuvoq, ilikkarnartuulluni, annernarnerpaanik takutitsiffiulluni - maalaarutitut isikkoqartinnagu.

Kalaallit Nunaat katersugaasiviua?

Isiginnaagassiap aallaqqaataa torrallataalluinnarpoq, tassani peqataasut sikaavimmi igalaaminermiitillugit katersugaasivimmi pigisatut ilisaritinneqarlutik. Tassuuna qallunaarpassuit Kalaallit Nunaannik katersugaasivittut isiginninnerat eqqorneqarluinnarpoq, pitsaanerutittarmassuk tassani ineriartortitsimanngisaannarsimanissaa.

Kikkummi tamarmik sikisaartarput misiginneqataallutillu, oqallinnermi oqaatigineqaraangat Kalaallit Nunaanni ineriartorneq sukkavallaamik ingerlasimasoq.

Torraallataalluinnartumik sikkaavik igalaamineq scenemiitinneqarpoq, tassani inuit arfineq-marluk inuunerannik oqaluttuaat tupinnaannartut oqaluttuarineqarlutik.

Danmarkimi inuunermik oqaluttuat

Kalaaleq inuusuttoq peeqqani ilinniariartoq ilagalugu Aalborgimut tikittoq, kinguneqanngitsumillu suliffissarsioraluartoq. Akademikeri Kalaallit Nunaannut utinnginnermini misilittagassarsioqqaarniartoq.

Ilinniartitsisoq Kalaallit Nunaanni atuarfeqarfimmit tunuaannartoq isumaginninnikkut ajornartorsiuterujussuit pissutigalugit - kiisalu kalaaleq soraarninngorami tappavunga nuuttoq ernuttani qanikkumallugit.

Tamarmik oqaluttuassaqarput - tamakkualu oqaluusererusuppaat isiginnaagassiap naanerani isiginnaartut scenemi kaffisoqatigigamikkit.

Oqaatsinik ilinniartitsineq

Quianarluinnarpoq ilinniartitsisoq soraarninngorsimasoq Marie Møller-Lynge, toortaammik isiginnaartut tikkuarlugit kalaallit oqaasiisa periataarsinnaanerannik tunngaviusumik ilinniartimmagit.

Eqqarsarnartuuvoq sociologip Maliina Junge Jørgensenip oqalugiaatigimmagu kalaallit qarasarissut qimarrannerat, taannalu isumaqarpoq tamatumunnga pissutaasimasut nunatsinni atuarfeqarfimmi aaqqissuusseqqittarnerpassuit, nunatsinni meeqqat atuarfiannik aserortitsisimasumik.

Aammalu kalaaleq imerajuttoq, peqataasut assigiinngitsunik isumaqarfigisaat. Taanna taqassigaat, naakkigalugu - tamarmillu kissaatiginartikkaluarpaat imertarunnaarsissinnaallugu.

Oqallinnermut pitsaanerusumik tunngaviliisoq

Taamaasilluni Kalaallit Aalborgimiittut kalaallit Danmarkimiittut pillugit oqallinnermik assigiinngisitaarnerulersitseqataavoq pitsaanerulersitsillunilu - neriuutigaaralu isiginnaagassiaq Danmarkimi angallanneqarsinnaassasoq. Tassami isiginnaagassiami sunik tamanik pisoqarpoq qallunaat tamarmik ilinniarfigisinnaasaannik.

Taamaattumik aamma kalaallit isiginnaartut ilaat isumaqatiginngilluinnarpara, taanna isiginnaagassiap kingorna oqarmat isiginnaagassiaq Katuami takutinneqartariaqaraluartoq. Tamanna sumut iluaqutaassagami? Kalaallit oqaluttuaq nalunngilaat. Qallunaanuku Kalaallit Nunaat ilikkagaqarfiginerusariaqaraat - tamatumanilu Kalaallit Aalborgimittut iluaqutaalluassaaq.

Aliikkunartoq ilikkarnartorlu

Kalaallit Aalborgimiittut isiginnaagassiaavoq aliikkunarluinnartoq ilikkarnartorlu, pitsaanerpaamik inassutigisinnaasara.

Isiginnaagassiaq decembarip 15-iata tungaanut takutinneqartassaaq. Unnunnut arlalinnut inissat nungunneqareersimapput, isiginnaartitsinissanulli ataasiakkaanut billetsit suli sinneqarput. Aalborg Teaterip nittartagaani billetsinik inniminniisoqarsinnaavoq.

Qanittukkut TV2 Nordip isiginnaagassiaq sammivaa takinerulaartumillu ilanngussiffigalugu, taannalu takusinnaavat uani

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER