Greenland Express Air
Naliliineq: Angallasserngaarneq ammut qummullu
Timmisartuutileqatigiiffiup Greenland Expressip angallasserngaarnerani ilaasoqarpallaanngilaq, akikitsumilli angallassisartunit Ryan Airimit aamma IberiaExpressimit saqisoqarnera pitsaaneruvoq
(Allaaserisaq naalillugu saqqummerseqqinneqarpoq)
Nassatat arfinillit, ilaasorineqartut 15-it, aviisinillu agguaassinermi pisortaq kisimi nuisasoq. Greenland Express Airip Danmarkimit Islandikkoorluni Kalaallit Nunaaliarnera taama isikkoqarpoq, Danmarkillu ullaavani angallassineq aallartippoq.
Aalborgimi inoqarpallaanngitsoq
Timmisartuutileqatigiiffiup angallasserngaarnera Aalborgimi nalunaaqutaq 08.00 aallartippoq, ilaasorineqartussanut tassani ullaakkorsiutinik tunioraasoqarpoq. Tassanngaanniillu amigaatigineqartoq saqqummerpoq: Ilaasoqarpallaanngilaq. Ullaakkorsiutit juicellu assigiinngitsut tiguneqarsinnaapput, Aalborgimiillu ilaasut qulit ilaasorineqarput.
Timmisartoq qanganisaq aliikkusersuisoqanngitsorlu
Gert Braskip nammineerluni maluginngilaa ilaasuni qanoq Københavniliarnersut. Timmisartumi inuit 15-it ilaasorineqarput, nassatarineqartut arfiniliupput. Sermitsiamit ilaasut taakkunani marluk nassatarai meeqqallu marluk ilaaqatigalugit. Aamma hollandip timmisartuutileqatigiiffianit Denim Airimit ilaasoqarpoq. Taassuma timmisartumi aquttut oqaluutingaatsiarpai, timmisartoq qanoq orsussaqartiginersoq eqqartorneqarluni.
Naak timmisartup qalipaataa nutaajugaluartoq timmisartup ilua nutaaliaavallaanngilaq, nipilersuummik tusarnaartoqarsinnaanngilaq, arlaannik aliikkutaasinnaasumik sammisaqartitsisoqarsinnaanani, taamaattumik nammineq angalanermi aliikkusersorniartariaqarpoq. Taamaattumik akunnerni sisamani - tallimani timmisartut angallassisartunut timmisartoq assersuunneqarsinnaanngilaq.
Saqisut sulilluartut
Timmisartup saqisui Denim Airip qalipaataanik atorlutik saqipput, akikitsumillu angallassisartunit Ryan Airimit aamma IberiaExpressimit allaanerulluni. Københavnimit Reykjavikkiliarnermi akeqanngitsunik nerisassanik sassaalliisoqarpoq, akeqanngitsumik imertortoqarsinnaavoq, kaffisorluni thetorluni kiisalu tamulugassartorluni. Timmisartumi aquttup aamma ilaasut oqaloqatigisarpai.
(Lars Bjørknæs naliliivoq)