Naligiissitaanissamut Siunnersuisoqatigiit: Angerlarsimaffimmi persuttaasarneq akiorneqarneruli
"Piffissaq immikkuullarilluinnartoq" nuannersutut isumaqartinneqartaraluartoq coronap nalaani allatorluinnaq isumaqalersimavoq. Nuna tamakkerlugu naligiissitaanissamut ulloritinneqartumi, angerlarsimaffimmi persuttaasarnerup unitsinnissaanut suliniuteqarnissamut ukkassinissamik, naligiissitaanissamut siunnersuisoqatigiit kaammattuuteqarput.
Covid-19-ip nunarsuaq tamakkerlugu tunillaassornerani amerlasuut angerlarsimasariaqalerput, angerlarsimaffinni suliffinnilu nutaamik pingaarnersiuisoqartariaqalersimalluni. Naligiissitaanissamut siunnersuisoqatigiit siulittaasuat Kathrine Bødker, tusagassiuutinut nalunaaruteqarluni allapoq.
Maajip 20-at tassaavoq nuna tamakkerlugu naligiissitaanissamut ulloritinneqarpoq. Malunnartitsinissarli aamma persuttaasarneq pillugu nunat killiit isumasioqatigiisitsinissaat ukiamut nuutsinneqarsimapput, coronap ajornartoortitsinera pissutigalugu.
Coronavirus pissutigalugu angerlarsimaffiit persuttaaffiusut ajornartoorfiungaatsiartut, naligiissitaanissamut siunnersuisoqatigiit allapput.
- Ilaqutariiaani ernumanartortalinnik aamma pisoqarpoq. Ilaqutariit angerlarsimaffimminni mattuteqqapput, ilaqutariit persuttaaffiusareertut mattuteqqaneqarnermi nalaani imaannaanngitsunik kingunerlutsitsisinnaapput. Misilittakkammi naapertorlugit Covid-19-ip tunillaassornerata nalaani angerlarsimaffinni persuttaasarneq annertuseriarsimavoq, siulittaasoq allappoq nangillunilu:
- Meeqqat angajoqqaaminnit sumiginnagaasut nalunaarutigineqanngillat, tamannalu eqqarsaatigiinnarlugu ajorluinnarpoq. Ajoraluartumik tupaallannartortaqanngilaq. Unammillernartut ajornartorsiutillu taakkuuinnarput, allatulli poortorneqarsimasutut illutik.
Tulluarsarnissaq kaammattuutigaa
Tunillaassortoqarnera pissutigalugu inooriaaseq piffissami matumani allanngoriartorpoq, angerlarsimaffinnilu aamma allanngortoqarnissaanut nalimmassarnissat pisariaqarsorineqarput.
- Toqqissisimanartumiinneq, timikkut tarnikkullu pilersitsiviusariaqarput. Ersarissunik maleruagassaqartitsinikkut ersarissuuneq eqqissisimanerlu pilersittariaqarput, qanillinaveersaarnikkullu qanilaarneq kinaluunniit persuttaanerup pissaanerani mattunneqartutut tigusarineqartutullu misiginnginniassammat pilersitsisoqartariaqarpoq, Kathrine Bødker oqarpoq.
Nuup matuneqarnerata kingunerisaanik qimarnguiit ulikkaarluinnarsimapput.
Siunnersuisoqatigiit maanna kaammattuipput, persuttaasarnerup ajornartorsiutitut aaqqiiviginissaanut politikerit suliniuteqarnerusariaqartut.
- Taamaammat persuttaanerup ajornartorsiutigineqarnera ukkatarineqassasoq nuna tamakkerlugu naalakkersuinermik suliaqartunut sakkortunerpaamik innersuussutigissavara. Covid-19-eqaraluarpat peqanngikkaluarpalluunniit, unammillernartut suli maaniipput persuttaanerlu akiorniarlugu naalakkersuinermik suliaqartunit ukkatarineqarnerulernissaa piffissanngorluinnarpoq, Kathrine Bødker, naligiissitaanissamut siunnersuisoqatigiit siulittaasuat naggasiivoq.