Naligiissitaanissamut siunnersuisoqatigiit siulittaasuat: Pisoq ilaquttanut tutsinnaveersaaruk
Malittarisassat, inerteqqutit siunissarlu pillugu nalornineq angerlarsimaffimmi eqqissiviilliortitsilersinnaapput. Taamaammat naligiissitaanissamut siunnersuisoqatigiit kaammattuutigaat immitsinnut paarinissarput.
Sermitsiaq.AG-mit ippassaq saqqummiunneqarpoq, innuttaasut angerlarsimaannaqquneqalermatali Nuummi qimarnguik amerlanerujussuarnit saaffigineqarsimasoq, Kalaallit Nunaanni Naligiissitaanissamut Siunnersuisoqatigiit siulittaasuat innuttaasunut kaammatuuteqarpoq.
- Coronavirusip atugaanerani tamatta paarisa, Kathrine Bødkerimit oqaatigineqarpoq.
Kaammattuut naligiissitaanissamut siunnersuisoqatigiit nittartagaatigut tallimanngormalli saqqummiunneqarpoq, tassa siunnersuisoqatigiinnit maluginiarneqarsimammat nunarsuarmi sumi tamaani coronap atugaanerani arnat amerliartuinnartut ikiortissarsiorlutik saaffiginnittalersimanerat.
Malittarisassat nukillalaarnarsinnaasut
Kathrine Bødkerip oqaatigaa, piffissaq maanna atugarput nutaajusoq, arlaippassuartigut annilaarnartortaqarsinnaasoq.
- Imaaliallaannarluta atisaarniarfimmut pisiniarsinnaajunnaarnerput, nujaleriffiliarsinnaajunnaarnerput, kaffillertunukarsinnaajunnaarnerput imaluunniit eqqartueqatigiissinnaanermut minnerunngitsumillu killiffiup kingunerisinnaasai tamaasa eqqartornissaannut imerniartarfinni kaffisortarfinniluunniit naapisimaarsinnaajunnaarnerput inuttut kiffaanngissuseqarnitsinnut akuersaarnanngitsutut misinnarsinnaavoq, taanna oqarpoq.
Inuiaqatigiinni kiffaanngissuseqartuni uagutsitut ittuni, ulluinnarni oqartussanit taamatut killilersorneqartarneq sungiusimasarinngilarput, tamannalu soorunami inunnut sunniuteqartarpoq, siulittaasoq oqarpoq.
- Taamatut nalorninartumik inissinnerput tunngavigalugu ilaqutariippassuarnut aningaasaqarnikkut peqqinnissakkullu ernumatitsisoqarpoq, tamannalu imaannaanngitsuusinnaavoq.
Nuannersut aallussigit
Kathrine Bødkerip taamaammat ilaqutariit toqqissisimannginnerminnik qanoq iliuuseqarsinnaanerat ernummatigaa.
-Ulluinnarni ipianngunartutut allanngortutullu misigisarput angerlarsimaffinni qanigisanullu persutaanerulernermik kinguneqaratarsinnaanera annilaanngatigaara. Arlallit nalorninartumik inissinnerput peqqutaalluni sunnertisimasinnaapput uippakajaalersinnaappullu, taamaalillutillu ilaqutariippassuit sungiusaminnut naleqqiullugu atuarfiit matoorarnerisa, angerlartitaasoqarnerisa assigisaannillu peqquteqartut kingunerisaannik piffissarujussuaq atorlugu peqatigiinnerulersinnaalluti, Kathrine Bødker oqarpoq.
Kalaallit Nunaanni Naligiissitaanissamut Siunnersuisoqatigiinnit kaammattuutigineqassaaq tamatta immitsinnut paarilluassasugut.
-Ilaquttatit, suleqatitit, sanilitit ikinngutitillu qanoq innersut eqqummaariffigissavat. Corona-virusi, aningaasatigut ilungersunartut, nalorninartut nappaammullu annilaangassutit eqqartorsigit, kaammattuutigisaq taamatut nipeqarpoq. lyder det.
Ipiannguneq ilaquttannut allanulluunniit tutsinnaveersaaruk. Pitsaasorpassuittaaq eqqartorsigit, ikioqatigiigitsi, ilaqutariiullusi sammisaqaqatigiigitsi nuannersullu aallutaralugit, Kalaallit Nunaanni Naligiissitaanissamut Siunnersuisoqatigiit siulittaasuat Kathrine Bødker naggasiivoq.