Naligiissitaanissamut siunnersuisoqatigiit siulittaasuata Kielsen isornartorsioraa

Nunatta Eqqartuussiviata Mikael Petersen Siumup allaffiani arnanut arlalinnut kinguaassiuutitigut kannguttaatsuliortarsimasutut ilaannakkortumik pisuutitsineranut atatillugu, Kalaallit Nunaanni Naligiissitaanissamut Siunnersuisoqatigiit siulittaasuata isornartoqartippaa, inuit pissaanillit eqqartuussisoqarnerani sakkortuumik oqaaseqarsinnaatinneqarnerat.

Mikael Petersenip illersuisuata Siumup allaffiani pisartut oqaaserineqartartullu pillugit Nunatta Eqqartuussiviani eqqartuussisoqarnerani Kim Kielsen apersorpaa:

Imminut oqaluuteriaaseq qanoq isumaqarfigaajuk? Iviangigissoqartoq imaluunniit nulugissoqartoq oqartoqarsinnaava?

- Politikkimi taamaattoqartarpoq.

- Suiaassutsikkut immikkoortitsineq nikanarsagaallunilu tiingaffigineqarneq sumiluunniit pisarpoq, partiillu iluini pisimappat isornartorsiorneqarnera pissusissamisoorpoq.Naalakkersuisut siulittaasorisimasaata Kim Kielsenip oqaatigisaa: “politikkimi pissutsit taamaapput” assuarnartorujussuuvoq, Katrine Bædker sisamanngormat eqqartuussisoqareersoq Facebookimigut allappoq.

- Assuarnarpoq, arnanik asissuinermik takutitsisoq, inunnullu tamanut - suiaassuseq apeqqutaatinnagu - ataqqinninnginnermik takutitsilluni. Oqaaseqaatit taamaattut nikanarsagaalluni tiingaffigineqarnerup kultoorimut attuumassuteqartutut, ikummatitut ipput. Uanga isumaqarpunga suliani nikanarsagaalluni tiingaffigineqarnerni arnat oqaatigisaat ukkatarineqassasut, politikkikkullu pissaaneqarniarnermut tunnganersoq eqqartugassaanngitsoq, siulittaasoq ingerlaqqilluni allapoq.

Pineqartoq sammineqarli

Eqqartuussisoqarnerani Naalakkersuisunut Siumumilu siulittaasuusimasoq alla, tassalu Lars Emil Johanen aamma Mikael Petersenimut iluaqutaasinnaasumik ilaatigut oqaaseqarluni oqarpoq, allaffimmi taamatut oqaluttoqariaaseqarneq nuannarinngikkaanni qimagutiinnartoqarsinnaasoq.

Kim Kielsenip aamma ilisimannittutut oqaaseqarluni Mikael Petersen taperserlugu oqaatigaa, suliaq Kielsenip pissaaneqarunnaarsinneqarnissaanik kissaateqarnermit tunngaveqartoq, Mikael Petersenilu unnerluutigineqarneratigut tamanna iluatsinneqarsimasoq.

Kathrine Bødkerip neriuutiginerarpaa, Nunatta Eqqartuussiviata pineqaatissiinera, siunissami taamatut pisoqaqqissappat inuiaqatigiit isiginnittaasiannut pitsaanerulersitsissasoq.

- Taamatut kannguttaatsiortarnerit inerteqqutaanerisa aalajangiiffigineqarnerat pingaaruteqarpoq, pineqaatissiissutaasorlu suut akuerineqarsinnaanerannut suullu akuerineqarsinnaannginnerannut tunngaviliissasoq; tassa suliffeqarfinnit aammali inuiaqatigiinni, taanna Sermitsiaq.AG-mut oqarpoq.

Naligiissitaanissamut Siunnersuisoqatigiinni siulittaasup aamma neriuutiginerarpaa, suiaassutsikkut immikkoortitsineq nikanarsagaallunilu tiingaffigineqartarneq sumiluunniit pisartut eqqumaffigineqarnerulissasut aamma unitsinneqassasut.

Allat isumassarsitissinnaallugit neriuutigineqartoq

Aki-Matilda Høegh-Damip aamma Mari Laursenip Mikael Petersenimut unnerluussisut ilagisaa marluusut neriuutigaat, suliami inerniliunneqartoq allat killissatik qaangerlugit pissusilersorfigineqartutu misigisimasut naameernissamut sapiissuseqarnerulersissagaat.

- Kisimiinngilagut, misigisimasattalu nipituumik oqaluuserineqarnissaat piffissanngorpoq. Inuit inuttut killiliisinnaanerat sorsuutigiuassavara - tamatta sorsuutigiuassavarput, Aki-Mathilda Høegh-Dam Sermitsiaq.AG-mut oqarpoq.

- "Annilaangassuteqanngikkaanni sapiissuseqartoqarsinnaanngilaq"isumaqarpungalu sapiissuseqarluta iliuuseqarsimasugut. Suliamik aallartitsiinnarata aammali suliap qaqinneqarnissaanik sorsuuteqartuarnitsigut, Mari Laursen suliap tusagassiuutitigut saqqummiunneqarneranit ukiup aappaa avillugu qaangiuttorlu eqqartuussisoqareersoq Facebookimigut allappoq.