Naligiissitaanermut siunnersuisoqatigiit oqaloqatigiinnermut sakkussamik saqqummersitsilerput
Nunatsinni naligiissitaanerup ullua, 20. maj malunnartinniarlugu Kalaallit Nunaanni Naligiissitaanissamut Siunnersuisoqatigiit oqaloqatigiinnermut qarasaasiakkut sakkoq saqqummersissavaat. Oqaloqatigiinnermut sakkussaq ataatsimoornermi naligiimmik naleqassutsimik annertusaatitsissaaq.
”Aperilaa”oqaloqatigiinnermut qarasaasiakkut sakkussaavoq, Kalaallit Nunaanni Naligiissitaanissamut Siunnersuisoqatigiit aamma ssiunnersortit suliffiutaat Greattalksimit inerisarneqarsimasoq, nunatsinnilu naligiissitaanerup ulluani 20. maj saqqummersinneqartussaq.
Oqaloqatigiinnermut sakkussaq naligiimmik naleqarneq suunersoq ataatsimoornermi oqaloqatigiuminartunngortillugu suliaavoq.
- Uagut inuit assigiinnik piginnaasaqarluta aallaaveqarlutaluunniit inunngunngilagut, tamanna immikkut inuunermi tunngavigeqarpugut, tamakkulu inummiit inummut assigiinngitsorujussuusinnaapput. Tamatta immikkut assigiinngitsunik inuunermi misilittagaqarpugut, Kalaallit Nunaanni Naligiissitaanissamut Siunnersuisoqatigiinni siulittaasoq Kathrine Bødker tusagassiorfinnut nalunaaruteqarluni allappoq.
Oqaloqatigiinnermi sakkoq ”Aperilaa”, sammisanik assigiinngitsunik imaqarpoq, sammisani ataasiakkaani naligiimmik naleqarneq pillugu oqaloqatigiinnermi peqataasut atorsinnaasaannik apeqqutinik arlalinnik imaqarluni.
Peqataatitsineq akuersaarneruvoq
Apeqqutit Kalaallit Nunaanni inuiaqatigiit sinniisaat workshopini arlalinni apeqqutinik ineriartortitsinermut tapersiisut suleqatigalugit pilersinneqarput.
- Assigiinngissuteqaraluarluta ataatsimoorfimmi ilaasutut misigisariaqarpugut, tassanili ersarippoq naligiimmik naleqarnerup suunera inuit akornanni oqaloqatigiissutigineqarnissaanik pisariaqartitsisoqartorujussuusoq. Naligiimmik naleqarneq oqaloqatigiissutigigaangatsigu ataatsimoorfeqarnermi tamatta peqataanissarput pineqaannarneq ajorpoq, pineqartussarli tassaavoq ataatsimoorfimmi inunnik nikanarsaaviunngitsumi avataatitsiviunngitsumilu tamatta peqataanissarput, oqaloqatigiinnermut sakkussap ineriartortissimanera nassuiarneqarpoq.
- Peqataatitsinerup asigiinngiiaassusseqarnerup akuersaarneqarnera assigaa, assigiinngiiaassuseqarnerup iluaqutaa tassaavoq inuit ataasiakkaat aassigiinngissutaasa akuersaarluni ataqqinnillunilu iliuuseqarfigineqartussat inissaqartinneqarsinnaanerat akuersaarneqarnissaallu, Kathrine Bødker allappoq.
Oqaloqatigiinnermi sakkussami anguniarneqarpoq isummat assigiinngikkaluarpataluunniit ataatsimoornermi naligiimmik naleqassuseqarnermik ataqqinninnissaq akuersaarnissarlu.
NunaFonden "Aperilaa"-p ineriartortinneqarneranut aningaasaleqaataavoq.