Naligiisitaanissamut Siunnersuisoqatigiit: Angutit aamma ulloqartinneqartariaqarput

Angutit atugaat aamma qiviagassaapput, inuiaqatigiinni ajornartorsiutit ilivitsumik isiginnittaaseqarluta avissaartuunnerlu pinaveersaartillugu ingerlanissaq ajunnginnerpaammat. Kajumissaarutigerusupparput angutit kikkulluunniit anguniakkaminnik sorsuutiginnittut ulloqalissasut, imminnut qiviarfigisinnaasaminnik, Naligiisitaanissamut Siunnersuisoqatigiit, tusagassiuutinut allapput.

Nunatsinni angutit arnallu naligiissitaanissaannut siunnersuisoqatigiit 2017-imi siullermeerutaasumik 28. februar naliginnaasumik ataatsimiipput, ullullu qanoq atorneqarnissaaa akuleruffigerusunngilaat.

Arnat suli sorsungassaqarput

- Nunatsinni arnat annertuumik suli sorsuutissaqarput, naak assigiinngitsutigut angutinut naleqqiullutik siuarsimaneruffeqaraluarlutik. Suiaassuseq tunngavigalugu annersaattarneq annertuvoq, persuttaasarneq nunatsinniinnaanngitsoq aammali nunani allani pisartoq, pilersitsisarpoq anersaakkut piitsuussusermik, naleqanngitsutut misiginermik, ammasumillu qunutitaannani isummersinnaanermik saqqummersinnaassuseqarnermillu akornusiissarluni, Siunnersuisoqatigiit siulittaasuat, Dorthe Korneliussen, oqarpoq nangillunilu:

- Inuk kinaluunniit inuiaqatigiinni oqartussaaqataanermik tunngavilimmi assigiimmik periarfissaqartariaqarpoq, tassaavoq naligiissitaanerup isumaa.

Ajortut sorlaat mannguninnikut pimoorussilluni aaqqiiviginiarneqartuarnissaat, Siunnersuisoqatigiit siulittaasuat tusagassiuutinut nalunaarummini naggasiivoq kaammattuillunilu.

Tatigeqatigiinneq ataatsimoornerlu

- Ikioqatigiinneq pissarsilluarfiusoq ataqqinninnermik suleqatigiinnermillu tunngavilik inuiaqatigiit qaffakkiartornissaannut kivitsisuuvoq pingaarnerpaaq, nukippassuit ajortumut, inuiaqatigiinnut akisoqisumut, saatinnagit, pitsaassumut arnat angutillu akunnerminni saatippatigit, ineriartornermik pilersitsissammat.