Naleraq: Kalaallit aqumiutut ilinniarluarsimasut amerlanerit atorneqartalerlik

Inatsisartuni ilaasortap Jens Napaattuupp (N) kissaatigaa, kalaallit aqumiutut ilinniarluarsimasaut kilisaani atorneqartarnissaat anguniarlugu politikkikkut suliaqartoqartariaqartoq. Royal Greenlandimiilli ilisimatitsissutigineqarpoq pineqartumi piviusoq allarluinnaasoq.

Kalaallit aqumiutut ilinniarluarsimasut aalisakkerinermik suliffeqarfinni atorneqarneq ajorput.

Naleqqameersoq Jens Napaattooq, kalaallit aqumiutut ilinniarluarsimasut amerlanerit kilisaatini atorneqartalernissaat anguniarlugu politikkikkut iliuuseqartoqarnissaanik ujartuisoq taamatut isumaqarpoq.

- Aqumiutut ilinniarsimasut naammattut pigaavut, maannalu taakku kilisaatini ingerlatsisalernissaat piffissanngorpoq. Aqumiut nunanit allaneersut atorneqaraangata akileraarutitigut isertitarineqartartut annissorneqartarput, tamanna unitsinneqartariaqarpoq, taanna tusagassiorfinnut nalunaaruteqarluni allappoq.

Ukkatarineqarnerulersimasut, naammanngitsulli

Royal Greenlandimiilli erseqqissaassutigineqarpoq, tamanna ajornaatsuinnaanngitsoq.

- Royal Greenlandimi aalisakkerinermillu suliaqarfinni ukiut kingulliit qulit ingerlaneranni nunaqavissut aqumiutut ilinniartinnqarnissaat ukkatarineqarnerulersimavoq. amerlanerilli ilinniartinneqarsimagaluartut aamma nunaqavissut amerlanerit aqutsisusut atorfinnut atorfinitsinneqartaraluartut, suli naammanngillat, Suliffeqarfissuarmi Attaveqartarnermut pisortaq Masaana Egede Sermitsiaq.AG-mut oqarpoq.

Taassuma erseqqissaassutigalugu oqaatigaa, suliffeqarfimmit inuttat pillugi nalunaarut atuuttoq, politikkikkut aalajangiunneqarsimasoq malinneqartoq.

- Angallatini aqumiut taakkulu immikkut inuiaassuseqarnerat pillugit oqallittarneq nutaajunngilaq, oqallittoqartarneranilu ajoraluartumik pissusiviusut saqqummiunneqarneq ajorput, tamatuma malitsigisaanik pissusiviusut ilaannakortumik saqqummiunneqartarput. Tamanna pisariaqanngitsumik inuttaasut akornanni pakatsisitsisarpoq, minnerunngitsumillu imarsiortut suminngaanneersuugaluartulluunniit ullut tamaasa sulisarlutillu nunatsinnut aningaasalersuisut akornanni pakatsisitsisarluni, Masaana Egede oqarpoq.

Ilinniarsimaneq naammanngitsoq

Inatsisartuni politikkerip aamma oqaatigaa, kalaallit aqumiutut ilinniarsimasut ilinniarsimasutut uppernarsaataat nunani tamalaani atorneqarsinnaasut, taakkulu ilisimasaat maanna atorneqartariaqalersut.

- Aqumiut misilittagallit naammattut pigisagut ataatsimeersuartitsigit suleqatigalugillu,
peqqussut Naalakkersuinikkut atuutussanngorlugu naammassillugu suliaritigu, Jens Napaattooq erseqqissaavoq.

Masaana Egedelli ilinniarsimasutut uppernarsaatit imminerminni naammanngitsut erseqqissaassutigaa.

- Ilinniarsimanermut uppernarsaatit misilittakkanut, piginnaasanut aqutsisinnaanermullu ukiorpassuarni ineriartortinneqartartunut peqatigitillugit atorneqartussaapput. Nunat eqqaamiugut, uagutsinnut sanillersuuttakkavut eqqarsaatigissagutsigit, taakku ilinniartittagaannit uagut ilinniartittakkavut ikinneerarsuupput.

- Politikkerit oqallinnerminni qitiutittariaqarpaat, aqumiutut ilinniartitsisarnerit imarsiornermilu ilinniarnerit iluini atuuffiit assigusut pillugit ilinniartitsinissat ukkatarineqarnissaat, Masaana Egede oqarpoq.

Powered by Labrador CMS