Naleraq: Danskit naalagaaffiat nammineerluni sakkutuunut inissialiortariaqaraluarpoq

Inatsisartuni ilaasortaq, Emanuel Nûko (N) paragraf 37 naapertorlugu sakkutuunut Nunatsinniittunut ineqartitsisarnermut tunngatillugu apeqqutink nassiussivoq. Danskit naalagaaffia sakkutuut sulisitani Nunatsinni inissaqartittariaqarai, taanna isumaqarpoq.

Illoqarfissuarmi inissaaleqineq nutaarsiassaanngilaq. Innuttaasut ukiut 20-t missaani Ini A/S-ip Iserit A/S-iluunniit inissiaataanut utaqqisinneqartarput. Taassumallu saniatigut inissiat nalinginnarmik akisoorujussuusarlutik.

Emanuel Nûko-p Naleqqameersup maanna ineqarnermut tunngatillugu oqalliseqataalerpoq. Taanna paragraf 37 naapertorlugu Naalakkersuisunut apeqquteqarpoq. Ilaatigut danskit namminneq sakkutuunut inissialiorsinnaannginnersut apeqqutigalugu.

- Nuummi inissaaleqineq annertuujummat Nuummilu innuttaasut nunaqavissut inissaaleqisut sivisumik inissiamik pissarsiniartarmata. taamaakkaluartoq sakkutuunut Namminersorlutik oqartussat inissiataanni ineqartitsisoqarpat tulluanngitsutut isigaara. Tassami Qallunaat naalagaaffiata sakkutuut sulisitani nunatsinni inissaqartitariaqarmagit, politikkerip ilaatigut apeqquteqarnerminni taama tunngavilersuivoq.

Inissamik neqeroorfigineqarnissaq sivisusinnaasarmat sakkutuut utaqqisuniit salliunneqarnerat Inatsisartuni ilaasortap naapertuilluanngitsutut isumaqarfigaa.

- Imaattariaqanngilarmi nunaqavissut kalaallit ukiuni arlalinni utaqqillutik inissaaleqisut
saneqqutiinnarlugit sakkutuunut inissiaatigut attartortissagigut nunaqavissummi kalaallit
inissaaleqimmata, Naleraq tunuliaqutaralugu politikeri tunngavilersuinermini naggasiivoq.

Sakkutuunut inissiat inissialiartortatunut namminersortunut isumaqatigiissutaasut, Issittumi Sakkutooqarfiup Sermitsiaq.AG-imut paasissutissiissutigaa. Danskit sakkutuuisa Namminersorlutik Oqartussaniit ineqartinneqanngillat.

Nuummi Issittumi Sakkutooqarfimmi atorfillit katillugit 70-t missaaniipput.

Powered by Labrador CMS