Naleraq timmisartoqarfissat pillugit naatsorsueqqusisoq
Innuttaasut timmisartoqarfiliornerit kinguneqaatissaannik tamanik takunnissinnaasariaqartut, partiimit oqaatigineqarpoq. Naatsorsuisimanerit nutaat takkutilersut Naalakkersuisup neriorsuutigaa.
Naalakkersuisut Mittarfeqarfiit siunissaat pillugit inatsisissatut siunnersuut tusarniaassutigivaat. Siunnersuummi takuneqarsinnaavoq, akitsuutit pisortat ingerlatseqatigiiffiutaata siunissami miliuunilikkaanik amigartooruteqartarnissaanut angalasut tamarmik akilertagassaat atuutsinneqarnissaat pisariaqalersinnaasoq.
Mittarfeqarfiit Nuummi, Kangerlussuarmi Ilulissanilu timmisartoqarfiit ingerlanneqarneranni isertitarisartakkani annaagunigit amigartooruteqalissapput.
Akitsuutinik nutaanik atuutsitsisoqalersinnaanera nalunaarutigineqarmat naalakkersuisooqataasut partiiata Naleqqap piumasaraa, timmisartoqarfiliornerit inuiaqatigiit aningaasaqarnerannut kinguneqaatissai misissoqqissaarneqassasut.
Oqaaseqartartup Jens Napaattuup Sermitsiaq.AG-mut oqaatigaa, politikkerit siunissami paasissutissat tunngavilersorluakkat tunngavigalugit aalajangiisarnissamut pisussaaffeqarmata aamma innuttaasut nunami sanaartornerit annersaata aningaasaqarnermut kinguneqaatissaannik ilisimanninnissamut pisinnaatitaaffeqarmata misissueqqissaartoqartariaqartoq.
Akigititat qaffasereersut
Taanna isumaqarpoq, Mittarfeqarfiit pillugit inatsisissatut siunnersuut assersuutaasoq, timmisartoqarfiit aningaasaqarnerisa tamakkiisumik takuneqarsinnaannginnerannut.
- Mittarfeqarfiit isertitassaminnik amigaateqalissapput, maannalu akitsuusiinikkut tamanna matussuserniarneqalerpoq.
- Tamanna Naleqqami ajuusaarutigilluinnarparput, innuttaasummi angallannermut annertoorujussuarnik akiliuteqartareerput, Jens Napaattooq oqarpoq.
Taassuma oqaluttuaraa, Naleqqap partii naalakkersuisooqatini Inuit Ataqatigiit suliat tamarmiusut inuiaqatigiit aningaasaqarnerannut kinguneqaatissananik misissueqqissaartoqarnissaanik upernaakkut ataatsimiinnermi piumasaqarfiginiaraa.
- Maanna unneqqarissuunissaq pisariaqartoq
Suliat aallartinneqareersut misissueqqissaarneq sumut atorniarpisiuk. Suliat allanngortinneqarnissaannik piumasaqarniarpisi?
- Misissueqqissaarnerit qanoq takutitsissanersut apeqqutaalluinnarpoq. Misissueqqissaarnerit akiliisinnaajunnaariartortugut takutissappassuk, nalilersueqqittariaqassuugut.
- Maanna unneqqarissuunissaq pisariaqartoq isumaqarpugut, Jens Napaattooq oqarpoq.
Attaveqaasersuutinut Naalakkersuisup Mariane Paviasenip (IA) Sermitsiaq.AG-mut allakkatigut akissuteqarluni ilisimatitsissutigaa, naatsorsuisimanerit nutaat, Nuummi Ilulissanilu timmisartoqarfiliornerup inuiaqatigiit aningaasaqarnerannut kinguneqaatissanik nutarterisut takkutingajalersut:
- Nuummi Ilulissanilu timmisartoqarfiliornerit inuiaqatigiit aningaasaqarnerannut kinguneqaatissaasa nutarterneqarnerat naammassineqangajalerpoq, Naalakkersuisunullu piaartumik saqqummiunneqassallutik, Mariane Paviasen oqarpoq.
Misissueqqissaarsimaneq ataatsimiititaliamut saqqummiunneqassasoq
Naalakkersuisut oqaatigaa, Qaqortumi timmisartoqarfiliornissap nutaamik misissoqqissaarneqarsimanerani aamma timmisartoqarfiliornerit pillugit nassuiaat Naalakkersuisunit siorna saqqummiunneqarsimasut:
- Nassuiaat inuiaqatigiillu aningaasaqarnerannut kinguneqaatissanik nalilersuisimaneq ataatsimoortumik misissueqqissaarsimanermik nutartigaapput aamma inatsit 2018-imili akuersissutigineqarmat nutaatut tunngavissaalersimallutik, taakku suliat inuiaqatigiit aningaasaqarnerannik erseqqissaassutaasuupput.
- Misissueqqissaarsimaneq Naalakkersuisunit suliarineqarsimaleriarpat tamanut saqqummiunneqassaaq, naatsorsuutigaaralu misissueqqissaarsimanermi paasisat Inatsisartut Aningaasaqarnermut Akileraartarnermullu Ataatsimiititaliaanut saqqummiutissallugit, Mariane Paviasen oqarpoq.
Inatsisartut ukiakkut ataatsimiinnermi aalajangerput, Qaqortumi mittarfissaq 1.500 meteriussasoq, timmisartoqarfiliornermi akiligassaq en milliard koruunit missaannut qaffassimagaluartoq. Naleraq aalajangiinermut tapersiisimavoq.
Sermitsiaq.AG-p 2021-mi februaarip qaammataani oqaluttuaraa, Nuummi Ilulissanilu timmisartoqarfiliornerit 900 millioner koruuninik akisunerulersimasut, taamaammallu Kalaallit Airports aningaasanik immikkut taarsigassarsinissamut akuerineqarsimasoq.
Serrmitsiaq.AG-mit Naalakkersuisut suliamut atatillugu oqaaseqartinniarneqarput. Naalakkersuisut nittartagaanni suliami takussutissat naatsorsuisimanerillu takuneqarsinnaapput.