Naleraq nutaamik siulittaasortaassasoq: Najukkani immikkoortortaqarfiit aalajangiissapput

Naleqqami siulersuisuunerit, inatsisartuni ilaasortat najukkanilu tamani immikkoortortaqarfinnit sinniisuutitat arfininngornermi video aqqutigalugu immikkut ittumik ataatsimeersuassapput, tassani siulittaasussamik nutaamik kiisalu siulittaasup tullissaanik marlunnik, aningaaserisussamik, siulersuisuunerusussanillu aamma partiimi sinniisuutitassanik qinersisoqassalluni.

Sermitsiaq.AG-mit ulluni arlalinngortuni Naleqqami Hans Enoksenip siulittaasutut taartissaatut kina sassarniarnersoq paaserusunneqarsimavoq.

Siulittaasussatulli piukkunneqarnerpaat marluusut arlaannaalluunniit siulittaasussatut sassarniarlutik erseqqissumik nalunaaruteqarsimanngillat.

Najukkani immikkoortortaqarfiit tamarmik piukkussaminnik inassuteqassasut

Pele Brobergip suli oqaatigerusunngilaa, partiimi siulittaasussatut nutaatut sassarniartut akornanniinnerluni.

- Hans Enoksenip tunuarnera aamma immikkut ittumik ataatsimeersuartoqarnissaa ataqqillugit, najukkani immikkoortortaqarfiit politikkikkut aqutsisussanut nutaanut qanoq kissaateqarnersut tusaqqaarusuppara.

Jens Napaattooq sapaatip-akunnerani matumani siusinnerusukkut aaqqissuisoqarfimmit aperineqarsimasoq aamma taamatut oqaaseqarpoq.

Arfininngorpat ataatsimeersuarnermi oqaluuserisassat siullersaraat, najukkani immikkoortortaqarfiit tamarmik immikkut siulittaasorerusutaminnik inassuteqarnissaat, piukkunneqartullu arlaqarpata siulittaasussamik qinersisoqassalluni.

Tamarmik utaqqimaartut

Najukkani immikkoortortaqarfinni, Inatsisartuni ilaasortani kiisalu siulersuisuunerni ilaasortani taasisinnaatitaasut katillugit 23-upput.

Politikkikkut oqaaseqartartup Christian Schultz-Lorenzenip sapaatip-akunnerani matumani siusinnerusukkut oqaatigaa, Pele Broberg, Jens Napaattooq aamma Kiista Fencker siulittaasussatut piukkunnartuusut, tassanili aamma nassuerutigalugu Kiisat Fenckeri salliutinneqassagunanngitsoq.

Kiista Fenckerip tamatuma kingorna ilisimatitsissutigaa, suli misilittagakippallaarnini pissutigalugu siulittaasuunissaq soqutiginagu.

Jens Napaattooq Pele Brobergitulli siulittaasussatut imminut inissinnianngilaq, angutilli taakku marluullutik akisussaaffimmik tiguserusunngillat, tassa ataatsimeersuarnermi amerlanerussuteqartut taakku siulittaasussatut kissaatiginngippatikkit.

Tamarmik immikkut immaqa inissaqartinneqarsinnaasut

Jens Napaattooq nammineerluni oqarnikuuvoq, qanga nuannerpallaanngitsunik pisarsimanera partiimi qullersatut piukkunneqarsinnaaneranut aporfiliisinnaasoq.

Immaqa takorloorneqarsinnaavoq, partiimi Pele Brogerip siulittaasutut, Jnes Napaattooq politikkikkut siulittaasup tulliatut Kiista Fenckeri aaqqissuussaanermi siulittaasup tulliatut inissinneqarsinnasut.

Aamma soorunami Ruttsi Lynge Lennerteqarpoq, taanna Hans Enoksenip partiimi siulittaasutut tunuarnera pillugu siulersuisuunerit sinnerlugit siulittaasuugallartutut nalunaaruteqartuuvoq.

Taassuma KNR-imut oqaatigisimavaa, siulersuisuunernit siulittaasunngorniaqquneqarsimalluni.