Sapaatip-akunnerani matumani ataasinngormat saqqummiunneqarpoq, partiimik Naleqqamik pilersitsisoq siulittaasorlu Hans Enoksen, inuttut atukkani pissutigsalugi siulittaasutut ingerlaannartumik tunuarsimasoq.

Naleraq taamaammat arfininngornerup ullaavani immikkut ittumik ataatsimeersuarpoq, tassanilu siulittaasussamik nutaamik qinersisoqarluni.

Politikkeritut nuimasut Pele Broberg aamma Jens Napaattooq Enoksenimik taarsiisussat piukkunneqarsimapput, taakkuli marluullutik siulittaasussatut sassarniarnerlutik nalunaaruteqarsimanngillat.

Ataatsimeersuarnermi partiip najukkani immikkoortortaqarfiisa kina partiip siulittaasussaatut inassutigisussaasimavaat, tassanilu Pele Broberg Jens Napaattoorlu siulittaasussatut inassutigineqarlutik.

Napaattooq qujaannartoq

Jens Napaattooq inuttut atukkani pissutigalugit inassutigineqarnerminut qujaannarpoq. Siulittaasuuneq suliassaqarfiuvallaartoq, politikkeri oqarpoq.

- Pele-p suliassamik qaqitsisinnaanera tatigaara, siulittaasuuneranilu tapersersussavara, Napaattooq oqarpoq.

Pele Brobergili suliassamik tigusinissamut piareersimanerarpoq.

Pele Brobergip politikkikkut suliarisimasai tunngavigalugit siulittaasussatut inassutigineqarpoq, tassani ilaasortat siulittaasunngortup suliaqartarnera, erseqqissumik oqaaseqartarnera isummaminillu annissisinnaanera tatigalugu oqaaseqarlutik. Tassa politikkimi partiimilu isummaminik annissisinnaammat. Pele Brobergi ammasuusutut inussiarnertuusutullu oqaatigineqarpoq.

Partiimi siulittaasuunissamut piareersimasoq

Pele Brobergip nammineerluni oqaatigaa, partiimi ilaasortatut suliaqarunnaarluni partiimi maanna siulittaasuulerniarluni.

Pele Brobergip erseqqissaassutigaa, partiimi tamanut siulittaasuuniarluni aamma ilaasortat tamaasa peqataatittarniarlugit. Tamatuma kingorna unammillerteqarani siulittaasutut qinigaavoq.

Siulittaasussamik qinersisoqareermat, siulittaasup tullissaanik qinersisoqarpoq, tassanilu Jens Napaattooq Naleqqap Ilulissani Tasiilamilu immikkoortortaqarfianit siulittaasup tullissaatut inassutigineqarluni.

- Ilulissani Tasiilamilu immikkoortortaqarfiit inassuteqaataat nuannaarutigaara. Kikkut tamaasa suleqatigisinnaavakka. Pelelli suleqatigisartakkatut qaninnerpaatut suleqatigisarnera tulluussimaarutigaara. Piginnaaneqartuuvoq siulittaasussatullu naleqqulluinnarluni, Napaattooq oqarpoq.

Siulittaasup tullissaa qinerneqartoq

Jens Napaattooq siulittaasup tullissaatut qinerneqarpoq, qinerneqarninilu qujassutigalugu:

- Tatigineqarnera tulluussimaarutigaara. Hans Enoksenip oqarsimaneratuut, pissaanermik taamak annertutigisumik tigummiaqarnitsinni maniguutissaagut. Ilissi pillusi sulivugut, sulinerpullu partiimi maniguulluta ingerlateqqissavarput.

Politikkikkut qaffasinnerusumik atuuffeqartussat marluk unammillerteqanngitsumik qinigaasut, aaqqissuussaanermi siulittaasup tullissaanut qinigassanngortittut sisamaapput.

Tassani Knud Fleischer aaqqissuussaanermi siulittaasup tulliatut qinigaavoq.