Naleraq missiliut pillugu: Suliniut iluatsittussaanngitsoq

Tunngaviusumik inatsisissatut missiliut tallimanngornermi innuttaasunut saqqummiunneqartoq, partiini aqutsisut pissusissamisoortumik assigiinngitsorujussuarmik isigaat. Illuatungiliuttut nangaassuteqarput, IA Siumullu suliaq naammassisoq nuannaarutigigaat.

Kalaallit Nunaata immaqa tunngaviusumik inatsisissaata siulliup saqqummiunneqarneranut aamma tunniunneqarneranut atatillugu, Siumup allaffeqarfiini partiillu torsuusaqarfiani nuannattoqarpoq.

- Tunngaviusumik inatsisissatut missiliummik siullermik namminiilivinnissamut alloriarneq siulleq tiguarput. Maanna missiliutip imarisaa pillugu inuiaqatigiinni politikkikkullu oqallittoqarnissaa alloriarfiussaaq, Siumumi siulittaasoq Erik Jensen, Sermitsiaq.AG-mut taama oqarpoq.

Tunngaviusumik inatsit pillugu Isumalioqatigiissitat aamma tunngaviusumik inatsimmut missiliut Siumup soqutigisarilluinnarpai. Taamaammallu Siumup ulloq nalliuttorsiutigalugulu ilaasortat akornatsinniikkunnaareersut eqqaamaniarlugit atorpaat:

- Ilaasortat amerlasuut matuminnga ilungersuuteqarsimasut akornatsinniikkunnaareerput. Taakku soorunami ullumikkut eqqaamavagut, siulittaasoq oqarpoq.

Naammaginanngitsoq

Naleqqami annerusumik nuannaarutigineqanngilaq:

- Atuarpara, pilersinniarneqarneralu ilungersunartuuvoq. Kukkusumik aallartinneq pissutigalugu, suliniut iluatsittussaanngitsutut oqaatigerusuppara. Politikerit siuttuuffigisassarinngisaraluannut siuttuutinneqarnikuupput, Naleqqami siulittaasoq Pele Broberg oqarpoq, nangillunilu:

- Missiliummik suliaqarnissamut ilisimasallit sulisinneqartussaagaluarput, tamannalu kingorna politikkikkut isummerfigisinnaassavarput. Taamaalilluta ukiut tallima 30 millionit koruunillu sipaarneqarsimassagaluarput, taanna oqarpoq.

Tunngaviusumik inatsisissamik suliaqarneq taakku partiit annerit marluk nuannareqqusaarnerannik ingerlanneqarsimasoq, taanna aamma isumaqarpoq.

- Sisamanngornermi Inatsisartuni oqallittoqarnerani namminiilivinnissamik kissaateqarnermut tunngatillugu ataatsimut ingiaqatigiittoqarpasinngilaq. Ersarinnerpaamik itigartitsineq IA-meerpoq, inuit atugaannut aatsaat kinguneqartitsissanngippat namminiilivinnissamut peqataaniarlutik oqaatigaat.

Oqallinnissamut tunngavissaalluartoq

Innuttasut Inatsisartullu tunngaviusumik inatsisissap pilersinneqarnissaanut pilersitsisuusussat missiliutip imarisaanut isummernissaanut alloriarfiussasoq, IA-mi siulittaasoq Múte B. Egede, Sermitsiaq.AG-mut oqarpoq.

- Naalakkersuisuni siulittaasuutillunga tunngaviusumik inatsisissatut missiliut amusartumut inissinneqannginnissaanut qulakkeerinneqataassaanga, taanna namminiilivinnissamut ingerlanermut tunngavileeqataassaaq.

Ilisimatusarfimmi nalliuttorsiornartumik pisumi tunngaviusumik inatsisissatut missiliut 49-nik paragrafeqartoq saqqummiunneqarpoq.

Tukattumik ingerlaneq naammassisoq

Tunngaviusumik inatsit pillugu Isumalioqatigiissitat suliaat ukiut ingerlaneranni politikkikkut aalajangiiffigiumaneqartanngilaq, partiillu ilaasa isornartorsiortarpaat.

- Suliaq oqitsuinnaanngilaq. Tukattumik ingerlanneqarpoq, kiisamilu naammassineqarpoq. Maanna imarisaa tamakkerlugu atuaqqissaarnissaa qilanaaraarput, tullianilu oqallisigalugu aamma isumaqatigiissuteqarluni aaqqiissuteqarfiginissaa, Demokraatini siulittaasoq Jens-Frederik Nielsen, Sermitsiaq.AG-mut oqarpoq.

Nalliuttorsiornartumik pisoq pineqartunit arajutsineqarluni pisoq, taanna oqarpoq. Tassa innuttaasunit:

- Tunngaviusumik inatsisissatut missiliut pillugu annertuumik paatsiveerusimaarfiusimavoq, kisianni innuttaasut annerusumik soqutiginniffigisimanngilaat. Qinersisartut meeqqat atugaannut inissiallu pitsaanerusut soqutiginerugaat, misissuinerit takutippaa. Maanna missiliut pillugu qanoq oqallikkumaarnersugut pissanganassaaq, Jens-Frederik Nielsen oqarpoq.

Atassut aamma tunngaviusumik inatsisissamut missiliutip suliarineqarneranut sakkortuumik isornartorsiuisarput.

- Soorunami isummagut assigiinngillat, tunngaviusumik inatsisissaq pillugu isumalioqatigiissitat suleriaasaat aamma isornartorsiornikuuarput. Maanna missiliut saqqummiuppaat, maannalu politikkikkut qulequttat isumaqatigiissutigisagut nasaariniassavagut isumaqatiginninniarlutalu, siulittaasoq Aqqalu Jerimiassen oqarpoq.

Tunngaviusumik inatsimmik aallaaveqartoq

Tunngaviusumik inatsisissamik sulineq ilinniarfiusimassasoq, taassuma neriuutigaa, taamaalilluni siunissami isumalioqatigiissitat assingusut aningaasat ikinnerusut atorlugit ingerlanneqartassammata, aamma taarseraaffiunnginnerullutik torernerussammata.

- Suliaq sivisoorsuarmik ingerlanneqarpoq, maannalu kiisami piareertoq takuara. Suliaq Inatsisartunit amerlanerussuteqartunit taperserneqarmat, inuiaqatigiinnut iluaqutaajumaartoq partiitsinni neriuutigissavarput. Suleqatigiissutiginissaanut ammavugut, Aqqalu Jerimiassen oqarpoq.

Kalaallit Nunaata Tunngaviusumik inatsisissaanut siulliugunartumut missiliummik suliaqarnissamut Siumut qilanaarpoq.

- Soorunami isumalioqatigiissitat aalajangiiffigisimanngisaat arlaqarput. Maanna politikkikkut inuiaqatigiinnilu ataatsimoorussamik tunngavissatsinnik nassaarniassaagut, taamaalilluta nunap namminiilivinnissaanut ingerlaqatigiissagatta. Oqallinnissat qilanaaraakka, Erik Jensen (S) oqarpoq.

Powered by Labrador CMS