Skip to main content

Naleraq Kuannersuarni aatsitassarsiornissamik unitsitsiniarpoq

Siumumit Kuannersuarni aatsitassarsiornissaq tapersersorneqartoq, Naleraq qinersisoqareerpat pissaanermik tigusissaguni IA-tulli suliniummik unitsitsiniarpoq.

Partiit arlallit Narsap eqqaani Kuannersuarni suliniummut isummatik erseqqissumik saqqummiussimalerpaat.

Inuit Ataqatigiit isertuutinngisaannarpaat uranimut Kuannersuarni qalluinermi saniatigut qallorneqartussamut akerliulluinnarnertik, aammali oqaatigisarpaat Kuannersuarni qalluiniarnermut akerliullutik.

Múte B. Egedep sapaatip akunnerani kingullermi KNR-imut oqaatigaa, apriilip arfernani qinersisoqareerpat IA pissaanermik tigusissappat suliniut unitsinniarlugu. 

Amerlanerussuteqalersinnaasut

Naleqqamilu ilaasortat peqatigalugit amerlanerussuteqarlersinnaapput. Pele Brobergimmi annertuunik aatsitassarsiortoqarnissaa tusarusunngivippaa, tassa ”Danmarkimik aviteqatigiissutigineqarnissaat” pineqartillugu

Partiit taakku marluullutik ukioq manna januaarip qaammaataani isumasiuisoqarmat (IA) 13-inik (N) sisamanillu ilaasortaatitaqalertussatut siulittuiffigineqarput, taamalu Inatsisartuni amerlanerussuteqarlersinnaallutik. 

Free association

Free association sorsunnersuup aappaata naanerata kingorna, FN-ip nunasiaateqartoqarunnaarnissaanik suliniuteqarnerata ilaatut saqqummiunneqarpoq. Free association naalagaaffiit namminersortut marluk, nalinginnaasumik nunasiaataasimasup nunasiaateqarsimasullu akornanni isumaqatigiissutaavoq. Isumaqatigiissut malillugu nunasiaateqarsimasup nunasiaataasimasoq sinnerlugu naalagaaffittut suliassat arlallit isumagisussaavai. Ilaatigut tassaasinnaallutik naalagaaffimmi innuttaassuseqarneq aamma nunanut allanut politikki, tunngaviatigulli suliassat tamarmik isumaqatigiissummut ilaatinneqarsinnaapput. Free association pillugu isumaqatigiissummi Kalaallit Nunaanni inuiaqatigiinni suliassat arlallit naalagaaffiup allap isumagisinnaavai. Pissarsiffik: Aalborg Universitet

- Qaqqaq qimaajunnanngilaq, sooq taava massakkut piiaasoqassava, Naleqqami ilaasortaq Pele Broberg aperivoq.

- Namminersorneq pillugu inatsimmi isumaqatigiissut naapertorlugu, isertitsissutigineqartuni tamani 75 millioner koruunit siulliit ataatsimoortumik tapiissutinik ilanngaatigineqassapput. Ataatsimoortumik tapiissutit nalingi sinnerlugit ukiumi ataatsimi isertitaqassagutta, ataatsimoortumik tapiissutisissaassaagut, tassa ukiuni tulliuttuni qanorluunniit isertitaqartigigaluarutta, taamalu nunatta karsia imaarutissalluni, taanna erseqqissaavoq.

Uran pillugu innuttaasunik taasititsinissaq

Naleqqamit siusinnerusukkut oqaatigineqarnikuuvoq, ullumikkut Naalagaaffeqatigiinnermut taarsiullugu free associationip atuutsinneqalernissaa sulissutigineqarniartoq. Free associationip ilisarnaatigaa, naalagaaffiit tamarmik namminneq tunngaviusumik inatsiseqarlutik suleqatigiinnerat.

- Free associationimik taasititsinermut atatillugu uran pillugu apeqqut aamma ilanngukkusupparput. Nunami urani piiarneqassanersoq inuttaasut qulaatiinnarlugit aalajangerneqassanngilaq, Pele Broberg oqarpoq.

Lov om Grønlands Selvstyre

§ 8. Kalaallit Nunaanni Namminersorlutik Oqartussat Kalaallit Nunaanni atortussiassanik aatsitassanik iluaquteqarnikkut isertitaqassappata, tak. § 7, naalagaaffiup Namminersorlutik Oqartussanut tapiissutai ukiumi pineqartumi isertitat 75 mio. kr.-nit amerlanerussutaasa affaannut naleqquttumik apparneqassapput.

Tassungalu atatillugu Atassummi siulittaasumit Aqqalu Jerimiassenimit taperserneqarpoq. Taassumami innuttaasut tusarniaaffigineqartinnagit Kuannersuarni suliniut pillugu partiip isumaa saqqummiukkusunngilaa. Oqaatigisimavaami innuttaasut isumaat partiimit malinneqarniartoq.

Erik Jensen Siumullu siulersuisuunertaavi Kujataani aatsitassarsiornissaq pillugu erseqqissumik nalunaaruteqarnissamut tunuarsimaarsimapput, Erik Jensenilli Sermitsiaq.AG-mut erseqqissaassutiginikuuaa, partiip malittarisassaani erseqqissumik allassimasoq Siumut aatsitassarsiornermi suliniutinut Aatsitassat pillugit Namminersorlutik Oqartussat inaatsisaannik malinnittunut tapersersuisoq. Kuannersuit taasani aamma pineqarlutik, taanna ilisimatitsivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER