Naleqqussaaneq: Upernavimmi aalisartut aalisarnertik ingerlatiinnarsinnaavaat
Naalakkersuisut aqutsiveqarfimmi Upernavimmi oktobarimut pisassiissutit allanngortissimavaat, aalisartut taamaalillutik aalisarnerminnik ingerlatsiinnarsinnaalerput.
Upernavimmi umiatsiaararsorlutik qaleralinniartut aalisarnertik ingerlatiinnarsinnaavaat. Naalakkersuisunit ippassaq nalunaarutigineqaraluarpoq, aqutsiveqarfimmi pisassiissutit tamakkerneqarsimammat qaleralinniarneq oktobarip 13-iata tungaanut unitsinneqarallartoq.
- Aalisarnermut Piniarnermullu Naalakkersuisup aqutsiveqarfimmut Upernavimmut umiatsiaararsortunut qaammammut pisassiissutigineqartut oktobarip 12-anni naleqqussaavigai, pisassiissutigineqartut nungulermata. Taamaalilluni aalisarneq ingerlatiinnarneqassaaq, aalisarneq oktobarip 13-ianni unitsinneqarani, Aalisarnermut Piniarnermullu Naalakkersuisoqarfik naatsumik tusagassiorfinnut nalunaaruteqarluni ilisimatitsivoq.
Oktobarimut pisassiissutigineqartut naleqqussaavigineqarput, novembarimut pisassiissutigineqartut 173 tonsit aamma decembarimut 188 tonsit oktobarimut nuunneqarmata, Naalakkersuisoqarfimmit ilisimatitsissutigineqarpoq.