Naleqqap Unesco Ilulissani atorunnaarsikkusuppaa
Avannaata Kommuniani kommunalbestyrelsimut ilaasortaq, Anthon Frederiksen (N), Ilulissat Unescomut ilaajunnaarnissaanut siunnersuummik saqqummiussinissaminut piareersimavoq. - Unescop sanaartornissamut periarfissat killilersorpai, Anthon Frederiksen oqarpoq.
Ilulissat kangerlua, Kangia, 2004-mi Unescop nunarsuarmi kingornussassatut allattorsimaffiannut ilanngunneqarpoq.
Anthon Frederiksen Avannaata Kommuniani kommunalbestyrelsimut ilaasortaq aalajangiisinnaasuuguni, illoqarfik nunarsuarmi kingornussassanut ilaajunnaassagaluarpoq, illoqarfimmi sanaartornissamut periarfissanik killilersuimmat.
Taamaammat Kangia Unescomut ilaajunnaarnissaanut siunnersuuteqarnissamut piareersimavoq.
Allanngutsaalisaq killilersuivoq
- Ukiuni 20-ni kingullerni illoqarfimmi annertuumik ineriartortoqarpoq, illoqarfiullu ineriartortinnissaanut periarfissat ikiliartuinnarfiannut killippugut, imeqarfinnut killeqarfiit aamma killilersuimmata. Mittarfiullu allineqarnerani aqqusernit pitsaanerusut pisariaqartinneqalerput, Anthon Frederiksen Sermitsiaq.AG-mut oqarpoq.
Mittarfimmut aqqusinermik nutaanik sanaartornissamut periarfissamik, avatangiisinut naalakkersuisup Kalistat Lundip qulakkeersinnaanngikkaa, taanna ilisimatitsivoq. Anthon Frederiksenip oqarnera naapertorlugu, qaammatip siuliani ataatsimiinnermi tamanna ilisimatitsissutigaa.
- Illoqarfimmik ineriartortitsinissamut allamik periarfissaqarpugut, tassa Unescomit allanngutsaalisap tungaanut. Unescomut ilaajunnaarutta, illoqarfiup ineriartortinnissaanut piumaneqarluinnartunik peqalissaagut. Sanasut suliffeqarfiutaasa sumiiffik kusanartoq sanaartorfigerusuppaat, periarfissallu amerlanerit ammaanneqassasut isumaqarpunga. Kangiata tungaanut sanaartornissamut akuerineqarutta, inuussutissarsiortut takornariartitsisartullu annertuumik iluaqutigissavaat, Anthon Frederiksen erseqqissaavoq.
Takornariat tikittarunnaarsinnaanerat ernumaginngikkaa
Taassuma oqarnera naapertorlugu, Kangiata nunarsuarmi kingornussassanut allattorsimaffimmut ilaammat killilersuivoq, sumiiffimmilu sanaartortoqarsinnaanani. Sumiiffiup Unescomut ilaajunnaarnerani takornariat tikittarunnaarnissaat, taassuma ernumassutiginngilaa.
- 2004 sioqqullugu takornariarpassuit aamma tikittarput, tamanna allanngornavianngilaq, Ilulissat Unescop allattorsimaffianut ilaappat ilaanngippalluunniit. Tassunga tunngatillugu ernumassutissaqanngilagut. Kangia nunarsuarmi kingornussassanut ilaanera kisiat pillugu nunarsuarmi ilismaneqanngilaq, taanna oqarpoq.
Kommunimi politikeri taamaammat kommunalbestyrelsip ataatsimiinnissaata tulliani siunnersuuteqarniarpoq, siunnersuutimilu isumaqatigineqarnissaa qularinngilaa.
- Partiit tamaasa politikkikkut suleqatigaavut, Siumut kisiat pinnagu. Siunnersuutip kommunalbestyrelsimi partiit suleqatigiittut akornanni taperserneqarnissaa isumalluarfigaara, Anthon Frederiksen oqarpoq.