Naleqqap qaleralinnut akitsuut maanna peeqquaa
Aningaasaqarnermut Naalakkersuisup Asii Chemnitz Narupip Aalisarneq pillugu Ataatsimiititaliarsuup isumaliutissiissutaa tunniunneqartinnagu qaleralinnut akitsuutip peerneqarnissaa itigartitsissutigisimavaa, maannalu Naleqqamit nalunaarutigineqarpoq, aningaasanut inatsisissap isumaqatiginninniutigineqarnerani akitsuutip januaarip aallaqqaataaniit atorunnaarsinneqarnissaa piumasaqaatiginiarlugu.
Naleqqamit partiit arlallit qineqqusaanermi neriorsuutigisimasaattut qaleralinnut akitsuut atorunnaarseqquneqarpoq. Tamanna pissaaq 2022-mi januaarip aallaqqaataani, aningasanullu inatsisissap isumaqatiginninniutigineqarnerani tamanna piumasaqaataassasoq oqaatigineqarluni.
- Naleqqamit qaleralinnut akitsuutip atorunnaarsinneqarnissaa 2018-imi sorsuutigineqarsimavoq, isumaqatiginninniarnermilu akitsuutip 5 procentimiit fire procentimut appartinneqarnissaa anguneqarluni. Appartinneqarnerani neriorsuutigineqarpoq, akitsuut ukiut tamaasa appartinneqartassasoq. Ajoraluartumilli neriorsuutigineqarsimasutut appartitseqqiisoqarsimanngilaq, sulilu akitsuut fire procentiulluni, Jens Napaattooq (N) Sermitsiaq.AG-mut oqarpoq.
Ataatsimiititaliarsuup suliani naammassisimagai
Naalakkersuisup Asii Chemnitz Naarupip aningaasanut inatsisissatut siunnersuut saqqummiukkamiuk oqaatigaa, Aalisarneq pillugu Ataatsimiititaliarsuup inassuteqaatai, aalisarneq pillugu intsisissamik nutaamik suliaqarnermi atorneqartussat tiguneqartinnagit, aalisarnermi suliaqarfik annertunerusumik allanngortinneqarsinnaanngitsoq.
Maannali paasinarsivoq, ataatsimiititaliarsuup isumaliutissiissutai sivisuumik utaqqineqarsimasut tunniunneqangajalersut.
Ataatsimiititaliarsuarmi siulittaasup Jens Paulsenip Sermitisaq.AG-mut oqaatigaa, isumaliutissiissut suliaralugu naammassineqarsimasoq, maannalu politikkerinut innuttaasunullu saqqummiunneqarnissaanut ulluliinissaq sulissutigineqartoq.
- Sapaatip akunnerata tulliata aallartinnerani ulloq tamanut saqqummiussiffissaq, innutaasunik ataatsimiisitsinissaq il. il. nalunaarutiginissaat naatsorsuutigaarput, siulittaasoq oqarpoq.
Naleqqamiillu naatsorsuutigineqarpoq, akitsuutip ajornanngitsumik peerneqarsinnaanera.
-Kukkussutigineqarsimasup peerneqarnissaanut partiillu tamarmik tamatumannga qineqqusaaruteqarsimasut allannguerusuippata akitsuutip peerneqavissinnaaneranut maanna periarfissaqalerpugut, Napaattooq oqarpoq.