Naleqqap Naalakkersuisut kamaakkai

Kalaallit Nunaanni attaveqaasersuutinik arlalinnik aserfallatsaaliinissamut kinguaattooqqaffiupput. Matumani assersuutigalugu timmisartoqarfiit qulimiguulinnullu mittarfiit, inissiat kiisalu nunami umiarsualiviit.

Umiarsualivinnik aserfallatsaaliuisarnerup pitsaanerulersinneqarnissaanut periusissiaq Naleqqap attaveqaasersuutinullu naalakkersuisup akornanni maanna isumaqatigiinngissutaalerpoq.

Naalakkersuisup Mariane Paviasenip (IA) Siumumeersumut Aslak Jensenimut akissuteqarnermini oqaatigaa, Nuummi Sikuki Harbourimi pisoqartarneratut atuisut akiliuteqartinneqartarnerat illoqarfinnut arlaqartunut atuutsinneqalerniartoq.

Nuummi atuisut umiarsualiviup aningaasartuutigisartagaanut aningaasaliissuteqartinneqartarput, Naalakkersuisullu illoqarfinni arlaqartuni atuisunut akiliuteqartitsiartuaalernissaq sulissutigaat.

- Inatsisartunik tunuliaquteqarani kisermaasseriarneq

Taamaalilluni umiarsualivinni assigiinngitsuni assigiissitsisoqalissaaq, aserfallatsaaliinissamullu aningaasassaqartitsisoqalissalluni, naalakkersuisumit oqaatigineqarpoq:

- Atuisunut akiliuteqartitsisalernikkut immikkoortiterineq kisimi pinngitsoortinneqassasoq naatsorsuutigineqanngilaq, aammali aserfallatsaaliinissamut aningaasat amerlanerusut immikkoortinneqartalernissaannut tapertaassalluni, naalakkersuisoq allappoq, nangillunilu:

- Aserfallatsaaligassat aserfallatsaalineqartannginnerisigut umiarsualiviit atorneqarsinnaanissaannut periarfissat kisimik sunnerneqaratik, isumannaassusaat aamma sunnerneqartarpoq, taamaattumillu atuisunut akiliuteqartitsisalernissamut suliaq annertuumik pingaartinneqarluni.

Taamatut nalunaaruteqartoqarnerata kinguneranik Naleqqap naalakkersuisut partiilu naalakkersuisooqatigisani IA appisaluuppaa, partii pingaartumik umiatsiaararsorlutik aalisartut atuisutut akiliuteqartinneqarniarnerannut akerliugami:

- Naalakkersuisoq kisermaassiniarluni aaqqiiniarnera demokratiip ingerlanneqarneranut naapertuutinngilaq aammalu taamatut kisermaasseriarneq parlamentariskimik amerlanerussuteqarani inissittaarneq Naleqqamiit piuarnera akuersaarneqarsinnaanngilluinnarpoq, Jens Napaattooq allakkatigut oqaaseqaateqarpoq, nangillunilu:

- Naalakkersuisut kisermaassillutik ingerlatsisussaanngillat Inatsisartunut amerlanerussuteqartunut tunuliaquteqartussaapput uanilu Naalakkersuisooqataasut suleqatiginagit sumaqatigiinniarnermilu neriorsuutit tunullugit akerlianik iliorniarneq Naleqqamiit sakkortuumik aparuarusupparput:

Nuummi akiliuteqartitsisarnerup atorunnarsinneqarnissaa piumasarigaa

Jens Napaattuup Sermitsiaq.AG-mut itisiliilluni oqaatigaa, naalakkersuisooqatigiit IA-p Naleqqallu oqaasiinnartigut isumaqatigiissutigisimagaat, umiatsiaararsorlutik aalisartut angallatillu mikinerit umiarsualivinnik atuinermut akiliuteqartinneqartassanngitsut.

Napaattuup oqaatigaa, aalisartut Nuummi Sikuki Harbourimut akiliuteqartinneqartarnera atorunnaarsinneqassasoq. Taamaanngippat Naalakkersuisoq tatiginninnginnermik taasissutigineqassaaq:

- Taamaammat piumasaraarput piaarnerpaamik isumaqatigiissutaasimasoq Sikuki Harbour umiatsiaararsortunut mikinerusunillu angallataatilinnut akiliuteqassaarnissaat aaqqinneqassasoq, taamaaliunnginneq malinnaasimannginnermiiginnarani Naalakkersuisuulersumiit, Naalakkersuisooqatigiit isumaqatigiissutaannut uniuineruvoq parlamentaristimik amerlanerussuteqarunnaartoq., Jens Napaattooq allappoq.

Jens Napaattuup nunami sumiiffinni assigiinngitsuni umiarsualivinnik aserfallatsaaliinissamut aningaasat suminngaanniit pissarsiarineqarsinnaanersoq innersuuttugerusunngilaa. Politikkerip oqaatigaa, aserfallatsaaliugassat Inatsisartuni aningaasanut inatsit aqqutigalugu isumaqatiginninniutigineqarnissaat salliutinneqassasoq.

- Qitiusumiit aningaasalersorneqarsinnaanersoq imaluunniit umiarsuit anginerusut akiliuteqartinneqartassanersut misissussavarput, politikkeri oqarpoq.

Sermitsiaq.AG-mit Mariane Paviasen isornartorsiuinermut oqaaseqartinniarneqarpoq.