Nalagaaffiit Peqatigiinni Hjalmar Dahl oqalugiartoq

ICC Kalaallit Nunaata siulittaasua Hjalmar Dahl ulluni makkunani Naalagaaffiit Peqatigiit (FN) Nunat Inoqqaavisa Atugaat pillugit Isummersoqatigiiffiata (UNPFII) New Yorkimi FN-ip allaffeqarfissuani ataatsimiinnerani peqataavoq.

Tassani pingasunngormat Saamit Inuillu Nunat Inoqqaavisa Atugaat pillugit Naalagaaffiit Peqatigiinni ersarinnerulernissaa pillugu ataatsimut isumaat saqqummiuppai.

Hjalmar Dahlip oqaatigaa Naalagaaffiit Peqatigiit aaqqissuusaanerata Nunarsuarmi Nunat Inoqqaavisa Pisinnaatitaaffiisa atuutilersinnissaannut periarfissat akimmiffeqartissinnaagai.

Atuaruk: ICC: FN-ip nunap inoqqaavinut nalunaarutaannik Naalakkersuisut unioqqutitsipput

Oqaloqatigiinneq siammasinnerusoq
Hjalmar Dahlip oqaatigisaa aamma tassaavoq; Nunarsuaq tamakkerlugu 2014-imi ataatsimeersuarnerup inerniliussaani naalagaaffiit imminnut pisussaatimmata Nunat Inoqqaavisa Pisinnaatitaaffiisa atuutilersinneqarnissaannut oqaloqatigiinnerit suleqatigiinnerillu annertunerusut pisariaqartut.

Oqaatigisamini immikkut tikkuagaa tassaavoq, naalagaaffiit allallu nunat inoqqaavisa nunaannik pisuussutaanillu iluaquteqarniartillugit Kiffaanngissuseqartumik Sioqqutsisumik Paasinnittumillu Akuersissuteqarsinnaanermik pisinnaatitaaffik tamatigut atuutsinneqartariaqartoq.

Tassunga ilanngullugu nunat inoqqaavisa ilitsoqqussaralugu ilisimasaat ilanngullugit pitsaasumik silatusaartumillu atorneqartariaqartut, pingaartumik pisuussutinik iluaquteqarniartoqartillugu. Taamaaliornikkut kinguaariit tullii aamma iluaquserneqassagaluartut ilanngullugu oqalugiaammi erseqqissarneqarpoq.

Canadamut nersualaarineq
Canadami naalakkersuisut nutaat nunat inoqqaavinut tunngasunik nutaamik piviusorsiortumillu anguniagaqalersimanerat oqalugiaammi Hjalmar Dahlimit tikilluaqquneqarpoq.

Nunat Inoqqaavisa Atugaat pillugit Isummersoqatigiiffiup 9. Maj ammaanersiornerani Canadami Naalakkersuisut nalunaarutigaat Nunarsuarmi Nunat Inoqqaavisa Pisinnaatitaaffiinnut Nalunaarutip imarisai tamaasa atuutilersinniarlugit.