Nal. 13 tusagassiortunik katersortitsinissaq: Umiarsuartigut takornariartitsisartut pissangasut
Naalakkersuisut nunami coronap inissisimaffia pillugu nalunaaruteqarniarlutik tusagassiortut nalunaaqutaq ataatsimut aggersarpaat. Killilersuutit sinneruttut ikittunnguit umiarsuarnut nunamut tikittunut atuutsinneqartut kiisalu nunami najugaqavinngitsut nunamut iserusuttut akiuussutissalerneqarsimanissaannik piumasaqaateqarneq kisimik suli atuupput.
Nunami maani killilersuutigineqarsimasut amerlanersaat piffissami kingullermi atorunnaarsinneqarput, umiarsuartigulli takornariartitsisartut aasamut pilersaarusiorniarnerminni suli unammilligassaqarput. Tusasgassiortunik katersortitsinermi tamanna oqaaseqarfigineqarniarnersoq qaaqqusissummi allassimanngilaq.
Umiarsuit 370-inik amerlanerusut 2022-mi aasakkut tikittussatut nalunaarutigineqarsimapput, taakkunannga 49-t Nuummut tikinniarlutik nalunaarsimallutik, tassa takornariat 50.000-it missaanniittut.
Naalakkersuisut februaarip qulingiluaani tusagassiortunik katersortitsigamik ilisimatitsissutigaat, killersuutit amerlanerpaartaat unnuap-qeqqaniit atorunnaarsinneqassasut. Takornariartitsisartulli suli naammagittartariaqarput.
Múte B. Egedep taamanikkut oqaatigaa, killilersuutit umiarsuit takornariartitsisartut 370-it missaanniittut nunamut tikinnissamik pilersaaruteqarnerannut suli aporfeqartitsisut isummerfigineqarsimanngitsut.
Paasissutissinneqarsimannginnermit tatineqarsimasut
Umiarsuit ulluni 14-ini kingullerni nunani allaniissimasut suli nunamut taleqqusaanngillat. Umiarsuarnut takornariartitsisartunut tamanna aamma atuuppoq, tikinnissamillu pilersaaruteqarsimasunut amerlanerpaanut tamanna ajornartorsiortitsilluni.
- Aasaanerani takornariartitsinissap qanoq ittuunissaa pillugu aalajangertoqarsimannginnerani suli nalornisinneqarpugut, sagde Martin Sørensen takornariartitsisartoq Uummannamilu Siku Hostel and Toursimimik ingerlatsisoq nalunaarut pillugu oqarsimavoq.
Múte B. Egedep tusagassiortunik katersortitsinermi ilisimatitsissutigaa, tamanna martsimi aatsaat isummerfigineqarniartoq. Ullumili Inuussutissarsiornermut Naalakkersuisoq Pele Broberg (N), Peqqissutsimut Naalakkersuisumik Kiista Fenckerimik (NA), napparsimalluni sulinngiffeqareerluni utersimasumik aamma nunatsinni nakorsaanermik Henrik l. Hansenimik peqateqarluni tusagassiortunik katersortitsissaq.
Peqqinnissaqarfik malinnaasinnaasariaqartoq
Takornariartitsinermik inuussutissarsiuteqartut Kalaallillu Nunaanni Sulisitsisut februaarip qiteqqunneranili tuavisaarilersimapput, takornariartitsisartut isertitsissutigisinnaasaminnik pilersaarusiorsinnaanissaat anguniarlugu.
Umiarsuarnut tunngatillugu killilersuutinik atorunnaarsitsinnginniarnermut tunngavilersuutit ilagisimavaat peqqinnissaqarfiup suli tatisimaneqarnera, umiarsuillu takornariartitsisartut Kalaallit Nunaanni umiarsualivimmiinneranni corona tuniluutilissagaluarpat, peqqinnissaqarfitta sukkasuumik malinnaasinnaajunnaarsinnaanera.
Kalaallilli Nunaanni Sulisitsisut naapertorlugit, umiarsuit amerlanerpaartaat nunamut tikittartut namminneq nakorsaqarlutillu napparsimasunut uninngaviuteqarput, taamalu nunamut tikinnginneranni arlalinnik piumasaqaateqarfigineqarsinnaallutik.