Nakuusersimanermik suliaq pillugu Nikku Olsen qularutigineqartoq
Nikku Olsen Partii Naleqqamut qinigassanngortippoq, taamaakkaluartoq amerlasuunik qinerneqarsimangaluaruniluunniit Inatsisartunut ilaasortanngorsinnaanersoq qularnarpoq
Nikku Olsenip qinigaasinnaanera qinigaasinnaannginneralunniit qularutigineqarpoq. Apeqqut tamanna qinersinerup naammassineqarnerata kingorna aatsaat paasineqassaaq, tassani ataatsimiitiliaq – ilaasortassai suli ilisimaneqanngillat – aalajangiissaaq.
Qinigaasinnaanngitsutut nalilerneqarsimasoq
2013-imi Nikku Olsen Partii Inuit sinnerlugit Inatsisartunut qinigaavoq, taamanili nakuusersimanera pissutigalugu Qinigaanerup misilinneqarnissaanut ataatsimiititaliap qinigaasinnaanngitsutut nalilerpaa.
Nikku Olsenip Inatsisartuni issiavini parteeqatiminut allamut tunniuttariaqalersimanera narrujuummissutigaa.
Inatsisartut Allattoqarfiani siunnersuisuuneq Kent Fridberg nassuiaavoq, qinigassanngortittoq Inatsisartuni ilaasortaasinnaanersoq oqaatigineqareersinnaanngitsoq.
Naleqqukkunnaaarsinnaanermut apeqqut
- Qineqqusaartoq siusinnerusukkut qinigaasinnaanngitsutut nalilerneqarsimasoq – “Inatsisartunut ilaasortat ilaasortaanerannik naleqqukkunnaarutaasut” – qineqqusaarnermi nutaami qinigaasimaguni, qinigaasinnaanngitsutut nalilerneqareersinnaanngilaq, siunnersuisuuneq Sermitsiaq.AG-mut paasissutissiivoq itisiliillunilu:
- Ilaasortanngortoq inaarutaasumik eqqartuussissutikkut imaluunniit akiliisitaanissamik akuersissuteqarsimappat, Qinigaanerup misilinneqarnissaanut ataatsimiititaliamit (aamma Inatsisartunit) siusinnerusukkut nalilerneqarsimanera apeqqutaatinnagu, pineqartup qinigaasinnaanera pillugu Qinigaanerup misilinneqarnissaanut ataatsimiititaliaq Inatsisartunut suliassanngortitsissaaq.
Pissutsit marluk aalajangiisinnaasut
Kent Fridbergip tikkuarpaa, ataatsimiitaliaq nalileeqqinniarneranut atatillugu pissutsit marluk atorneqarsinnaasut:
Pinerlunnermik inatsip unioqqutinneqarneraniit ukiut qassit ingerlasimanersut
Suliaq pillugu qinersisartut qinersinnginnerminni ilisimasaqarfigisimaneraat
Inuk eqqartuunneqarsimanini pissutigalugu imaluunniit akiliisitaanissamik akuersissuteqarsimappat qinigaasinnaanngitsutut nalilerneqarsimasoq kingusinnerusukkut qinersinermi qinigaasinnaanngitsutut nalilerneqareertanngilaq. Tamanna soorlu Danmarkimi takuneqarsimasoq, Mogens Glistrupimi 1983-imi akileraarutitigut peqquserluuteqarsimanini pissutigalugu parnaarussassanngortitaasimasoq ukiut sisamat qaangiunnerini folketingimut qinersinermi qinigaasinnaasutut nalilerneqarpoq, Kent Fridberg, Nikku Olsenimut suliaq pillugu oqaaseqarumanani, paasissutissiivoq.
Kikkut ataatsimiititaliami issiappat?
Kikkut Qinigaanerup misilinneqarnissaanut ataatsimiititaliami issiassanersut suli ilisimaneqanngilaq, taakku 24. april qinersinerup naammassinerata kingorna kingusinnerpaamik ullut 45-t qaangiutsinnagit siullermik ataatsimiissapput. Inatsisartut suleriaasianni naqissuserneqarsimavoq, sivisunerpaamik ilaasortaasimasoq ataatsimiititaliami ilaasortanik sisamik toqqaassasoq.
Sivisunerpaamik ilaasortaasimasoq, Inatsisartunut ilaasortaq sivisunerpaamik ilaasortaasimasoq, imaluunniit arlallit sivisoqatigiimmik Inatsisartunut ilaasortaasimappata angajulleq Qinigaanerup misilinneqarnissaanut ataatsimiititaliami siulittaasuattut toqqarneqartarpoq.