atornerluinerit
Nakuusa: Saqqummeraangamik inuunermik annaassisinnaapput
Inuit Gukki Nukatut aamma Henrik Thomsenitut ittut kinguaassiutitigut atornerlunneqarsimanertik oqaluttuarigaangamikku, taava inuusuttunut taamaattumik nammataqartunut pingaarutilimmik sunniuteqarsinnaapput.
Eqqumiitsuliortoq Gukki Nuka septembarimi pinngitsaalineqartarnerminik oqaluttuartumik Nuummi Eqqumiitsulianik Saqqummersitsivimmi saqqummersitsivoq.
Siornalu marsimi Henrik Thomsenip qulingiluanit aqqanilinnik ukioqalernissami tungaanut pinngitsaalineqartarnini oqaluttuaraa. Taakkununngalu kinguaassiutitigut atornerluisarnerup ingammik angutinit paqumigineqartarnerat taamaatinnissaat pingaaruteqarpoq.
NAKUUSA meeqqat atugaat pillugit suliaqartoq, taamatut saqqummernerit isumalerujussuusut isumaqarpoq.
Atuaruk: Atornerlutsinnerup kingorna angut inuusuttoq saqqummertoq
- Isumaqartorujussuuvoq. Inuunermik annaassisinnaasoq oqaatigerusuppara, Arnavaraq Jørgensen NAKUUSAMI aqutsisoq oqarpoq.
Taassuma tallimanngorpat nuna tamakkerlugu katersuiniarnissaq piareersaleruttorpaa, ukiormanna meeqqanut kinguaassiutitigut atornerluinerit pinngitsoortinnissaanut suliniutinut katersuiniartoqassaaq.
NAKUUSAP meeqqat inuusuttullu pingaarnertut saaffiginniffigisarai, taakkulu maligassiuisoqarnissaat pingaarluinnartuusinnaavoq.
Atuaruk: Ullumikkut imminut qissatigineq ajorpunga, meeqqaalli pillugit qiasarpunga
- Inuit Gukki Nukatut aamma Henrik Thomsenitut ittut, atornerlunneqarnerup kingorna, nipangiusimannereernerullu kingorna, soorunami ikeqarluni illuanut saattoqarsinnaanera takutippaat, Arnavaraq Jørgensen oqarpoq, tamannarpiarlu neriuut inuunermik annaassisinnaasoq taanna isumaqarpoq.
Imminut toqunnissamik eqqarsaateqarneq aamma imminut toqunneq atornerluinerup kingunerisinnaavai.
Tamatuma saniatigut allat misigissutsiminnik nammataminnik oqaluuserinnittut tusaatillugit, inuusuttut nammineq eqqarsaatiminnik aqutsilersinnaanerinut ikiuisinnaapput.
- Saqqummerneq sioqqullugu suliaq sivisooq ingerlasarpoq. Pinngitsaaliineq misigissutsitillu pillugit qanoq oqaluttuassanerlutik eqqarsaatigisimasarpaat.
- Inuusuttut oqaatsit taakku ilaat atorlugit nammineq eqqarsaatitik inissitsitersinnaassavaat, Arnavaraq Jørgensen naliliivoq.
Nuna tamakkerlugu katersuiniarneq qulequtaqartoq 'Meeqqat tamarmik atornerlugaanissamut illersorneqarnissamut pisinnaatitaaffeqarput' tallimanngorpat nalunaaqutaq 20.00-mit 23.00-ip tungaanut KNR TV-kkut toqqaannartumik aallakaatinneqassaaq.