Nakuusa meeqqat isummersortarfianik Tasiilami pilersitsissaaq
Nakuusa aamma Unicef meeqqat isummersortarfiannik Tasiilami pilersitsilerpoq, ilinniartitsisunillu pikkorissaassallutik.
Angalanermi kommunit nakuusaaraani ilaasortat marluk Qeqqata Kommunianiit Kommuneqarfik Sermersuumiillu peqataassapput. Taakku saniatigut Tasiilami meeqqanut, inuusuttunut inersimasunullu sapaatip akunnera tamakkerlugu sammisassaqartitsisoqassaaq.
Sammisassaqartitsineq siulleq unnugu pissaaq. Nakuusami Tasiilami meeqqat sunngiffimmi ornittagaanniissaaq, naapinneqarsinnaassalluni.
Nakuusaaqqat suliaat
Nakuusa aamma Unicef ullumi Tasiilaliassapput. Angalanerminni meeqqat inuusuttullu pisinnaatitaaffiminnik suli ilisimasaqarnerulernissaat anguniassavaat. Meeqqallu isummersortarfiini ilaasortanngortoqarsinnaassalluni.
Tasiilami Alivarpimmi ilinniartitsisut aamma nunaqarfiit atuarfiini ilinniartitsisut pikkorissartinneqassapput, Meeqqat pillugit isumaqatigiissut atuarfinnilu nakuusaaqqat sulinerat pikkorissassutigineqassallutik.
Sammisassat assigiinngitsut
KNR-imi meeqqanut radiokkut aallakaatitassiami aallakaatitsisartoq Sikkerneq Olsen aamma arsartartoq nunatsinni pissartanngoqqammersoq Markus Jensen Tasiilaliaqataapput. KNR Tasiilamit meeqqanut aallakaatitassianik suliaqassaaq, Markus Jensenilu meeqqanut inuusuttunullu arsarnermik sungiusaassalluni.
- Nuannaarutigaarput Sikkerneq Olsen KNR-imiit peqataassammat, Tasiilaminngaanniillu KNR sinnerlugu assigiinngitsunik meeqqanut aallakaatitassiortussaammat. Isumaqarpugut kalaallit meerartaanut tamanut tunu pillugu paasisarqarnerunissaat pingaartuusoq. Sikkerneq meeqqanut attaveqallaqqissuuvoq qilanaarpugullu
pingasunngornerup unnuani ataatsimuualaartitsinissami aqutsisorinissaanut, tassani Tasiilami NAKUUSAP Meeqqat
Isummersorfittaavata saqqummiunneqarnerani Sikkerneq aqutsisuussammat, Nakuusami suliniutinut aqutsisoq Najaaraq Møller tusagassiutinut nalunaaruteqarnermini taama oqarpoq.
- Angalanitsinni Tasiilami meeqqat Markus Jensen peqatigalugu arsamik pinnguarnissamut sungiusarnissamullu periarfissaqassapput. Pingaartissimavarput meeqqat peqqinnartumik sammisaqartinnissaat taamaattumik nuannaarutigaarput Markusip Tasiilami meeqqat inuusuttuaqqallu peqatigiartorlugit ilaassammat. Neriuppugut
tamanna meeqqat suli amerlanerit timersortarnissaannut isumassarsititsiumaartoq, UNICEF-imi suliniutinut pisortaq
Sara Olsvig taama oqarpoq.
Meeqqerivimmi meeqqat angajullerit Nakuusamit aamma qaaqquneqarsimapput.